Read Kok Borok LUK 9 Bible Online

LUK 9 - Kok Borok bible

LUK 9

¹Sagri chiknwirokno Jisu kwrẃngsa khe ringwi bórokni yago bebak mwtai hamya rwkhlainani bai hamyarok ham rwnani phan rw kha.

²Hakhe Kaitorni hani kók pírnani tei hamyarokno ham rwnani bagwi bo bórokno rohor kha.

³Bo bórokno hai hwnwi sa kha, “Lama him thani mungsa phano ta tẃi di; raidang buya, bogol buya, maichu buya, rang buya kamchlwi suda kangsani bára ta tẃi di.

⁴Norok kasa rwjakmani a nogo’-no tong di, phiya a taunni kutul ya sak arono tong di.

⁵Norokno yachak sokyarokni tauno ta tong bu di. Bórokno hus khlai rwna bagwi yakung hadlwi bupraui kabu di.”

⁶Sagrirok aroni kak laiwi kami brúm brúm thángwi joto jaga-o Kothoma Kaham pírna bai hamya ham rwma bai khali tongwi lai kha.

⁷Galilini habugra Herod aswk wngmarokno khna kha. Bo belai uanajak kha, tamni hwn khe “Baptisma rwnai Johon thangcha phiro,” hwnwi baksa baksa sa lai-o.

⁸Baksa ba “Elia nukjak phai-o,” hwnwi sa lai-o, baksa ba “Agini diyarirokni bere khoroksa thangcha phiro,” hwnwi sa lai-o.

⁹Herod hai hwnwi sa kha, “Ang agi’-no Johonni bokhorok tan rwui khibi kha. Ang omo tẃi kókmung khnamani o borok le sabo sla?” Bo Jisu bai malaina naiwi tong kha.

¹⁰Bórok khlaiwi phaimarokno chonghorrok kiphilwi Jisuno sa phai kha. Bo bórokno bini logi tlang kha, hakhe bórok simi Betsaida tauno tháng kha.

¹¹Bororok abono saui man kheno bono rwkthar lai kha. Bo bórokno yachak sok kha, hakhe Kaitorni hani kók bórokno saui khna rw kha, phiya hamya hamna muchungnairokno ham rw kha.

¹²Sal thángnanogo sagri chiknwirok Jisuno hai hwnwi sa phai kha, “O bororokno rohor si di. Bórok gana-gini kamirogo thángwi tongna-chána jugali thung; oro mungsa phano manthok ya.”

¹³“Norok’-no chá rw di,” hwnwi Jisu sa kha. Hakhe bórok hai hwnwi sa lai kha, “Ruti lepba bai á maknwi simi se chini thani tongo. Aswk bororokni bagwi nwng chwngno chámung pai di da hwn?”

¹⁴(Aro chwlarok simi’-no khorokbasai wng anw.) “Bororokno bachi bachi khe achuk rw di,” hwnwi Jisu bini sagrirokno sa kha.

¹⁵Sagrirok abo hai kheno bebakno achuk rw kha.

¹⁶Jisu a ruti lepba bai a á maknwi naui nokhasa naisaui Kaitorno hambai rw kha. Hakhe bo ruti bai áno swkagwi lukuno rw di hwnwi sagrirokno rw kha.

¹⁷Bórok bebak’-no ok pungwi chá kha. A bororok cháma bára tong rwkmarokno sagrirok khochamani ura chiknwi pung kha.

¹⁸Salsa Jisu saichung suri sanwi tong phuru sagrirok bini thani phai kha. “Bororok ano sabo hwn?” hwnwi bo bórokno sẃng kha.

¹⁹Bórok hai hwnwi sa kha, “Baksa nono baptisma rwnai Johon hwn lai-o, baksa ba Elia hwn lai-o, phiya agini diyarirokni bere khoroksa thangcha phiro hwnwi baksa ba sa lai-o.”

²⁰Jisu bórokno hai hwnwi sẃng kha, “Norok le tamo hwn? Ang sabo?” “Nwng Khristo, Kaitor bai rohorjaknai Masia,” hwnwi Pitor sa kha.

²¹“Buino omono ta sa di,” hwnwi Jisu bórokno ragdama khe saui rw kha.

²²Bo hai hwnwibo sa kha, “Borokni Sajla panjalwi’-no sátokjakna nangnai, okra chakrarok, ochai okrarok tei Kerong phrwngnairok bai norjakna nangnai. Bo butharjaknai, hai phano salthamni salo mwthangwi tisajaknai.”

²³Bo bebakno hai hwnwi sa kha, “Ani logi phaina khe a borok bini sakni kók ta uansuk thung, sal brúm brúm sakni krus balwi ani logi phai thung.

²⁴Kwthang tongna muchungnai borok bo thwinai; phiya ani bagwi thwinai borok bo thangnai.

²⁵Thwi tháng kha hwn khe eba komorwi tháng kha hwn khe bebak swngcharno manẃi ba a borok tamo manma klai?

²⁶Ano tẃi eba ang samani kókno tẃi tumungno khoroksa swk lachijak khe Borokni Sajlabo sakni chẃngsacha bai, Buphani chẃngsacha bai tei suari kwtharrokni chẃngsacha bai chẃngsacha khe phai phuru a borokno tẃi lachijaknai.

²⁷Muitu narwk di, oro baksa tongo Kaitorni ha nuk ya sak thwi glak.”

²⁸Jisu o kókrok sa laimani nokha salchar lái khe bo Pitor, Johon tei Jakobno bini logi tlangwi suri sanna bagwi hathái-o kasaui tháng kha.

²⁹Bo suri sanwi tong phuru bini mwkhang juda wngwi tháng kha, bini rírokbo chẃngsaui phurchaui phai kha.

³⁰Achomsa nai ba borok khoroknwi bo bai kók sa laiwi tong lai kha. Bórok wng kha Musi bai Elia.

³¹Bórok chuknohani chẃngsacha bai nukjak phai kha, hakhe Kaitor bwkha chapma tẃi Jisu Jerusalemo butharjaknani kókno sa lai tong lai kha.

³²Pitor bai bini logisongrok jai kheno muktrwi tháng laijak. Bórok sichaui Jisuno chẃngsajak nuk kha, bo bai bachajak a borok khoroknwinobo nuk kha.

³³A borok khoroknwi Jisu bai kagwi thángna nai phuru Pitor bono ahai hwnwi sa kha, “Hoda, chwng oro tongmani abo kaham’-no. Chwng oro basai khungtham tang anw, nini khungsa, Musini khungsa tei khungsa Eliani.” (Aile bo tamo saui tong kha abo bo’-no saui man ya.)

³⁴Bo o kók saui tong phuru chumui dolasa bórokno kobol phai kha; bórokno chumui kobol kheno sagrirok kirijak kha.

³⁵Aphuru chumui bisingni o kók sakhlaijak kha, “Bo ani Sajla, ani chongjak; bini kók khna di!”

³⁶O kók sajak bai khe nai ba Jisu saichung se. Sagrirok siring sorok, a nukmanino bórok aphuru khoroksano phano sa li ya.

³⁷Teini salo bórok hatháini ongkhorwi phai kha, aphuru borok kwbángma Jisu bai malai phai kha.

³⁸Borok kwbángma bisingni borok khoroksa hai hwnwi chirikhók kha, “Hodakra, ani chwraisano kisa nai jaba di, omo simi’-no ani chwla bwsa!

³⁹Bono mwtai hamya masa achomsa chirikhógwi kolob phai-o, hakhe bono leng rwui khuktwi phena ongkhor rw-o; bono akhini’-no leng khro-khro khlai ya sak thángna nai ya.

⁴⁰Ang nini sagrirokno bono sra rw ja di hwnwi koimani, bórok man li ya.”

⁴¹Hakhe Jisu hai hwnwi sa kha, “Norok bwswk se poito kwrwi gwja! Norok bwswk se cha ya gwja! Norok bai ang tei sal bwswk ma tongna nangno? Tei sal bwswk khá ma lokna nangno? Nwslano oro tubu di.”

⁴²A chwrai phai phuru bono a mwtai ha-o popsa khiklaiwi leng rw kha. Jisu a mwtai hamyano damrogwi chwraino sra rw kha, hakhe buphani yago kiphilwi rw kha.

⁴³Kaitorni phan kwplaino nugwi bebak’-no uanajak bai kha. Jisu samung khlaimarokno nugwi bebak’-no mwlang chaui tong bai kha. Aphuru Jisu bini sagrirokno hai hwnwi sa kha,

⁴⁴“Ani o kókrokno khunju kan di. Borokni Sajla bororokni yago yapharwi rohorjaknai.”

⁴⁵Bórok o kókno romwi man li ya. Bórok romwi ta man thung hwnwi’-no a kókno khogwi ton kha. Hai phano “O kókno swbai sa di,” hwnwi bórok bono sẃng rak li ya.

⁴⁶Bórokni bisingo sabo tor kuk, o kókno tẃiwi sagrirok tokra rw lai tong lai kha.

⁴⁷Bórok uansukma kókno Jisu saui manẃi chwrai khoroksa náhárẃi gana-o bacha rwui

⁴⁸hai hwnwi sa kha, “Ani mungwi o chwraino yachaknai borok bo ano’-no yachago; phiya ano yachaknai borok bo ano rohornainobo yachago. Norokni bisingo kusu hwn khe bo’-no tor kugo.”

⁴⁹Aphuru Johon hai hwnwi sacha kha, “Hoda, nini mungwi khoroksano mwtai hamyarok rwkhlaimani chwng nuk kha. Chini borok ya hwnwi chwng bono ahai ta khlai di hwn kha.”

⁵⁰Jisu bono hai hwnwi sa kha, “Hai ta hwn di. Norokno kebeng ya borok bo norokni bwkhak se.”

⁵¹Jisu chuknoha-o tisaui tlangjaknani sampha rwrwk kha, hakhe bo Jerusalemo thángna hwnwi khá chong súk kha.

⁵²Bo kók tunnai borok rohor gra kha, bórok nangmani manwi jugalina hwnwi Samariani kami khungsa-o thángwi habwi kha.

⁵³Tamo khe Jisu Jerusalem bwkhak thángnai hwnwi aroni bororok bono yachak li ya.

⁵⁴Sagri Johon bai Jakob abono nugwi hai hwnwi sa kha, “Subrai, bórokno gaija rwna bagwi chwngno nokhani hór tikhlai di da hwn?”

⁵⁵Jisu bórokno uphilwi naisigwi khorai kha.

⁵⁶Aboni ulo bórok tei khungsa kami-o tháng lai kha.

⁵⁷Bórok lama himwi tong phuru borok khoroksa Jisuno hai hwnwi sa kha, “Nwng tháng thani angbo thángnai.”

⁵⁸Jisu bono hai hwnwi sa kha, “Siyalni hakhor tongo, toksa-toktẃirokni bothop tongo, Borokni Sajlani le kwrẃngsa phano bokhorok bomna se kwrwi.”

⁵⁹Bo tei khoroksano hai hwnwi sa kha, “Ani logi phai di.” Hakhe a borok Jisuno hai hwnwi sa kha, “Aphano phobwi rwi grana.”

⁶⁰Jisu hai hwnwi sa kha, “Kwthwi bai kwthwino phob lai thung. Tháng di nwng, Kaitorni hani kók pírwi di.”

⁶¹Tei khoroksa hai hwnwi sa kha, “Hodasa, ang nini logi thángnai, tamo khe nokni bororokno saui phai grana.”

⁶²“Al chuai twtwi uklok naisik naisiknai borok bo Kaitorni hani borok wngna chúk ya,” hwnwi Jisu sa kha.