Read Kok Borok UÁINWINI SA PHIMA 1 Bible Online

UÁINWINI SA PHIMA 1 - Kok Borok bible

UÁINWINI SA PHIMA 1

¹O kóktháirok wng kha bebak Israil dopharokno Jordan ayang narni hasinglwngo Sup ganani Araba-o Paran bai Tophelni kwcharo, Laban, Hajerot tei Dijahabo tong phuru Musi Israilsarokno samani.

²Abo Horebni simi hachuk Seir tẃi khe Kades-barnea sógwinani nokha sal chisa nango.

³Subraiyung Israil dopharokno sanani bagwi Musino dagima tẃi’-no bo sakhlai kha, abo Musi nokha bisik brwichini tei sal chisani puilani salo bórokno sa kha.

⁴Omo wng kha kamiyung Hesbonno tẃidulnai bai Basanni habugra Og, kamiyung Astarot bai Edreino tẃidulnai Amorsarokni habugra Sihonno Subraiyung mechenmani ulo;

⁵Jordanni ayang nar salka Moab amchoi-o Musi Kaitorni raidano omo hai khe swbaiwi sukhrubwi hai hwnwi sa kha,

⁶“Subraiyung chini Kaitor Horebo chwngno hai hwnwi sa kha, ‘Norok hathái-o sal kwbángma tong lai kha;

⁷Amorsarokni hachuk ha bai Negebo tei gana-ginini amchoi, Arabani, hachuk ha Sephela tei Negeb, Kananni tei bórokni ha twijlang rukung bai Lebanon, Uphratisni bwkhak norok tabuk kiphilwi lam rw di.

⁸Nai di ang o hano norokno rw kha. Norokni chuchusong Abraham, Isak tei Jakobsong tei bórokni ulni bosongrokno ha rwna hwnwi Ang Subraiyung kók rwmani a ha-o habwi norok baithangni ha khlai di.’

⁹“Aphuru’-no ang norokno hai hwnwi sa kha bla, ‘Ang saichung norokni pojano horwi man ya;

¹⁰Subraiyung norokni Kaitor norokno er rw kha, tei di norok tabuk nokhani athukiri hai kwbángma wng kha.

¹¹Subraiyung norokni thani Kaitor kók rwma tẃi’-no norokno sai-sai khe báng rw thung tei bo kók rwma twi’-no norokno hamari rw thung.

¹²Bahai khe ang saichungba norokni hilikma poja tei uálaimungrokno buj khlai sinai?

¹³Norok sak sakni bosongni bisingni si kuknai, tang kwrwng tei mung kaham bororokno chong di, ang bórokno norokni tangphang snamnai.’

¹⁴‘Norok khlai di hwnwi samani abo kahamno,’ hwnwi norok ano kók uphilwi sa kha.

¹⁵Aboni bagwi ang norokni bosongni bokhorokrok sijak tei tang kwrwngrokno naharwi, norokni bagwi bokhorok chong di, khorok sarani bokhorok, khorokbachini bokhorok, khorokchini bokhorok tei tangnairokno chong di.

¹⁶A jora-o ang norokni buj thumnairokno hai hwnwi barja rw kha, ‘Norok norokni takhukrokni bisingo tei buini harokno kaichomwi naichomwi sói khe buj thum di.

¹⁷Norok buj thum phuru khaksa babai ta wng di; borok kotor bai borok kusurokno baksa kheno buj thum di. Khoroksano phano ta kiri di, tamni hwn khe buj le Kaitorni se, buj kutukrokno khe ani thani tubu di, ang abono khnanai.’

¹⁸A jora-o norokni tamo khlaina nangno, a samungrokno tẃiwi ang norokno kókbitibo rw kha.

¹⁹“Ulo chwng Subraiyung chini Kaitor dagima tẃi’-no Horebni nongkhor kha tei Amorsarokni hachuk ha-o thángmani lama-o norok kotor uanamasingcha hasing haphar nukmani aboni kwchar tẃi lam rwui chwng Kades-barnea-o sók phai kha.

²⁰Tei ang norokno hai hwnwi sa kha, ‘Subraiyung chini Kaitor chwngno ha rwmani a ha Amorsarokni hachuk ha-o norok phaiwi sók phai kha.

²¹Nahar di, Subraiyung norokni Kaitor norokno a hano rw kha; nwng sakni chuchu borani Kaitor Subraiyung dagima tẃi’-no bachaui abono baithangni khlai di, ta kiri di tei bwkha ta bái di.’

²²Hakhe norok bebakno ani thani phaiwi hai hwnwi sa lai phai kha, ‘Phai di chwng a hano naichomna bagwi o bororokno rwui rohor lainai tei bórok a hano naichomwi chwngno lamarok tei kamiyungrokni kók bahai tamorok tei bahai khe habwinai sa phai lai thung.’

²³Aphuru ang a kókno chajagwi norokni bisingni bebak bosongni’-no khoroksa khe khorok chinwi bororokno saiwi nahar kha;

²⁴bórok lam rwui hachuk ha-o kasa laiwi tháng kha tei Eskol harungo sógwi lai gra kha tei naichomwi lai kha.

²⁵Aphuru bórok a hani kisa bwtháirokno tubu-ui phunuk phaiwi chwngno hai hwnwi sa phai kha, ‘Subraiyung chini Kaitor chwngno rwna naima ha belaino kaham.’

²⁶“Hai phano norok a ha-o thángnani soi li ya; norok Subraiyung Kaitorni dagimarokno kebeng lai kha;

²⁷norok sak sakni rí nogo tongwi hai hwnwi kutuk lai kha, ‘Subraiyung chwngno selengjak kha; aboni bagwino bo Ijipni phiyógwi Amorsarokni yago sokomor rwna bagwi yaphar kha.

²⁸Buro-o chwng thángnai? Chini takhuksong chini kháno swbai kha. Bórok hai hwnwi sa lai-o, “A bororok chini slái belai kotor tei kolok; a kamiyung kotor tei nokha nang twtwi chokdeual bai khopjak; tei se aro chwng Anakimrokni bwsaroknobo nuk kha.” ’

²⁹Aphuru ang norokno hai hwnwi sa kha, ‘Bwkha udru mudru ta wng di, abórokno tabo ta kiri di.

³⁰Subraiyung norokni Kaitor norokni bwskang bwskang thángnai, Ijibo tong phuru nini mokol bwskango khlaima hai bo baithang norokni bagwi choba khlai lainai,

³¹tei hasing hapharobo nwng abo hai nuk kha, bupha bwsano bamwi tẃima hai khe norok a ha-o sók phai ya sak norokni bebak lama-o Subraiyung norokni Kaitor norokno bamwi tubu kha.’

³²Hai phano o kókrok bai norok Subraiyung norokni Kaitorno poito tháng li ya,

³³yang le bo se norokni rínok buro tangnani tei buro bathagwinai, lama-o him lai tháng phuru norokni bwskango tongwi lama phunukna bagwi horo hórjlai tei salo chumui bai khe norokno sógwithaini lama phunuk kha.

³⁴“Subraiyung norokni khorang khnaui jolijak kha tei hai hwnwi swmai tang kha,

³⁵‘Ang norokni chuchusongno o hano rwna hwnwi kók rwmani, o cha ya bosongrokni bere khoroksa phano a ha kahamo habwi manẃi glak.

³⁶Jephuneni bwsla Kaleb simi se a ha-o habwinai tei bo yapri káma a hano ang bono tei bini bwsarokno rwnai; tamni hwn ba bo bwkha rw súgwi Subraiyungni yapri rwk kha.’

³⁷Subraiyung norokni bagwi anobo jolijak kha, bo ano hai hwnwi sa kha, ‘Nwngbo a ha-o habwi man glak;

³⁸nini bwskango bachajak Nunni bwsla Josua se aro hapnai. Nwng bono bwkha srang rw di, tamni hwn ba bo se Israilrokno a harokno man rwnai.

³⁹Norokni chwrairok kena arirok bai choprojaknani hwnwi norok sa laimani, tabuk jora bórok kaham hamya sinani rwng ya kho, bórokno abono baithangni ha khlainai.

⁴⁰Phiya ba norok khe kiphil di tei twijlang kwchakni lama tẃi khe hasing hapharo tháng di.’

⁴¹“Aphuru norok kók phirogwi ano hai hwnwi sa kha, chwng Subraiyungni thani sumsok khlai kha, chwng Subraiyung chini Kaitor bebak dagima tẃi’-no bacha laiwi choba khlainai. Aboni ulo norok bebakno chobani seng manẃi hachugo kasana bagwi tiyar wngjak.”

⁴²“Phiya Subraiyung ano hai hwnwi sa kha, ‘nwng bórokno sa di, norok saka-o toksaui ta tháng di, chobabo ta nang lai di; tamni hwn ba ang norok bai tong glak; norok kena arirok bai mechenjagwi mano.’ ”

⁴³Subraiyung samano ang norokno a kókrokno samani, phiya ba norok a kóktháirokno khunju kan li ya, phiya ba Subraiyung dagimano khna yaui phan phunugui hachugo kasaui tháng kha.

⁴⁴Aboni ulo hachuk hayungo tongnai Amorsarok piya bodol phaima hai norokni thani phai kha. Bórok norokno Horma jora riphrik kha hachukni ha Idomo norokno mechen kha.

⁴⁵Norok Subraiyungni thani chubachuni bagwi kap lai kha, phiya ba bo khunju kai li ya, khwbo khna li ya.

⁴⁶Sal kolokma chwng Kades-barnea-o ma tong lai kha.