Read Kok Borok LUK 3 Bible Online

LUK 3 - Kok Borok bible

LUK 3

¹Rumni habugra kotor Tiberi ha narwkmani nokha bisi chiba ká phuru Ponti Pilat Judiani gobornor. Herod aphuru Galilini bugra, bini takhuk Philipno Ituria bai Trakhoniti angkorni bugra, Lusania khe Abilinini bugra,

²Hanna bai Kaiapha khe ochai bokhorok. Sakariani bwsla Johonni thani aphuru hasing panthoro Kaitorni kók sók phai-o.

³Hakhe bo Jordan twima gana-ginini ha gwnangwi thángwi sumsok nakarjakna tẃi khe bwkha kiphilwi baptisma wng di hwnwi saui pírwi kha.

⁴Jisaia diyarini bijabo o kókno hai hwnwi swijak kha, “Hasing panthoro khoroksa hai hwnwi chirikhókjak: ‘Subraini bagwi lahar snam di, bo himnani lamano kepleng khe ton di!

⁵Harung ma kuphúngnai, haplok hathái ma hachernai. Lama kokoi ma pengsanai, lahar thatra butra ma miliknai.

⁶Hakhe bebak borok Kaitor rohormani mwthangnai- sano nuk anw!’ ”

⁷Bini thani baptisma wngna hwnwi borok kwbángma phainairokno Johon hai hwnwi sa kha, “Chibukni bosongrok, Kaitor yagul suna naiwi tongmani yakni khárwi yók di hwnwi norokno sabo uansuk rw lang?

⁸Norok sumsok yakar kha hwnwi sijakna tẃi khe bwthái kaham thái tong di. ‘Abrahamno chini apha,’ hwnwi ta sa lai di. Ang norokno o kók sa-o, Kaitor o holongroknibo Abrahamni bwsa tikhlai mano.

⁹Buphang yaphango rua harjak; bwthái kaham thái ya buphangno tanwi hóro khiklai sókjaknai.”

¹⁰Hakhe Bororok bono hai hwnwi sẃng kha, “Hakhe chwng tamo ma khlainai sla?”

¹¹Bo hai hwnwi sa kha, “Khoroksani kamchlwi kangnwi tong khe bo kwrwino tei kangsano rw thung; chána gwnangbo ahaino khlai thung.”

¹²Teks romnairokbo baptisma wngna phaiwi bono hai hwnwi sẃng phai kha, “Hodakra, chwng tamo ma khlainai sla?”

¹³“Manthaini bára teks ta rom di,” hwnwi bo bórokno sa kha.

¹⁴Sengkrakrokbo bono hai hwnwi sẃng kha, “Chwng le tamo khlainai sla?” Bo bórokno hai hwnwi sa kha, “Sikiri-sokoro khe khoroksano phano rang ta chá di eba khoroksano phano tatal khe ta ber di. Ajiui manma bai’-no bwkha kochomwi tong di.”

¹⁵Lukurok aphuru khe khápang srangjak bai kha tei Johon da Masia wngwi tong tung kha hwnwi bórok khá bising bising uansugui tong bai kha.

¹⁶Hakhe Johon bórok bebak’-no hai hwnwi sa kha, “Ang norokno twi bai se baptisma rw-o; phiya ani slái kwplai tei khoroksa phai-o; bini yaklap sokokna suda ang chúk ya. Bo le norokno Phola Kwthar tei hór bai se baptisma rwnai.

¹⁷Khamparni bebak gomno chogwi gula-o thumwi da baina bagwi baling bini yago’-no tongo; gundakno khe thwi phlai ya hóro sógwi khibi bainai.”

¹⁸Abo hai khe teibo bwkha srang rwnai kók sa te sa te Johon bebakno’-no Kothoma Kaham pír kha.

¹⁹Phiya ba Johon habugra Herodno khorai kha, tamni hwn khe Herod bini takhukni bihik Herodia bai tongo, phiya teibo samung hamyarokbo khlai-o,

²⁰aphuru Herod Johonno alongo chop kha, hakhe bini samung hamya teibo samung hamya khlai kha.

²¹Bui baptisma wng khe Jisubo baptisma wngwi kha. Bo suri san phuru nokha phiyokjak kha,

²²hakhe Phola Kwthar pharuk hai wngwi bini sago birkhlai phai kha. Aphuru chuknohani kók hai hwnwi sakhlaijak kha, “Nwng ani khájani Sajla; ang nono’-no belai khe hamjago.”

²³Jisu nokha bisi kwthamchi wng twtwi phuru bini samung chengsa kha. Bo Josepni bwsla hwnwi lukurok hwno. Josep Helini bwsla,

²⁴Heli Matatni, Matat Lebini, Lebi Melkini, Melki Janaini, Janai Josepni,

²⁵Josep Matitiani, Matitia Amosni, Amos Nahumni, Nahum Heslini, Hesli Nagaini,

²⁶Nagai Mahatni, Mahat Matitiani, Matitia Simyini, Simyi Josekni, Josek Jodani,

²⁷Joda Johananni, Johanan Resani, Resa Serubabelni, Serubabel Sialtialni, Sialtial Nerini,

²⁸Neri Melkini, Melki Adini, Adi Kosamni, Kosam Elmadamni, Elmadam Erni,

²⁹Er Josuani, Josua Eliasarni, Eliasar Jorimni, Jorim Matatni, Matat Lebini,

³⁰Lebi Simionni. Simion Judani, Juda Josepni, Josep Jonamni, Jonam Eliakimni,

³¹Eliakim Meleani, Melea Menani, Mena Matatani, Matata Nathanni, Nathan Daudni,

³²Daud Jisaini, Jisai Obedni, Obed Boasni, Boas Selani, Sela Nasonni,

³³Nason Aminadabni, Aminadab Adminni. Admin Arnini, Arni Hesronni, Hesron Peresni, Peres Judani,

³⁴Juda Jakobni, Jakob Isakni, Isak Abrahamni, Abraham Terani, Tera Nahorni,

³⁵Nahor Serugni, Serug Rehuni, Rehu Pelegni, Peleg Eberni, Eber Selani,

³⁶Sela Kainanni, Kainan Arpaksadni, Arpaksad Semni, Sem Noani, Noa Lamekni,

³⁷Lamek Methuselani, Methusela Enokni, Enok Jaredni, Jared Mahalalelni, Mahalalel Kainanni,

³⁸Kainan Enosni, Enos Setni, Set Adamni, Adam Kaitorni.