Read Kok Borok UÁINWINI SA PHIMA 14 Bible Online

UÁINWINI SA PHIMA 14 - Kok Borok bible

UÁINWINI SA PHIMA 14

¹“Norok wng kha Subraiyung norokni Kaitorni bwsarok. Norok sak sakni bwsakno ta ra di tei khorok ta siljak di.

²Tamni hwn ba norok wng kha Subraiyung norokni Kaitor baithangni kwthar bororok, o ha saka-o tongnai bebak bororok tei dopharokni bisingo bui bai gwdal ya khe tei Subraiyung bini baithangni borok khlainani bagwi norokno chong kha.

³“Norok selengmasingcha mungsa swkno phano ta chá di.

⁴O mal-matarokno cháui mano; musuk, mera tei pun,

⁵mwswi, naithok mwswi. Mwswijwk, bolongni pun, hachukni pun, mwswi kosom, mosok, hachugo tongnai mera

⁶tei bebak mal-matarokni bere yásku khaknwi tei hanuai uárnai, abórokno norok cháui mano.

⁷Phiya ba hanuai uárnai yásku khaknwirokni bere phano chámai yarok tongo, abórok wng kha, mangingang, khurkus tei hachukni punrok, hanuai uáro hai phano yásku khaknwi ya abórok norokni bagwi kwthar ya.

⁸Phiya uakni yasku le khaknwi, hai phano hanuai uár ya abo norokni bagwi kwthar ya. Norok abórokni bahan ta chá di tei abórokni kwthwirokni mangno ta tang di.

⁹“Twi-o tongnairokni bere norokni chámaimarok khe; á bwkar gwnang tei bophor gwnangrokno cháui mano.

¹⁰Phiya ba á bwkar tei bophor kwrwirokno khe ta chá di, abórok norokni bagwi kwthar ya.

¹¹“Norok bebak kwthar tokrokno cháui mano.

¹²Phiya chámai ya tokrok wng kha omorok: toling, sikruk, sikruk kosom,

¹³toling kwchak, toling kosom, bebak abo hai kubunni tolingrok,

¹⁴juda juda tokharok,

¹⁵Duduma, takhuk mereng, tok mangingang horo birnai tokrok,

¹⁶takhuk bwsa, takhuk kotor tei twini tokrok,

¹⁷hasing hapharni takhuk, sikruk kotor, twini tokharok,[4]

¹⁸boga, bebak á romnai tokrok, khandai gwnang á romnai tokrok,

¹⁹phiya bebak bwkrang gwnang yóngrokbo norokni bagwi kwthar ya, abórokno ta chá di.

²⁰Norok bebak bwkrang gwnang kwthar manwirokno khe cháui mano.

²¹“Ahaino baithang thwinai mal-matarokni bahan ta chá di, nini kamiyungo tongnai buini hani bororokno nwng abono chánani rwui mano, eba buini hani bororokni thani phalwi mano. Tamni hwn ba norok wng kha Subraiyung norokni Kaitorni thani kwthar borok. “Nwng punsano bini bumani abuktwi bai khe ta sóng di.

²²“Norok norokni hukbarni bisi brúm brúmo manmani bwthái bwchlwirokni chi-o kaisa khagwi ton di.

²³Phiya Subraiyung norokni Kaitor sakni bumungni bagwi chong thani-o, aro norokni sak-sakni bwthái bwchlwirokni, angur bwtwi bai thokni banta chini banta kaisa tei mal-matarokni bodolni swkangni bwsarokno bini bwskango tubu-ui chá di, abo hai kheno bebak jora-o Subraiyung sakni Kaitorno bórok rwui tongnano phrwng di.

²⁴A thángnani lama norokni bagwi hakchal wng khe, Subraiyung norokni Kaitor bai ha ari rwjakmarok tong khe (bini mungni bagwi chongmani abo kwchal hwn khe,)

²⁵hakhe norok a manwirokno rukphai bai sláiwi abono yago tlangwi Subraiyungni chongmani aro tháng di.

²⁶Aboni ulo a rukphai bai nwng norokni khá phurma musuk eba mera, eba angur bwtwi eba chuak phano, nwng chána-nungna muchungmani abo páiwi Subraiyung norokni Kaitorni bwskango núkhungni bororok bai khe tongthok lai di.

²⁷Tei norokni kamiyung bisingo tongnai Lebisongno ta khibi di, tamni hwn ba bórokni le banta kwrwi ba sak sakni hwnwibo mungsa banta kwrwi.

²⁸“Nok bisik tham brúmni páithago nwng a bisini manmani bebak bwthái bwchlwini chi-o kaisa thumwi norokni kamiyung bisingo ton di.

²⁹Hakhe Lebirokni kók (tamni hwn khe bórok norok bai baksa banta bo kwrwi ba) phatarni bororok, buma bupha kwrwirok, randijwkrok, norokni kamiyungo tongnairok phaiwi cháui ok supung anw; abo hai kheno Subraiyung norokni Kaitor norokni yakni bebak samungo hamari rwnai.