Read Kok Borok UÁINWINI SA PHIMA 13 Bible Online

UÁINWINI SA PHIMA 13 - Kok Borok bible

UÁINWINI SA PHIMA 13

¹“Tumungno norokni bere khoroksa swk diyari bacha khe eba imang nuknai bachaui phaiwi norokni bagwi mungsa swk mari eba uanamasingcha nukmungni kókno sa phai khe,

²tei o mari eba uanamasingcha nukma abo na phano nang khe, norok sini ya kubun mwtairokno tẃiwi norokno lama koró rwui khulum rwui tei mon rwuibo mano,

³norok o diyarirokni eba imang nugwi kók sanairokni kókrokno khunju ta kái di; tamni hwn khe, norok bebak bwkha bai tei uansukma bai Subraiyung norokni Kaitorno ha da hamjak súk, chánaima se tei Subraiyung norokni Kaitor norokno amjogwi naima se.

⁴Norok Subraiyung norokni Kaitorni yaprino rwk di tei bono kiriui tong di, bini dagimarokno tẃi tong di; tei bini khorangno khna di, bono mon di tei bini thani bwkha bera súk di.

⁵Tei o diyari eba imangni kók sanai khe butharjaknai, tamni hwn khe Subraiyung norokni Kaitor Ijip hani norokno seleng khatiui ma tongma hani tikhlaiwi tubu kha. Bórok norokno norokni Subraiyung norokni Kaitorni dagima lamani uphil rwna nai kha. Norokni bisingni hamya tongmarokno ma se ma khibinai.

⁶“Tumungno norokni takhuk phano, nwmani bwsla eba nwphani bwsla phano, ok kaisa achai lainai takhuk phano, eba nwsla phano, nwsajwk phano eba nini khájani hik phano eba nini khásuksa kiching phano, norokno sereksa khe phaiwi phai di chwng thángwi kubunni mwtairokno mon lai anw hwnwi saui mano, norokbo a mwtairokno sini ya tei norokni chuchusongbo sini ya.

⁷Norokno kitingwi tongnai bororokni mwtairok, norokni samo tongnairokni eba hakchalo tongnairokni phano eba ha yaphang eba páithakni phano wng thung,

⁸bórokno tẃiwi o kók sa khe, nwng o borokni kókno bwkha ta rw di, bini kókno khunju ta kái di, bono nugwi ta khairok di, bono ta yakar di tei bórokno ta kati rw di.

⁹Norok bórokno ma se ma butharnai; bórokno butharnani bagwi nwngno swkang bini saka yak ma rw granai, aboni ulo bebak bororok yak rw thung.

¹⁰Bórokno holong bai khitarwi buthar di, tamni hwn khe Subraiyung norokni Kaitor norokno ha Ijipni seleng khatiui tongmani phiyógwi tubunaisani lamani phér rwui tlangna nai-o.

¹¹Hakhe Israilni bebak bororok tamo wng kha khna anw; bórok kirijak bainai tei abo hai samung khoroksa phano tei khlai rak glak.

¹²“Subraiyung norokni Kaitor norokno tongnani bagwi kamiyung rwmarogo tong phuru-o norok khnaui phano mano,

¹³khoroksa swk borok hamya norokni dopha bisingni ongkhorwi sakni kamiyungo tongnairokno o kókno saui lam koró rw kha, ‘Phai di chwng kubunni mwtairokno mon lai anw’ a mwtairokno norok si se sini ya.

¹⁴Hakhe norok naitugwi ma nainai, kaham khe bebak cherwi sóino hwnwi si di tei nai di norokni bisingo kubui’-no a selengmasingcha samung wngwi tong kha hwn khe,

¹⁵norok o kamiyungo tongnairokno bebakno seng bai tanwi sokomorwi pái di, bororok bai baksa bebak mal-mataroknobo sokomorwi pái di.

¹⁶Nwng kamiyungni sekproma bebak manwirokno lukurokni lampra kwcharo khe thumwi rúng di tei kamiyungno bebak sekproma a manwirok bai baksa khe sógwi pái bai di. Subraiyung norokni Kaitorni thani sógwi yaphar tẃi khe yaphar di. O kamiyung kusung kusung kwbaino tongnai tei tang phijak glak.

¹⁷Subraiyungni belai jolijakmano holi rwui manna tẃi tei norokni chuchusongni thani kók rwma tẃi norokno hamjaknani tei khairoknani tei norokno kwbángma khlainani bagwi kók rwmarok nangnani bagwi o swraimung nangjak manwirok mungsa phano norokni yago ta tong thung.

¹⁸Tumungno norok Subraiyung norokni Kaitorni khorangno khunju kai khe, ang tini norokno dagima kókno tẃiwi tong anw tei Subraiyung norokni Kaitorni mokolo sói samung khlai anw.