Read Kok Borok UÁINWINI SA PHIMA 12 Bible Online

UÁINWINI SA PHIMA 12 - Kok Borok bible

UÁINWINI SA PHIMA 12

¹“Nini chuchusongni Subraiyung Kaitor nini bagwi nono ha nanani bagwi rw kha, a ha-o o raidarokno tei dagimungrok o swngcharo kwthang tong sak saktharwi tẃiwi ma tongnai.

²Norok rwkhlaiwi rohornanai tongmani a dopharok khulummani mwtairokno, hachuk sakani háyárokno, hatháirogo tei buphang-uáphangrokni saklomni háyárokno swbai súgwi pái di,

³norok bórokni mwtaini háyárokno thonglarokno swbaiwi pái di, abórokni thongrokno Aserimni háyárokno hóro sógwi khibi di; bórokni takjak mwtairokno tanwi khibi di, aroni bórokni bumungrokno sokomorwi khibi di.

⁴Norok Subraiyung norokni Kaitorno bórok khulum tẃi ta khulum di.

⁵Phiya ba Subraiyung norokni Kaitorni bumungno songchana bagwi bebak bosongrokni bisingo tongthai chong anw, o tongthaino norok naituk di. Norok arono ma thángnai.

⁶Tei arono norokni sógwi yapharmarokno tei ratharmungrokno, norokni chi-o kaisa rwmano, norokni haino yapharmarokno, norokni chakmarokno, muchung tẃi yapharmarokno, norokni mal-matarokni swkangni bwsarokno aro tubu di.

⁷Tei norokni Subraiyung norokni Kaitorni bwskango chá di, norok tei norokni núkhungni bororok, abo bebak Subraiyung norokni Kaitor hamari rwmani tei norokni samung khlai manmani hwnwi tongthok lai di.

⁸Tini chwng oro samung klaima tẃi’-no, norok abo hai ta khlai di. Tabuk jora norok chajakma tẃi’-no suri laiwi tongo.

⁹Tamni hwn khe Subraiyung norokni Kaitor norokno kwchang kwchang khe tongnani bagwi rwna hwnmani a ha-o tabukbo sógwi ya kho.

¹⁰Phiya ba norok Jordan basu-ui Subraiyung norokni Kaitor bai norokni manthai rwjakmani o ha-o tongwi anw, aphuru khe norokno kitingwi tongnai arirokni yakni lengla rwnai tei aphuru kirima kwrwi khe tongwi mannai.

¹¹Aphuru Subraiyung norokni Kaitor sakni bumungni bagwi tongthai chong phuru chong anw, aro-o ang norokno dagimani bebakno ma tubunai; sógwi yapharmarok, ratharmungrok, chi-o kaisa rwmarok, haino yapharmarok, chakmungni yapharmungrokno Subraiyungni thani tubu di.

¹²Tei norok norokni sajwk sajlarokno tẃiwi seleng tei selengjwkrokno tẃiwi tei norokni kamiyungrogo tong bainai Lebirokno tẃiwi Subraiyung norokni Kaitorni bwskango tongthok lai di. Lebirokno khe ha banta rwjak li ya ba.

¹³Hus wng di, norok muchung thanino norok sógwi ta yaphar di.

¹⁴Phiya ba norokni bere kaisa bosongrokni bisingo Subraiyung chongthani-o norokni bebak yapharmungrokno yaphar di tei bebak ang dagima samungrokno khlai di.

¹⁵“Tamo khe, norokni mal-matarokno norok tongmani kamiyungrogo ratharwi aboni bahan cháui mannai. Subraiyung norokno hamari rwma swkno norok chá di. Chámai ya phano eba chámainai phano wng thung mwswi eba moskorong bahanno chá tẃi khe cháui mano.

¹⁶Tamo khe norok thẃi le ta chá di; norok abono twi hai khe ha-o sokorwi khibi di.

¹⁷Norokni bwthái bwchlwirokni, angur bwtwirokni tei thokrokni chi-o kaisa rwmano, mal-matarokni swkangni bwsa, thái swkang tei bwkha chongwi Kaitorno rwna hwnwi chakmarokno, haino yapharmarokno, sak muchungwi yapharma manwirokno, norokni kamiyungrokni bisingo ta chá di.

¹⁸Phiya ba, Subraiyung norokni Kaitor chongthani Subraiyung norokni Kaitorni bwskango norok sajwk sajlarokno tẃi tei nini seleng, selengjwksongrokno tẃiwi tei norokni kamiyungrogo tongnai Lebirok bai khe Subraiyung nini Kaitorni bwskango tongthogwi chá lai di.

¹⁹Hus wng di, norokni ha-o tongsak’-no, Lebirokno ta khibi di.

²⁰“Subraiyung nini Kaitor kók rwma tẃi’-no norokni hani ari amchoi tor anw tei muihan chána bagwi muchung khe, ‘Ang muihan chánai,’ hwnwi sa di, hakhe nwng muchungsak’-no muihan chá di.

²¹Tumungno Subraiyung norokni Kaitor sakni bumung songchana bagwi chongma, abo norok tongma bai hakchal wng khe, hakhe ang sama tẃi’-no, norok Subraiyung bai rwjakma mal-mata bodolni naharwi buthar di tei sak muchungma jora tẃi’-no norokni kamiyung bisingo khe cháui mano.

²²Tei mwswi eba mwswi haino cháui manma haino, abo tẃi kheno chá di, kwthar ya eba kwthar bebaknono chá di.

²³Tamo khe norok thẃi le ta chá di, tamni hwn khe thẃi-o se langma tongo tei norok muihan bai baksa langmano ta chá di.

²⁴Nwng abono ta chá di, twi hai khe ha-o sokorwi khibi di.

²⁵Norokni kahamni bagwi tei norokni yagulo norokni bwsa-bẃtẃiroknibo kahamni bagwino norok omono ta chá di, tamni hwn khe Subraiyung chajakma tẃi’-no norok khlai di.

²⁶Tamo khe kwthar manwirok yapharnarokno tei chagwi yapharnarok tei haino yapharnarok tong khe abórokno Subraiyung chongthani’-ono ma tubunai.

²⁷Tei sógwi yapharmano khe, bahan bai thẃino Subraiyung norokni Kaitorni háyá-o ma rwnai; tei kubun ratharwi yapharmarokni thẃi khe norokni Subraiyung Kaitorni háyáni gana-o ma lunai, phiya norok bahanno khe chá di.

²⁸Tamni hwn khe Subraiyung norokni Kaitorni mokolo chajakmarokno simi se khlai di. Hakhe Norokni tei norokni ulo phainai norokni bwsa-bẃtẃiroknibo kaham wngna bagwi ang tini norokno dagimarokno kaichomwi khna di.

²⁹“Subraiyung norokni Kaitor norokni bwskango dopharokno nor anw tei norok bórokni ha-o hap twtwi wngjak. Tamo khe norok bórokno rwkhlaiwi a ha-o achugwi phuru khe,

³⁰tei norokni bwskango sokomorjagwi pái khe, norok hus wng di, bórokni mwtairokno naitugwi rwgwi naiwi o dopharok bórokni mwtairokno bahai khe mon? hwnwi saui, chwngbo bórok haino khlainai hwnwi lama koróui mano.

³¹Norok Subraiyung norokni Kaitorno abo hai khe ta khulum di, tamni hwn khe bórok sakni mwtairokni bagwi Subraiyung selengjakma samung hamyarok khlaiwi phai kha. Bórok o mwtairokni thani bórokni chwla bwsa tei bwrwi bwsaroknobo hóro sógwi yaphar kha.

³²“Ang norokno bebak dagima haino khlai di; Nwng aro-o tei mungsa swk phano ta thepa di, eba aroni mungsa swk phano ta kháiklai di.