Read Kok Borok LUK 24 Bible Online

LUK 24 - Kok Borok bible

LUK 24

¹Kaitho Salo phung aisirisiri a bwrwirok bórok snammani a thok motomno tlangwi mangkhoro tháng lai kha.

²Bórok thángwi mangkhor duglamni a holongdapno girok rwui norjak nugwi kha.

³Hakhe bórok bisingo habwi tháng kha; tamo khe bórok Jisuni mangno nugwi li ya.

⁴Bórok mwlang chaui aro bachaui tong lai gra kha, aphuru achomsa rí sal kokjak kanjak borok khoroknwi gana-o bacha phai kha.

⁵Kirima habwi a bwrwirok ha naikhlaiwi tong lai kha. Aphuru a bororok bórokno hai hwnwi sa kha, “Borok kwthangno ba norok tamo wngwi kwthwirokni bisingo naitugwi tong lai?

⁶Bo oro kwrwi kha, bo mwthangwi tisajak kha, Galili-o tong phuru bo o kók samano muitu khlai di,

⁷‘Borok hamyarokni yago Borokni Sajla yapharjagwi kruso kanta bujakna nangnai, hai phano salthamni salo thangwi bachana nangnai.’ ”

⁸A bwrwirok hakhe bini o kókno muitu manjak kha.

⁹Bórok mangkhorni kiphilwi thángwi o wngmarokno sagri chisarokno saui kha, teiroknobo saui kha.

¹⁰A bwrwirok wng kha Magdalani Mariam, Johana tei Jakobni buma Mariam; a bwrwi khoroktham chonghorrokno o kókno saui kha, bórok bai baksa tei kubun bwrwirokbo o kókno chonghorrokno saui kha,

¹¹tamo khe bórok sa phaimano chonghorrok chengra hwnwi tong lai-o, aboni bagwino bórok poito khlai li ya.

¹²Tamo khe Pitor bachaui mangkhor bwkhak khachigwi tháng kha, bo kongwi naharwi rí-chum simi se nugo, tei mungsa phano nuk li ya. Bo o wngmano nugwi uanajagwi nogo kiphil kha.

¹³A salono bórokni bere khoroknwi Emau hwnwi kami bwkhak him lai tongmani, abo Jerusalem bai mail kaisni chalo.

¹⁴Aswk wngmarokno bórok sa lai twtwi him laijak.

¹⁵Bórok kók sa laiwi tong phuru Jisu sakphang’-no gana phaiwi bórok bai baksa himwi tong kha.

¹⁶Bórok bono nukma le nuk kha, hai phano siniui man li ya.

¹⁷Jisu bórokno hai hwnwi sa kha, “Norok him twtwi tamo sa lai?” Bórok mogwi bathak lai kha.

¹⁸Bórokni bere Kliopa hwnjaknai bono hai hwnwi hwn kha, “O Salnwi salthamni bisingo Jerusalemo aswk wngmarokno aro phainairokni bere nwng simi se saui man ya bla?”

¹⁹“Tamo tamo wng kha ba?” hwnwi bo sẃng kha. Bórok hai hwnwi sa kha, “Nasaretni Jisuno tẃiwi wngmarok. Bo diyari se, bo kók sa thanibo, samung khlai thanibo, Kaitor baibo, lukurok baibo kwplai hwnjago.

²⁰Chini ochai okrarok tei bokhorokrok bono buthar rwna bagwi rom rwui rohor kha, hakhe bono kruso kanta bu kha.

²¹Israilrokno phiyóknai hwnwi chwng bono’-no khatungwi tongmani. Hai phano omorok wngmani tini bai nokha saltham wng kha.

²²Aboni bere se chini bisingni khoroknwi khoroktham bwrwirok chwngno uana rwui rw phai kha. Bórok phungo aisirisiri mangkhoro thángmani;

²³tamo khe bórok bini mangno nugwi li ya. ‘Chwng suarirokno nuk kha,’ hwnwi bórok phaiwi sa phai kha. A suarirok bórokno Jisu kwthang se hwnwi saui klang kha.

²⁴Chini bisingni khoroknwi khoroktham borok mangkhoro thángwi a bwrwirok sa phaima hai’-no nugwi kha; tamo khe bórok bono nuk li ya.”

²⁵Hakhe Jisu bórokno hai hwnwi sa kha, “Tamo swk aswk norok butua gwja! Diyarirok saui klangmani kókrokno norok tamo swk aswk poito khlaina nai ya!

²⁶Chẃngsacha wng ya sini’-no Masia sátokjakna nang ya diba?”

²⁷Hakhe Musini simi tei bebak diyarirok bono tẃi elembakni bebago aswk saui klangmarokno Jisu bórokno swbaiwi saui khna rw kha.

²⁸Thángna hwnwi phaimani kami gana-o bórok sók phai kha. Jisu aphuru teibo hakchalo thángna naima hai khe phunuk kha.

²⁹Tamo khe bórok bono hai hwnwi hwn kha, “Sal tháng kha, sanja dabok kha; nwng tini chwng bai tong si di.” Hakhe bo bórok bai tongna hwnwi tháng kha.

³⁰Jisu bórok bai chána achugwi ruti na kha, hakhe suri sanwi abono swkagwi bórokno rw kha.

³¹Aphuru mokol glangsa wngma hai khe bórok bono sini kha, hai’-kheno bo bórokni bwskangni kwmaui tháng kha.

³²Bórok hai hwnwi sa lai kha, “Lama-o bo chwng bai kók sa lai twtwi elembakni kókno swbai sa phuru chini bwkha maitwk kutukma hai kutuk ya da?”

³³Bórok aphuru’-no bachaui Jerusalemo tháng lai kha. Bórok aro thángwi sagri chisarokno teirok bai baksa kuthumui hai hwnwi sa laiwi tong laima nugwi kha,

³⁴“Subrai sói’-no thangwi bacha kha! Bo Simon bai nukjak kha!”

³⁵A borok khoroknwirok lama-o wngmanobo saui khna rw kha, ruti swkak phuru bahai khe bórok Subraino sini kha abonobo saui khna rw kha.

³⁶Bórok omono saui tong phuru Subrai sakphang’-no bórokni kwcharo achomsa bacha phaiwi “Norok ham di,” hwnwi sa phai kha.

³⁷Bórok belai kirima habwi, “Chwng burasa bai se malai si bla!” hwnwi tong lai kha.

³⁸Tamo khe Jisu bórokno hai hwnwi sa kha, “Norok tamni aswk ámang-chímang wng? Tamni aswk norokni bwkha dudru mudru wng?

³⁹Omo ang da ang ya ani yakung yak nai di. Ano tangwi nai di ma tang anw, burasa hwn khe norok ano bahan bekreng gwnang nukma hai wng glak.”

⁴⁰Bo o kókno saui bini yakung yak phunuk kha.

⁴¹Bórok belai khe tobo tongthokjak kha, uabo uanajak kha; aphuru pha’-no bórok bono poito wngwi man ya kho. Aboni bagwino Jisu bórokno hai hwnwi sẃng kha, “Norokni oro chájaknai mungsa swk da tong?”

⁴²Bórok bono á serjak phonsa rw kha.

⁴³Jisu abono naui bórokni mokol bwskango’-no chá kha.

⁴⁴Hakhe bo bórokno hai hwnwi sa kha, “O wngmarokno’-no norok bai tong phuru ang samani, ano tẃwi Musini Kerongo, diyarirokni swima-o tei Lobmungo swijakmani abo jotono nang phaina nang anw.”

⁴⁵Elembakni kókrokno bórok romwi manna tẃi khe Jisu aphuru bórokni bwkha kiyok rwui

⁴⁶hai hwnwi sa kha, “Omo hai swijak tongo; Masia sátokjakna nangnai, phiya salthamni salo kwthwini thangwi bachana nangnai,

⁴⁷hakhe bini mungwi bebak dophani thani sumsok yakarmani kók Jerusalemni simi chengsaui pírjakna nangnai.

⁴⁸Norok’-no omorokno mokol baithang nuknairok.

⁴⁹Apha rwna hwnwi kók rwmano ang’-no norokno rohor anw. Tamo khe kuchukni phan norokni thani phai ya sak norok o tauno naisingwi tong gra di.”

⁵⁰Aboni ulo Jisu taunni ongkhorwi bórokno Bethania jora tubu kha; aro yak tisaui bo bórokno hamari rw kha.

⁵¹Hamari rw twtwi bo bórok bai swkagwi chuknoha-o tisaui tlangjak kha.

⁵²Bórok bono khulum kha, hakhe belai tongthok laiwi Jerusalemo phai kha,

⁵³Aphuru bórok noktharo Kaitorno lob lai máng tong lai kha.