Read Kok Borok UÁINWINI SA PHIMA 10 Bible Online

UÁINWINI SA PHIMA 10 - Kok Borok bible

UÁINWINI SA PHIMA 10

¹“Aphuru khe Subraiyung ano hai hwnwi sa kha, ‘Nwng swkangni hai kheno holong tankhugwi lapnwi tubu-ui ani thani hachuk saka-o kasaui phai di tei buphangni kaisa bokhok snam di.

²Hakhe ang a holong lapnwi-o nwng bai swbaijakmani swkangni a holong lapnwi-o swijak tongmani a kókrokno swinai, nwng abono a bokhokhogo ton di.’

³“Hakhe, ang akaia buphangni khungsa bokhok snam kha tei swkangni hai kheno holong lapnwi tankhugwi a holong lapnwino yago tlangwi hachugo kasaui tháng kha.

⁴Hakhe Subraiyung swkango tongma hai kheno a holong bwlap lapnwi-o swi kha, kuthum laimani a salo hór bisingo tongwi dagimung kaichi norokno sakhlaimani abo swkangni swima tẃi kheno a holong lapnwi-o swiwi Subraiyung abórokno ano rw kha.

⁵Ulo ang kiphilwi hachukni ongkhorwi phaiwi ang snammani a holong lapnwino bokhogo ton kha; Subraiyung bai ang dagijakma tẃi’-no a holong lepnwi tabuk jora tẃi abo aro tong kho.”

⁶(Israilrok Birot-Benejakanni simi lam rwui Mosera-o tháng kha. Aro Aron thwi kha tei aro’-no bono phob kha. Bini yakchu-o bwsla Eliasar ochai wng kha.

⁷Oroni simi bórok Gudgoda jora tháng kha; Gudgodani simi Jotbatha-o sógwi kha, abo twima twisa bai kupulung.

⁸A jora-o Subraiyungni swmai bokhokno tẃinani bagwi tei Subraiyungni bwskango bachaui Subraiyungni samung tangnani tei hamari rwnani bagwi Lebi bosongno khak kha, abo tabuk jora tongo.

⁹Aboni bagwi Lebirok bini takhukrok bai baksa manthai manna kwrwi. Subraiyung norokni Kaitor norokno swmai tangwi sama haino Subraiyung se bini manthai banta.)

¹⁰“Ang swkangni hai kheno tei nokha sal brwichi, hor brwichi hathái-o tongbu kha; aphurubo Subraiyung ani koimano tei uáisa khna phi kha tei Subraiyung norokno sokomor li ya.

¹¹Ulo Subraiyung ano hai hwnwi sa kha, ‘Bacha di, bororokni bwskango thángnani bagwi lam rw di. Ang rwnani bagwi bórokni chuchusongni thani kók rwmani a ha-o bórok habwi abono yago na thung.’

¹²“Hakhe o Israil, Subraiyung norokni Kaitor norokni thani tamo nai? Norok Subraiyung nini Kaitorno kiri di, bini lama-o him di tei bono hamjak di tei norokni bebak bwkha bai tei uansukma bai Subraiyung norokni Kaitorno mon di.

¹³Tei tini ang norokni hamarini bagwi Subraiyung norokni Kaitor dagimung rwmano tei raidarokno tẃinani bagwi norokno rw kha.

¹⁴Nahar di, chuknoha tei chuknohani, swngcharni bebak manwi Subraiyung norokni Kaitorni máng se,

¹⁵hai phano norokni chuchusongno simi se Subraiyung bwkha rwui hamjago tei bórokni yagulo tabuk jorabo, bórokni bosongni bagwi aswk bororokni berebo norokno chong kha.

¹⁶Aboni bagwi norok sak sakni bwkhani sakurno ra si di tei aswk kók khna ya ta wng si di.

¹⁷Tamni hwn khe Subraiyung norokni Kaitorno eba mwtairokni Kaitor tei subrairoknibo Subraiyung, bo’-no kotor kwplai, phan gwnang tei Kirimasingcha Kaitor, bo bebakno’-no baksa khe nai-o tei yak bárabo na ya.

¹⁸Bo ma-pha kwrwi bai randijwkrokni sói bujni bagwi bacha-o, buini hani bororokno hamjagwi chámung tei kanmungrok rw-o.

¹⁹Aboni bagwi norok buini hani bororokno hamjak di, tamni hwn ba Ijip ha-o norok sak sakbo buini hani borok’-no wng bu kha.

²⁰Nwng Subraiyung nini Kaitorno kiriui tong di tei bono monwi tong di. Tei bono kwrak khe romwi tong di, bini bumung bai simi se swmai tang di.

²¹Bo wng kha norokni lobjaknai; bo’-no norokni Kaitor. Nwng mokol baithang nukmarok, a kotor tei uanamasingcha samungrokbo norokni bagwi khlai kha.

²²Nini chuchusong khoroksnichi simi se Ijip ha-o ongkhorwi thángo, phiya ba tabuk Subraiyung norokni Kaitor norokno nokhani athukiri hai kwbángma khlai kha.