Read Kok Borok UÁINWINI SA PHIMA 11 Bible Online

UÁINWINI SA PHIMA 11 - Kok Borok bible

UÁINWINI SA PHIMA 11

¹“Norok Subraiyung norokni Kaitorno hamjak di tei bo naimani tẃi khe raidarokno, kerongrokno tei dagimarokno tẃi phlai máng tong di.

²Tei tini saui man di, norokni chwrairok bórok nubo nuk li ya tei sibo si ya, Subraiyung norokni Kaitor bai swprakjakmano, tamo khe bini kotor kuar, phankrak yak tei yak pholokmano norok le nuk kha ba ma lonnai,

³tei bini marirok tei Ijip ha-o Ijip hani habugrani bagwi tei bini bebak hani bororokni bagwi khlaijakmarok, bini a bebak samungrok,

⁴tei Ijip hani sengkrakrokno, korairokno tei bórokni malkhungrokno bo tamo khlaimani, bórok norokni uklogo riphrigwi tháng khe twijlang kwchakni twi bai bórokno kobolmarokno nuk kha, hakhe Subraiyung bórokno sokomor kha, tini bórok kwrwi kha.

⁵Tei norok o ha-o sók phaima swkang jora tẃi hasing hapharo norokni bagwi khlaimarokno nuk kha.

⁶Tei bo Rubenni busuk Eliabni bwsla Dathan bai Abiramsongni bagwi tamo khlaijak kha, bahai khe bebak Israilrokni bisingo ha khuaui bórokno, bórokni núkhungrokno, bórokni ríni nokrok bai bebak bórokni mal-matarokno, bebak bórok bai aro tongnai langma gwnangrokno monok bai kha abórokno bórok nuk ya.

⁷Phiya ba, Subraiyung bai khlaijakma bebak kotor samungrok mokol baithang’-no norok le nuk kha.

⁸“Norok phankrak wngwi manna tẃi tei hano yago nana bagwi thángwi tongma hano naui manna bagwi tini ang norokno bebak dagimung rwmarokno tẃi di,

⁹tei Subraiyung norokni chuchusong bai bórokni bosongno hano rwna bagwi swmai tang kha, a ha abuktwi tei piya bwtwi bai yorjak ha.

¹⁰Tamni hwn khe tabuk norok baithangni ha khlaina bagwi habwi tongmani abo norok ongkhorwi phaima a Ijip ha hai ya, aro norok bwchlwi sarwi mui kwthwng kái khe yakung bai twi lu-o.

¹¹Phiya aro abo hai ya, norok baithangni khlaina bagwi Jordan basu-ui thángmani a ha wng kha, hachuk tei harung bai kupulung tei aro nokhani uatwini twi nungnai.

¹²A hani bagwi Subraiyung norokni Kaitor naikolwi tongo. Bisi yaphangni simi bisi páithak jora Subraiyung norokni Kaitorni mokol kai máng tongo tei naikolwi tongo.

¹³“Hakhe ang tini norokno dagimarokno khir khir khlaiwi khna khe norokni bebak bwkha bai uansukma bai Subraiyung norokni Kaitorno hamjagwi bono mon khe,

¹⁴hakhe ang norokni ha-o jora’-ono uatwi rwnai, bisi yaphangni uatwi tei bisi páithakni uatwi rwnai, norokni ha-o uatwi ua rwnai. Abo bai norok sakni bagwi bwthái bwchlwi, angur bwtwi thokrok thumwi mannai.

¹⁵Tei bo norokni mal-matarokni bagwi hapharo jabra achai rwnai, bórok cháui ok kupulung wngnai.

¹⁶Norok hus wng di, wng ya khe norok lam phérwi kubunni mwtairokno monnai tei bórokno khulumnai se.

¹⁷Hakhe Subraiyungni jolima norokni saka-o klainai tei bo nokha kholopnai, omo hai hwn khe uatwi ua glak tei ha-o bwthái bwchlwirok achai glak tei Subraiyung norokno hano rwmani, a ha kahamni norok dakti’-no komorwi thángnai.

¹⁸“Aboni bagwi norok ani bebak kóktháirokno bwkha-o tei uansukma-o chu-ui ton di tei marini bagwi yago khaui ton di tei abórokno kwpalo mari hai khe norokni mokol kwcharo ton di.

¹⁹Tei norok nogo lengla phuru, lama him phuru tei thu phuru tei bacha phuru, a kóktháirokno khursaui sak sakni bwsarokno phrwng di.

²⁰Phiya norokni nok duglamni thonglarogo tei hapma duglamo abono swiwi ton di,

²¹omo hai khe Subraiyung norokni chuchusongno ha rwna hwnwi swmai tangmani, a ha-o norokni umor tei norokni bwsarokni umor ha saka-o nokha tong sakno kwthang tongnai.

²²Tamni hwn ba tumungno norok Ang o bebak dagimarokno rwmano norok saktharwi abo tẃi khe tong khe Subraiyung norokni Kaitorno hamjak khe, bini bebak lama-o him khe tei bini thani bwkha bera súgwi tong khe,

²³hakhe Subraiyung norokni bwskangni a bebak dopharokno rwkhlainai tei norok norokni slái kotor tei phan gwnang dopharokno rwkhlaiwi rohornai.

²⁴Bebak norokni yapri káma ha abo norokni wngnai; norokni hani ari amchoi hasing hapharni simi Lebanon jora tei twima khe twima Uphratisni simi salthángbai twijlang jora.

²⁵Norokni bwskango khoroksa phano bachaui man glak; bo swmai tangmani haino norok yapri berama a harogo Subraiyung norokni Kaitor bebak bororokno norokno kiri rw bainai.

²⁶“Nai di, ang tini norokni bwskango hamari bai sraimungno ton kha:

²⁷Tumungno Subraiyung norokni Kaitorni a bebak dagimungrokno ang norokno rwmano norok khna khe hamari mannai.

²⁸Phiya ba, Subraiyung norokni Kaitorni dagimungrokno khna ya hwn khe tei ang tini norokno dagimungrokni lamano yakarwi norok sini ya kubun mwtairokno rwkthar khe, swraimung nangnai.

²⁹Phiya Subraiyung norokni Kaitor norok hapna naiwi tongma a ha-o habwi phuru khe, aphuru nwng hachuk Gerisimo a hamarino tei hachuk Ebalo khe a sraimungno ton di.

³⁰Abórok wng kha Jordanni ayang nar, lamani salthángbai kisa kwchal, salthángma babai Arabani hacher ha-o tongnai Kananrokni ha-o, Gilgalni bwskango Moreni uk bwlwng gana ya diba?

³¹Tamni hwn khe Subraiyung norokni Kaitor norokno hano rw kha, a hano nana bagwi norok aro habwina bagwi Jordan basu-ui ma tháng anw tei aro tongwi anw.

³²Tei tini ang norokni bwskango kerong tei dagimungrokno ton kha, abórokno norok bebakno saktharwi tẃiwi tong di.