Read Kok Borok LUK 23 Bible Online

LUK 23 - Kok Borok bible

LUK 23

¹Aswk borok aphuru khe rupsa bacha laiwi Jisuno Pilatni bwskango tubu-ui phai lai kha.

²Aro bórok hai hwnwi bono majra ber lai kha, “Chwng nuk kha o borok chini bororokno lama koró rwui tong kha, bo Rumni bugra kotorno teks ta rw di hwnwi sa-o. Ang’-no Khristo, ang’-no bugra hwnwibo gosi-o.”

³Pilat bono hai hwnwi sẃng kha, “Nwng Judairokni bugra da?” “Nwng’-no o kók saui tong kha bla.” hwnwi Jisu sa kha.

⁴Hakhe Pilat ochai okrarok bai lukuno hai hwnwi sa kha, “O borokno majra bernani ang mungsa phano bwlam nuk ya.”

⁵Bórok teibo dabogwi hai hwnwi sa kha, “Bo phrwngma bai Judia gwnangwi bororok uru-muru wng bai kha. Bo Galilini simi chengsaui tabuk oro sók phai kha.”

⁶Abono khnaui Pilat hai hwnwi sẃng kha, “Omo Galilini borok da?”

⁷Bo Jisuno Herodni angkorni borok hwnwi saui manẃi bini thani rohor kha. Herodbo Jerusalemo tongmani jora.

⁸Jisuno nugwi Herod belai khá srang kha, tamni hwn khe bini kók khnaui Herod bumasíngni simi Jisu bai malaina hwnwi tongmani’-no. Jisu ha-o nuk ya samung khlaimano bo naina hwnwi khatungwi tongmani.

⁹Aboni bagwino Herod bono kók kwbángma sẃng kha, tamo khe Jisu tháisa phano sa li ya.

¹⁰Ochai okrarok bai Kerong phrwngnairok jabirwi bachaui teibo kwrak khe bono majra ber lai kha.

¹¹Herod bini sengkrakrok bai Jisuno yasek khusek khe mwnwi laiwi rí jilik jalak kan rwui Pilatni thani kiphilwi rohor phi kha.

¹²A salono Herod bai Pilat kiching kha laisa ti kha; agi le naisigwi se man lai ya.

¹³Pilat ochai okrarokno, bokhorokrokno tei lukurokno kwrẃngsa khe ring kha.

¹⁴Bo bórokno hai hwnwi sa kha, “O borok bororokno lama koró rwui tong kha hwnwi norok bono ani thani tubu-ui rw phai kha. Nai di, norokni bwskango’-no ang bono sẃng phenegwi nai kha; norok majra berma hai ang le bini mungsa phano majra nuk ya.

¹⁵Herodbo hai’-no bini majra nuk yani bai chini thani kiphilwi rohor kha. O borok butharjakna nangnai abo tẃi samung mungsa phano tang ya.

¹⁶Hakhe ang bono kisa swk swpragwi yakarwi rohor anw.”

¹⁷[Pilat Yókma ter brúm brúm alongo chopjaknairokni bere khoroksano phiyók phiyógwi ma rohoro.]

¹⁸Bebak borok hai hwnwi chirikhók lai kha, “Pái khibi di bono! Barabano phiyógwi rw di!”

¹⁹(Baraba a tauno bulai-toklai khe phiya borok butharwi alongo chopjakmani.)

²⁰Pilat khe Jisuno phiyókna nai-o. Aboni bagwino bo lukuno tei uáisa sa hor kha.

²¹Tamo khe bórok hai hwnwi chirikhók lai kha, “Kruso kanta bu di! Bono kruso kanta bu di!”

²²Pilat hai hwnwi omo bai khe uáitham sẃng kha, “Tamo wngwi? Bo tamo samung hamya tang lang ba? Ang bono butharjakna nangnai abo tẃi samung mungsa phano tangma nuk ya. Hakhe ang bono kisa swk swpragwi yakarwi rohor anw.”

²³Tamo khe bórok “Bono kruso kanta bu di!” hwnwi sotonwi chirikhók phlai tong lai kha; ulo bórok chirikhókma’-no nang kha.

²⁴Bórok naima hai’-no Pilat bono kruso kanta bu di hwnwi dagi kha.

²⁵Bo bu lai tok lai khe phiya bórok butharo hwnwi alongo chobwi tonjaknaino, bórok naima a borokno bo phiyógwi rw kha; Jisuno khe bórokni muchung tẃi khlai thung hwnwi bórokni yago yapharwi rw kha.

²⁶Bórok Jisuno tlangwi tháng phuru Kurinini Simon hwnwi borok khoroksano nuk kha. A borok kami bwkhakni tauno phaimani. Bórok bono romwi bini gwdna-o krus boksaui rw kha, hakhe abono Jisuni uklok balwi tẃi rw kha.

²⁷Bórok kwbángma bini uklok uklok him laijak; aboni bisingo bwrwirok baksa tongo, bórok bini bagwi muisubuk chaui kap laijak.

²⁸Jisu uphilwi bórokno hai hwnwi sa kha, “Jerusalemni bwrwimasong, norok ani bagwi ta kap di; norokni sakni bagwi se kap di, norokni bwsarokni bagwi se kap di.

²⁹Tamni hwn khe omo tẃi sal phai anw, ‘Banjirok’-no ham kha, ogo bwsa tẃi yarokno ham kha, phiya bwsa abuk ma chá rw yarok’-no ham kha!’ hwnwi bororok ma sa anw.

³⁰Aphuru bororok hatháirokno ‘Chini saka-o klai phai di!’ hwnwi ma sa anw, haplokrokno ‘Chwngno koton phai di!’ hwnwi ma sa anw.

³¹Buphang kwthangno se ahai khlai khe kwthwino bahaiba khlaino?”

³²Bórok samung hamya tangnai tei khoroknwinobo Jisu bai baksa butharna bagwi tlang kha.

³³“Bokhorok chárá ” hwnwi kwrẃngsa-o sók phai khe bórok Jisuno aro kruso kanta bu kha, a samung hamya tangnai khoroknwinobo abo hai’-no khlai kha, khoroksano bini yagra bwkhak, tei khoroksano yaksi.

³⁴Aphuru Jisu hai hwnwi sa kha, “Apha, bórokno nakar di. Bórok tamo khlai tong kha abo bórok’-no saui man ya.” Bórok pat ka rwui bini ríno banta khe na lai kha.

³⁵Lukurok aro bachaui naiwi tong kha. Judai bokhorokrok bono mwnwi laiwi hai hwnwi sa kha, “O borok buino le mwthango; bo Kaitorni chongjak Masia hwn khe sakno mwthang thung!”

³⁶Sengkrakrokbo bono mwnwi lai kha. Bórok bini gana thángwi arak ham tha ya hadi laiwi “Nwng Judairokni bugra khe sakno mwthang di!” hwnwi sa lai kha.

³⁷

³⁸Bini bokhorok saka-o,[3] “O borok Judairokni bugra,” hwnwi swijak.

³⁹Aro khachijaknai a borok hamya khoroknwini bere khoroksa bono kului hai hwnwi hwn kha, “Nwng’-ba Masia hwn bla? Hakhe nwng’-bo thang di, chwngnobo mwthang di.”

⁴⁰Tamo khe tei khoroksa bono damrogwi hai hwnwi sa kha, “Nwng Kaitorno kiri ya da? Chwng khoroktham dalsa khe ma thwinai.

⁴¹Chini le sói’-no, chwng tangma hai’-no chwng manjagwi tongo. Bo le mungsa phano samung hamya tang ya.”

⁴²Hakhe bo Jisuno hai hwnwi sa kha, “O Jisu, nwng bugra wngwi phai phuru ano ta pok ja di.”

⁴³Jisu bono hai hwnwi sa kha, “Ang nono o kók sa-o, tini’-no nwng ang bai baksa Paradaiso tongwi anw.”

⁴⁴Dibor ká twtwi wng khe sal chẃng li ya, hakhe sarikni kwtham jora ha gwnangwi mwnagwi tong kha.

⁴⁵Aphuru noktharni rí swngjak khaknwi wngwi khichigwi tháng kha.

⁴⁶Jisu hai hwnwi chirikhók kha, “Apha, nini yago ani pholano yapharo!” O kókbo sa bai kha, hamabo lai kha.

⁴⁷Sengkrak okra abono nugwi Kaitorno lobwi hai hwnwi sa kha, “Omo sói’-no borok kaham.”

⁴⁸Tamo wngno wng ya naina hwnwi aro kuthumnai bororok abono nugwi bebak’-no khaklap bu bu-ui se nogo kiphil bai si-o.

⁴⁹Galilini simi Jisuni logi-o phainai bwrwirok bai bono sininai bebak bororok hakchalo bacha twtwi omorokno nai tong lai kha.

⁵⁰Josep hwnwi borok khoroksa tongo, bo Judiani Arimathia taunni borok. Bo belai borok kaham; Kaitorni ha bu phuru phaino bo abono naisingwi tongo. Kaunsilni chalai phano bo bórokni chapmano’-bo chajak ya, samungnobo chajak ya.

⁵¹

⁵²Bo Pilatni bwskango thángwi Jisuni mangno sanwi kha.

⁵³Bo abono tikhlaiwi lilonni rítrak bai dul kha; holongdabo khurmani mangkhoro bo abono tonwi kha. A mangkhoro khoroksa phano phobjak ya kho.

⁵⁴A salo Judai Tiyar sal, aphuru sabat sal wng tẃi wng tẃi.

⁵⁵Galilini simi Jisuni logi phainai bwrwirok Josepni uklok uklok thángwi mangkhor nai lai kha, Jisuni mangno bahai khe tonjak kha abono nai bu kha.

⁵⁶Hakhe bórok nogo kiphilwi thángwi langi-thok motom tei methi thok motom snamwi lai kha. Kerong rwksaui bórok Sabat salo samung tang yaui tong lai kha.