Read Kok Borok UÁINWINI SA PHIMA 17 Bible Online

UÁINWINI SA PHIMA 17 - Kok Borok bible

UÁINWINI SA PHIMA 17

¹“Norok Subraiyung norokni Kaitorni thani khait gwnang tei sak cha ya musuk eba mera ta rathar di; abo Subraiyung norokni Kaitor selengjago.”

²Norokni, Subraiyung norokni Kaitor norokno kamiyung rw anw, aboni khungsa swk kamiyung bisingo chwla eba bwrwi phano Subraiyung norokni Kaitorni mokolo cha ya khlai khe tei bini swmaino swbainai manjak khe,

³kubun mwtairokno monwi khe tei ang ta khulum di hwnwi dagimarokno norwi bórok salno eba talno tei nokhani athukirirokno khulum khe,

⁴abórok norokno sajak kha hwn khe tei norok abono khna khe, hakhe norok kaham khe kaichomwi nai di tei abo kubui tei Israilrokni bisingo sói sóino abo hai selengmasingcha samungrok wngwi tongo hwn khe,

⁵hakhe norok a samung hamya khlainai chwla eba bwrwino kamiyung duglamo tikhlaiwi tubu di, norok bono holong khitarwi buthar di.

⁶Butharnani hwn khe khoroknwi eba khorokthamni bororok sói nukmani kók sama tháisa wngna nangnai; khoroksa susukni kók bai bono butharwi man glak.

⁷Bono butharna bagwi khe swkang a nukmani kókno sanairok se bini saka yak ma rw granai, aboni ulo khe bebak bororok bini saka-o yak rw thung. Norokni bisingni hamyarokno ma khibinai.

⁸Tumungno borok butharmani eba tongmung derama eba bu laimano tẃiwi khoroknwini uálaimungrokno tẃiwi buj thumnani tukjak khe nwng Subraiyung norokni Kaitor chongma-o tháng di,

⁹tei a jora-o bujni bagwi chongjak ochairokni thani tháng di, bórokno’-no a bujno sakhlaiwi rw di.

¹⁰Aboni ulo Subraiyung chongmani aro tongwi’-no bórok tamo khlainai sakhlai anw, nwng a sakhlaijakma tẃi’-no samungbo khlai di. Bórok nono dagimarokno saktharwi khlai di.

¹¹Bórok kerongni gujokrok swbaiwi sukhrubwi saui khlai di hwnwi sakhlaimano bebakno ma khlainai’-no tei bórok norokno sakhlaimani aroni ayang uyang ta wng di, yagra eba yaksi phano ta phér di.

¹²Tei borok khoroksa swk Subraiyung norokni Kaitorni samungni bagwi tei bujni bagwi chongjak ochaini kók khunju kaina nai ya hwn khe a borok ma thwinai, hakhe norok Israilrokni bisingni hamyano ma khibinai.

¹³Abo hai khe bebak bororok khnaui kirijak bai anw tei abo hai samung khlai rak glak.

¹⁴“Subraiyung norokni Kaitor norokno rwna hwnmani a ha-o sók phai khe, norok abono yago naui sakni ha khlaiwi aro achugwi anw tei norok hai hwnwi sa anw, ‘Ano kitingwi tongnai bebak dopharokni hai kheno angbo ani bagwi bugra khoroksa chong anw.’

¹⁵Aphuru Subraiyung norokni Kaitor chongmani a borokno norok norokni habugra chongwi mano. Norokni dophani bisingo khoroksa swkno norokni bagwi habugra chong di. Norok buini hani bororokno sakni bagwi habugra chongwi man glak.

¹⁶Phiya a habugra sakni bagwi teibo kwbángma korairok báng rwna ta nai thung tei korai báng rwnani bagwi tei uáisa ha Ijibo kiphilwi ta tháng thung. Tamni hwn khe Subraiyung norokno ‘tabukni simi norok a lama tẃi ta tháng phi di’ hwnwi sa kha.

¹⁷Phiya bórok hik kwbáng ta na thung, abo bai bini bwkha phérnai. Tei sakni bagwi rukphai eba rangchakrok kwbángma ta aji thung.

¹⁸Bo bugrani achukthayungo achuk phuru khe bini bagwi ochai Lebirok bai swijak kerongni bijap kangsa bini thani tongna nangnai.

¹⁹Abo bini thani tongnai tei bini thangsungobo abono porinai, abo tẃi kheno bo Subraiyung bini Kaitorno kiriui tongnano tei bini bebak kókthái tei raidarokno tei dagimarokno tẃiwi khir-khir khe srwngwi mannai,

²⁰tei sak sakno bini takhuksongrokni slái kaham kuk hwnwi ta uansuk thung, kerong rwjakmani aboni yaksi eba yagra ta phér thung. Abo hai kheno bo tei bini bosongrok Israil ha-o bisi dwgwi bugra cháui thángwi mannai.