Read Kok Borok UÁINWINI SA PHIMA 16 Bible Online

UÁINWINI SA PHIMA 16 - Kok Borok bible

UÁINWINI SA PHIMA 16

¹“Norok Abib talno bórom khlai di, Subraiyung norokni Kaitorno bórom khlaimani bising tẃi yókma terno khlai di; tamni hwn ba Abib talo Subraiyung nini Kaitor norokno hórni bisingni Ijip hani phiyógwi tubu kha.

²Subraiyung sakni bumung lobjakna bagwi chong thani, Subraiyung norokni Kaitorni thani mal-mata bodolni mera eba pun phano masa tlangwi yókma terni ratharmung ratharwi yapharwi di.”

³Norok abo bai chuan dalokjak auang ta chá di; tamni hwn khe norok belai dora-dukhu khe ha Ijipni ongkhorwi phaimani, aboni bagwi nokha salsni jora tẃi a ratharwi yapharmani bai chuan kwrwi auang bángla, o auanno dukhuni auang hwnjago, abo bai norok Ijip hani ongkhorwi phaimani kókrokno thangsung jora muitu tongnai.

⁴Nokha salsni jora tẃi amchoi-o chuan ta nuk thung; tei swkangni salni sanja jora-o norok ratharwi yapharma bahanno hor aiwi phung jora ta tong rwk thung.

⁵“Subraiyung norokni Kaitor norokno kamiyungrok rwmani a khungsa kamiyungo phano yókma terni ratharmung ratharwi man glak,

⁶tei Subraiyung norokni Kaitor sakni mung lobjakna bagwi chongma chongthaino karwi kubunno ratharwi man glak. A chongjak thai’-ono norok sal hap khe sanja-o yókma terni ratharmung ma yapharnai, ha Ijipni ongkhorwi phaimani terno khlai di.”

⁷Tei Subraiyung norokni Kaitor chongma-o abono sóngwi chá di. phungo khe norok sakni ríni nogo kiphilwi tháng di.

⁸Norok nokha saldok chuan kwrwi auang chá di tei nokha salsnini salo Subraiyung norokni Kaitorno rwgwi kuthum laimung panda khlai di tei, aphuru norok mungsa samung phano ta khlai di.

⁹“Norok kheto-o bwthái bwchlwi ranani bagwi puila chekhra phnangma salni simi hati barsni lekhana cheng di.

¹⁰Ulo Subraiyung norokni Kaitor bai rwjakma hamarino naiwi khá ka tẃi rwui Subraiyung norokni Kaitorni mungwi hati barsnini ter khlai di.”

¹¹Tei Subraiyung norokni Kaitorni bumung lobjakna bagwi a chong thani-o norok norokni Subraiyung Kaitorni bwskango norok norokni sajwk, sajla, norokni seleng selengjwk, norokni kamiyungni bisingo tongnai Lebisong tei nwng bai tong phainai buini hani borokrok, ma-pha kwrwi, randijwk, bebakno tongthok lai di.

¹²Tei norok muitu narwk di, Ijip ha-o norok seleng wngwi tongbu kha tei bebak raidarokno khir khir khe tẃi di.

¹³“Norok manmani gomrok sibwi pái khe tei angur bwtwirok phereui thum bai khe norok nokha salsnini bagwi Kainok Ter khlai di.

¹⁴Tei a tero norok tei norokni sajwk, sajla, norokni seleng, selengjwkrok, norokni kamiyung bisingo tongnai Lebisong tei nwng bai tong phainai buini bororok, ma-pha kwrwirok tei randijwkrok, o jora-o bebakno tẃiwi tongthok di.

¹⁵Subraiyung chongthani’-ono norok Subraiyung norokni Kaitorni mungwi nokha salsnini ter khlai di; tamni hwn khe, Subraiyung norokni Kaitor norokni bebak bwthái-bumugo tei norokni bebak yak baithang tangmani samungrogo hamari rwnai, aboni bagwi norok tongthok súknai.

¹⁶“Norokni bebak chwlarok bini chongma-o, bisi-o uáitham Subraiyung norokni Kaitor bai ma malainai, auang bánglani tero, hati barsnini ter tei kainok tero khoroksa phano Subraiyungni bwskango yak bukcha ta tháng thung.”

¹⁷Bebak bororok Subraiyung norokni Kaitor bai hamari rwjakma hamarino rwgwi hili tubu-ui phai thung.

¹⁸“Subraiyung norokni Kaitor norokno bebak bosong thwgwi kamiyungrok rwnai, a kamiyung brúmni bagwi buj thumnairok tei naikolnairokno chong di tei bórok sói khe bororokno buj thum anw.”

¹⁹Norok buj cha ya ta khlai di, norok baksano khájani tei baksano khe phikungni ta khlai di; tei yak bára rang ta na di, tamni hwn ba yak bára rang cháma abo sinairokni mokolno nuk ya khlai-o tei cha yano cha rw-o.

²⁰Subraiyung norokni Kaitor rwmani ha-o achukna bagwi tei aro kusung kusung tongwi manna bagwi srai-srai wng di tei bujsóino tẃi di.

²¹“Norok Subraiyung norokni Kaitorni bagwi háyá snammani samo buphangni mungsa phano Asera mwtai ta snam di.”

²²Tei holongni thong phano ta kái di, tamni hwn khe Subraiyung norokni Kaitor naislerjago.