Read Kok Borok LUK 5 Bible Online

LUK 5 - Kok Borok bible

LUK 5

¹Salsa Genesaret twibom rukungo Jisu bachaui tong phuru bororok uphla káphla khe Kaitorni kók khnanani hwnwi bini sago phaiwi klaiwi rw phai bai kha,

²bo twibom rukungo rung khungnwi nuhur kha; gaborrok rungni ongkhorwi cheirok sú-ui tongwi lai-o.

³Bo rung khungsa-o kasa kha; abo Simonni rung; hakhe bono twi rukungni tei kisa hakchalo tlang di hwnwi sa kha. Hakhe bo rungo achugwi lukuno phrwng kha.

⁴Bo kók sa baiwi Simonno hai hwnwi sa kha, “Twi kuthugo rung tlang di, hakhe a romna bagwi chei bu di.”

⁵Simon hai hwnwi sa kha, “Hoda, chwng hopung bu sini bu-ui masa phano man ya. Hai phano nini kók bai tei uáisa bu khe bu-ui nai phina ta.”

⁶Bórok chei bu-ui nai ba á kwbángma kasaui chei se kichik twtwi wngwi tong kha.

⁷Hakhe bórok kubun rungni logisongrokno yak tail khlaiwi á rom chru phai di hwn hor kha. Bórok phaiwi rung khungnwino a supung phai kha; á belai bángma bagwi rung se kwlwkna naiwi tong si-o.

⁸Ahai wngmarokno nugwi Simon Pitor Jisuni yakung yaphango klaiwi “Subrai, ang sumsok gwnang borok! ani oroni tháng di!” hwnwi sa kha.

⁹Simon bai bini logi-o tongnairok aswk á kwbángma khlaima nugwi uanajak lai kha.

¹⁰Simonni logisong Sebedaini bwsla takhuknwi Jakob bai Johonbo abo hai’-no uanajak kha. Hakhe Jisu Simonno hai hwnwi sa kha, “Ta kiri di, tabukni simi nwng borok rom anw.”

¹¹Rung khungnwino hakungo tisaui bórok tong kwrwi bebak’-no khibi kabu-ui Jisuni logi tháng lai kha.

¹²Salsa Jisu taun khungsa-o tongmani, aro bwsak gwnangwi biyadi chájak borok khoroksa tongo. Bo Jisuno nuk kheno pwtapsa klaiwi hai hwnwi koiwi kha, “Hodasa, nwng ano ham rwna khe ham rwui mano.”

¹³Jisu yak phologwi bono tangwi “Ham di, ang nai-o,” hwnwi sa kha. Logi logi’-no a borokni biyadi kwmaui tháng kha.

¹⁴“O kókno kebono ta sa di,” hwnwi Jisu sa kha. “Tháng di, ochaino thángwi phunugui di. Nwng tabuk ham kha hwnwi lukuno phunukna bagwi Musi rathar di hwnwi dagima hai’-no ratharwi di.”

¹⁵Hai phano Jisuni kók yang yang kaham khe pírjak kha. Bini kók khnana hwnwi tei hamya hamna hwnwi borok kwbángma bini thani phai lai kha.

¹⁶Bo khe siring siring kwrẃngsa-o thángwi suri sanwi tongwi kha.

¹⁷Salsa Jisu bororokno phrwngwi tong phuru baksa Pharisairok tei Kerong phrwngnairok aro achuk laijak. Bórok Galili bai Judiani bebak kamiyungni tei Jerusalemni phaimani. Jisu hamyarokno ham rwna bagwi Subraini phan manjak.

¹⁸Aphuru borok khoroknwi khoroktham uaingo khe balwi yakung yak man ya khoroksano tubu-ui phai kha. Bórok bono nok bisingo sitogwi Jisuni bwskango tonna nai kha.

¹⁹Borok kwbángmani bai bórok bono bisingo sitoknani lama man li ya, hakhe bórok bono núkhúng saka tlang kha, hakhe núkhúng khugwi uaing bai bono buini kwcharo Jisuni bwskango tikhlaiwi rohor kha.

²⁰Bórok aswk poito khlaimano nugwi Jisu a yakung yak man yano “Kiching, nini sumsok nakarjak kha,” hwnwi sa kha.

²¹Hakhe Kerong phrwngnairok tei Pharisairok hai hwnwi uansuk lai kha, “Kaitorno omo hai khe hamya sanai o borok sabo? Kaitorno karwi sumsok nakarwi mannai tei sabo tong?”

²²Bórok uansukma kókno Jisu saui manẃi hai hwnwi sa kha, “Tamo wngwi norok omo hai uansuk lai?

²³‘Nini sumsok nakarjak kha,’ hwnwi sana da lai kuk eba khe ‘Bachaui him gra di,’ hwnwi sana da lai kuk; bubo lai kuk?

²⁴Hakhe o swngcharo Borokni Sajla sumsok nakarwi mano abono ang norokno phunuk anw.” Hakhe a yakung yak man yano Jisu hai hwnwi sa kha, “Ang nono sa-o, bacha di, nini uaing khochaui nogo tháng di.”

²⁵A borok logi logi’-no bebakni bwskango bini uaingno khochaui Kaitorno lob twtwi nogo tháng kha.

²⁶Bebakno belai uanajak bai kha, hakhe “Chwng tini uanamasingcha manwi nuk kha,” hwnwi bórok kirima habwi Kaitorno lob lai kha.

²⁷Aboni ulo Jisu ongkhorwi tháng kha, aphuru Lebi hwnwi teks romnai khoroksano bini tangnogo achugwi tongma nuhur kha. “Ani logi phai di,” hwnwi Jisu bono ring kha.

²⁸Hakhe bo bachaui tong kwrwi bebak’-no khibiui klangwi Jisuni logi tháng kha.

²⁹Lebi aphuru khe bini nogo Jisuno tẃiwi panda kotor achuk rw kha; hakhe aro teks romnairok tei kwbángma kubun bororok bórok bai baksa panda-o achuk laijak.

³⁰Hakhe Pharisairok baksa tei bórokni bisingni Kerong phrwngnairok bini sagrirokno hunu-hanai khe hai hwnwi hwn lai kha, “Norok tamo wngwi teks romnairok bai tei basijakrok bai baksa chá lai-nung lai?”

³¹Jisu bórokno hai hwnwi sa kha, “Kahamni daktor nang ya, hamyani se nango.

³²Ang bórom gwnangrokno sumsok yakar di hwnwi sana phai ya, basijakrokno se ang sana phai-o.”

³³Baksa bororok Jisuno hai hwnwi sa kha, “Johonni sagrirok udam udam ubas khe suri sano, Pharisairokni sagrirokbo ahai’-no khlai-o; nini sagrirok le chá-o nungo.”

³⁴Jisu hai hwnwi sa kha, “Káijaknaisa tong twtwi kái lai panda-o phainairok ma chá ya wng anw da norok hwn? I’nhi, ahai ya.

³⁵Tamo khe omo tẃi sal phai anw káijaknaisa bórok bai swkagwi tlangjak anw, a salo bórok chá yaui ma tong anw.”

³⁶Jisu bórokno o rwngthomabo sa kha, “Rí kwtal sichigwi khoroksa phano rí kwchamo thap ya; thap khe bo rí kwtalno kichik rwnai, phiya rí kwcham bai rí kwtal mwchang lai glak.

³⁷Eba khe khoroksa phano angur bwtwi kwtalno twk mosonjago ton ya; ton khe angur bwtwi kwtal a twkno rechek-rachak khlainai, hakhe bwtwibo kwsar bainai, twkbo báinai

³⁸Tamo khe angur bwtwi kwtalno le twk kwtalo’-no tonna nangnai.

³⁹Angur bwtwi kwcham nung baiwi kebo kwtal san ya; ‘Kwcham’-no kaham’ hwnwi bo sa-o.”