Read Kok Borok UÁINWINI SA PHIMA 15 Bible Online

UÁINWINI SA PHIMA 15 - Kok Borok bible

UÁINWINI SA PHIMA 15

¹“Norok bebak nokha bisisnini páithago lakairokno yakarwi ma rwnai.”

²O lakai yakarmani raida khe omo hai, bebak sakni Israil borokno lakai rw khe, bo manthai lakaino ma yakarnai. Bo sakni Israilrokni eba bini takhukni thani lakaino ta na thung, tamni hwn ba Subraiyung lakai yakarnanino sakhlaiwi rw kha.

³Phiya ba norok buini hani borokrokni thani lakai yakar ya wngwi mano tei norokni takhukni thani lakai rwmarokno le ta na di.

⁴Subraiyung norokni Kaitor norokno rwmani ha-o norokno hamari rwnai. Norokni bere khoroksa phano bigra tong glak,

⁵tumungno norok Subraiyung Kaitorni kók khnaui bini dagima tẃi tong khe.

⁶Tamni hwn ba, Subraiyung norokni Kaitor norokno hamari rw khe, bo norokno swmai tangwi kók rwma hai kheno norok kwbángma dopharokno lakai rwnai, phiya ba norok khe lakai na glak; tei kwbángma dopharokno norok tẃidulnai, phiya ba bórok bai norok tẃiduljak glak.

⁷“Subraiyung norokni Kaitor norokno rwna naimani a ha-o, norokni bisingni a kamiyungo tongnai borok khoroksa swk biyalo klai khe norokni bwkhano kwrak ta khlai di, eba norokni yapha ta mochom di.”

⁸Hai wng yaui norokni yapha se ma phiyoknai tei bwkha muchungwi se yak phologwi bini nangma swkno bono lakai rw di.

⁹Hus wng di, lakai yakarma bisi sampha kha hwnwi lakai rw ya ta wng di. Abo hai hamya uansukma norokni bwkha-o ta ka thung. Norok lakai rwna soi ya hwn khe bórok norokno kebengwi Subraiyungni thani kap anw, hakhe norok cha ya khlaima klai anw.

¹⁰Norok bórokno yak kuar khe tei bwkha srai-srai khe rw di, hakhe aboni bagwi Subraiyung norokni Kaitor norokni bebak samungo norokno hamari rwnai.

¹¹Tamni hwn ba Israilrok norokni ha-o bigrarok tei yak chúk yarok tongnai, aboni bagwi ang dagi-o bwkha kuar wng di.

¹²“Khoroksa swk Israil chwla phano eba bwrwi phano wng thung norokni thani phaljak khe tei nokha bisidok jora norokni seleng khati khe, bono nokha bisisni-o norok phiyógwi rwui rohor di.

¹³Tei norok phiyógwi rohor phuru bórokno yak bukcha khe rwui ta rohor di.”

¹⁴Subraiyung norokno merarok, maibar-khulbar tei angur bwtwi rwui hamari rwmarokno bwkha kuar khe bórokno rw di.

¹⁵Tei muitu narwk di norokbo salsa Ijip ha-o seleng wngwi ma tongbu kha tei Subraiyung norokni Kaitor norokno phiyók kha, aboni bagwino tini ang omono dagi-o.

¹⁶Tamo khe norokni seleng thángna soi ya wngwi mano, bo norokno tei norokni núkhungni bororokno hamjagwi mano tei bwkha kochomwi mano.

¹⁷Hakhe nwng bono dugar tẃi tlangwi bini khunju phugwi rw di, aphuruni simi bo nini seleng wng súk sinai tei selengjwkni bagwibo abo haino khlai di.

¹⁸Nokha bisidok jora bo nini thani mulani yagulo tang tẃi selengni samung haino khlai kha hwnwi khá ta ka di, aboni bagwi Subraiyung norokni Kaitor nini bebak samungo nono hamari rwnai.

¹⁹“Norok norokni mal-mata bodolni swkang achainai bebak bwsa chwlano Subraiyung nini Kaitorni bagwi khagwi kwthar khlai di, norok musukrokni swkangni achaima bwsa bai mungsa samung phano ta khlai di tei norokni swkang achaima mera bwsani buikhumu ta ra di.”

²⁰Subraiyung chong thani-o, norok tei norokni núkhungni bororok Subraiyung norokni Kaitorni bwskango bisi brúm abono chá lai di.

²¹Tumungno abo mungsa swk derajak tong khe, abo khora, eba mokol nuk ya hwn khe, norok abono Subraiyung norokni Kaitorni thani ta rathar di.

²²Sakni kamiyungo norok kwthar tei kwthar yano cháui mano, mwswi eba mosokno cháma hai khe cháui mano.

²³Hai phano norok thẃi le ta chá di, norok thẃirokno twi hai khe ha-o lukhlaiwi rw di.