Read Kok Borok LUK 7 Bible Online

LUK 7 - Kok Borok bible

LUK 7

¹Jisu aswk kothomarokno lukuno sa bai khe bo Kapharnaumo tháng kha.

²Aro sengkrak okra khoroksani seleng khoroksa hamya klaiwi thwina naiwi tongmani; abo bini khájani borok.

³Bo Jisuni kók khnaui Judai okra khoroknwi khoroktham rohorwi Jisuno phaiwi bini selengno ham rw phai di hwnwi sa rw hor kha.

⁴Jisuni thani phaiwi bórok hai hwnwi jai kheno koi kha, “O borok nwng bai chubajak thai klai-o,

⁵bo chini borokno hamjago, chini bagwi bo thumnok khungsa tangwi rw kha.”

⁶Hakhe Jisu bórok bai tháng kha, bo nok gana sók phai khe a sengkrak okra bini bikichingsongni khúk tẃi hai hwnwi sa rw hor kha, “Hodasa, phaina nang glak kha, tamni hwn ba nono ani nogo kasa rwnanai ang chúk ya;

⁷phiya nini thani angbo thángnani chúk ya. Nwng hwn kheno ani seleng ham anw.

⁸Angbo bokhorok khoroksani yago, ani yagobo sengkrakrok tongo. Ang khoroksano ‘Tháng di!’ hwn khe bo thángo, tei khoroksano ‘Phai di!’ hwn khe bo phai-o, ani selengbo ‘Omono khlai di!’ hwn khe bo abono khlai-o.”

⁹O kók khnaui Jisu uanajak kha, hakhe bono rwktharnai lukuno uphilwi hai hwnwi sa kha, “Norokno ang o kók sa-o, Israilrokni bisingo pha’-no bo hai poito gwnang borok ang nuk ya kho!”

¹⁰A rohorjaknairok sengkrak okrani nogo kiphilwi nai ba a seleng hamwi tháng kha.

¹¹Aboni ulo Jisu Nain kamiyungo tháng kha tei bini logi bini sagrirok bai borok kwbángma tháng kha.

¹²Bo a taunni duglamo sók phai dorop kheno kwthwi balwi phaima nuk phai kha. A kwthwi wng kha randijwk khoroksani songdari bwsla. Aroni borok kwbángma bini logi logi.

¹³Subrai a randijwkno nugwi khairogwi “Ta kap di,” hwn kha.

¹⁴Bo gana thángwi tolai tangwi kha, hakhe kwthwi balnairokbo bathak kha. “O chwlasa, ang sa-o bacha di!” hwnwi Jisu sa kha.

¹⁵Hai kheno a kwthwi bachaui choksa achugwi kók sacha kha. Jisu bono bumani yago yapharwi rw kha.

¹⁶Bebak’-no kirima habwi “Chini bisingo diyari kotor khoroksa bacha kha,” hwnwi Kaitorno lob lai kha. “Kaitor bini bororokno naikhlai kha,” hwnwibo lob lai kha.

¹⁷Ha gwnangwi tei gana-gini amchoi-o bini o kók pírjak kha.

¹⁸O kókrokno Johonni sagrirok bono khna rw kha.

¹⁹Hakhe Johon bórokni bisingo khoroknwino ringwi Subraini thani rohorwi hai hwnwi sẃng rw hor kha, “Borok khoroksa phaina hwnwi Johon samani nwng da a borok? Chwng ba tei khoroksa swkno da naisingwi tongnai?”

²⁰A khoroknwi Jisuni thani hai hwnwi sa phai kha, “Borok khoroksa phainai hwnwi Johon samani nwng da a borok? Chwng ba tei khoroksa swkno da naisingwi tongnai? Abono saui manna bagwi baptisma rwnai Johon nini thani chwngno rohoro.”

²¹Jisu aphuru podrepot hamyarokno ham rw-o, mwtai hamya kolobjakrokno sra rw-o, nuk yarokno nuk rw-o khlai tongma jora.

²²Jisu Johonni sagrirokno hai hwnwi sa kha, “Norok nukmarokno, norok khnamarokno Johonno thángwi saui di: phula nuk kha, khora him kha, biyadi ham kha, nathong khna kha, kwthwi mwthangjak kha, phiya kwrwirokni thani Kothoma Kaham pírjak kha.

²³Ani bagwi kha udru mudru wng ya borok bo’-no hamchajak!”

²⁴Johonni sagrirok tháng bai khe Jisu lukurokno Johonni kók hai hwnwi sacha kha, “Norok hasing panthoro Johonni thani tháng phuru tamo naina muchungwi tháng? Nokbar bai narjak nolphangno da naina tháng?

²⁵Hakhe tamo nwng naina tháng sla? Rí jilik jalak kanjakno da naina tháng? Rí jilik jalak kannairok, tongthok cháthok tongnairok bórok noyungrogo se tongo.

²⁶Sa di, hakhe tamo naina tháng sla? Diyarino da? Au, ang norokno o kók sa-o, diyarini slái phano teibo kotorno norok nuk bu kha.

²⁷‘Iko, omono ang rohormani a borok hwnwi Kaitor sa-o, nini lama hokna bagwi ang bono nini slái swkang rohor anw,’ hwnwi Elembago swijak tongmani abo’-no Johon.

²⁸Ang norokno o kók sa-o, bwrwini ogo achainairokni bere Johonni slái kotor kwrwi, hai phano se Kaitorni hani jotoni borok kusu phano se bini slái kotor.”

²⁹(Johonni kók khnaui bebak borok tei teks romnairok suda bini thani baptisma wng kha. Abo tẃi khe bórok Kaitor dagimano kaham hwnwi gosi kha.

³⁰Tamo khe Pharisairok tei Kerong phrwngnairok Johonni thani baptisma wng yaui Kaitorni lamani phérwi tong rwk kha.)

³¹Hakhe Subrai hai hwnwi sa kha, “Hakhe tabukni bororokno ang tamo bai sunai? Bórok bubo tẃi borok?

³²Bórok bajar kwcharo achugwi hai hwnwi sa lainai chwrairok hai, ‘Norokni thani chwng sumui tam kha, norok le mw se mwsa ya! Chwng kwthwini kapmung kap kha, norok le ka se kap ya!’

³³Baptisma rwnai Johon bo maibo chá ya, angur bwtwibo nung ya, hakhe ‘Bo mwtai hamya kolobjak,’ hwnwi norok hwn lai kha.

³⁴Phiya Borokni Sajla bo chábo chá-o, nubo nungo, hakhe norok, ‘Iko, nahar di u borokno! Bo cháphlak-nungphlak, teks romnairok bai basijakrokni bayap!’ hwnwi sa lai ti kha.

³⁵Hai phano bini bebak bwsarokni bising tẃi se a elem kubui hwnwi sijago.”

³⁶Pharisai khoroksa Jisuno bini nogo mai chá rwna hwnwi kobok kha. Jisu bini nogo thángwi chána achuk kha.

³⁷A tauno tongmung sitra tongnai bwrwi khoroksa tongo. Jisu a Pharisaini nogo chána achuk kha hwnwi bo saui man kha, hakhe holong kuphurni sisi-o khe thok motom tubu-ui phai kha.

³⁸Bo Jisuni uklok tẃi yakung gana-o thángwi bachaui kha, hakhe kap twtwi mokol muktwi bai bini yakung misi kha tei bwkhnai bai hu-ui rw kha. Hakhe bo bini yakung motom su-ui a thok motomno lukhlai rw kha.

³⁹Jisuno koboknai a Pharisai abono nugwi bwkha bising bising hai hwnwi sa kha, “O borok kubui’-no diyari wngma te bubo tẃi bwrwi bono tang phai kha bo saui man kha mun; a bwrwi bubo tẃi tongmung sitra khe tong bo saui man kha mun!”

⁴⁰Jisu bono hai hwnwi sacha kha, “Simon, nono ang kók tháisa sana tongo.” “Sa di ta, hodakra,” hwnwi Simon sa kha.

⁴¹Jisu hai hwnwi sa kha, “Lakai rwnai khoroksani thani borok khoroknwi lakai suthai tongo; khoroksani rang khokbara tei khoroksani rang khokbachi.

⁴²Bórok khoroknwi’-no a rang su-ui man li ya khe bo bórokni lakai yakarwi rw kha. Tabuk sa di, bono sabo hamjak kuknai?”

⁴³Simon hai hwnwi sa kha, “A lakai kwbáng yakarjaknai hwnwi ang kha ka-o.” “Au, nwng sói kók’-no sa kha,” hwnwi Jisu sa kha.

⁴⁴Jisu aphuru khe a bwrwini phaising uphilwi Simonno hai hwnwi sa kha, “O bwrwino nu da nuk kha? Nini nogo ang phai kha; nwng yakung súnani twi rw li ya, bo le muktwi bai se ani yakung sú-ui bwkhnai bai hu-ui rw kha.

⁴⁵Nwng ano motom su-ui lamjak sok ya, tamo khe phai phuruni simi bo le ani yakung motom su-ui máng tong si-o.

⁴⁶Nwng ano bokhorok phulna suda thok rw sok ya, bo le thok motom bai se ani yakung súcha sok kha.

⁴⁷Aboni bagwi ang nono o kók sa-o, bo belai hamjakmani aboni bini sumsok kwbángma phano nakarjak bai kha hwnwi sijak rw-o. Phiya sumsok báng tha ya nakarjak khe a borokni hamjakmabo báng ya.”

⁴⁸Hakhe Jisu a bwrwino “Nini sumsok nakarjak bai kha,” hwnwi sa kha.

⁴⁹“Sumsok suda nakarnai o borok sabo?” hwnwi Jisu bai aro chá lainairok sa lai kha.

⁵⁰Jisu a bwrwino hai hwnwi sa kha, “Nini poito bai’-no nwng mwthangjak kha; kwchang kwchang khe tháng si di.”