Read Kok Borok UÁINWINI SA PHIMA 18 Bible Online

UÁINWINI SA PHIMA 18 - Kok Borok bible

UÁINWINI SA PHIMA 18

¹“Ochairok kók khe Lebirok, bebak Lebini bosong, Israilrok bai baksa bórokni banta eba ha manthai kwrwi. Bórok Subraiyungni thani hóro sógwi yapharmarok simi se bórokni manthai banta, abo bai se bórok cháui ma tongnai.

²Bórok sakni takhuksongrok bai baksa mungsa manthai bantarok man glak; bo bórokno swmai tangwi kók rwmani haino, Subraiyungno bórokni manthai.

³“Tei bororokni thani ochairokni manthairok wng kha omo tẃi: Musuk eba mera ratharwi yapharmarokni bangora, khangarni babainwi tei bohok bisingni bebak.

⁴Norok norokni bwthái bwchlwirokni, angur bwtwi tei thok tei puilani pun merani buikhumurok bórokno ma rwnai.

⁵Tamni hwn ba, Subraiyungni mungwi sal brúm brúm nangma samungrogo bachanani bagwi Subraiyung norokni Kaitor norokni bosongrokni bere bórokno tei, bórokni bwsarokno mol brúm brúmni bagwi chong kha.

⁶“Phiya tumungno khoroksa swk Lebi Israilrokni kamiyung khungsa swkni tei kwrẃngsa-o tháng khe tei bo bini bwkha-o uansuk súgwi Subraiyung chongma-o phai khe,

⁷bo’-bo tei kubun Lebirok Subraiyungni bwskango monnani bachama hai kheno, Subraiyung bini Kaitorni mungwi samung tangwi mannai.

⁸Bo’-bo chámani banta baksa kheno mannai, abono karwi bo bini núkhungni manwi phalmani manthai rangrokbo mannai.

⁹“Subraiyung norokni Kaitor norokno rwna hwnmani a ha-o habwi khe, norok aroni dopharokni selengmasingcha samung khlaima hai samungrokno ta khlai di.

¹⁰Norokni bere khoroksa swk phano sajla eba sajwkno hóro sógwi yapharnairok hai ta tong thung eba yapha naiwi kaham hamya sanai eba supnai-kháinairok tei swkalrok, beduarok ta wng thung,

¹¹eba danda muanirok tei kwthwirokni pholarok bai kók sa lainairok hai ta tong thung,

¹²tamni hwn khe omo hai khlainairokno Subraiyung selengjago tei a selengmasingcha samungrokni bagwi’-no Subraiyung norokni Kaitor bórokno norokni bwskangni rwkhlainai.

¹³Norok Subraiyung norokni Kaitorni bwskango mungsa khait kwrwi wng di.

¹⁴“Tamni hwn ba norok rwkhlaina naima dopharok bórok wng kha, yapha naiwi kaham hamya sanairok, supnai-kháinairokni kókno khna lai-o, phiya ba Subraiyung norokni Kaitor norokno abórok hai ta khlai di hwno.

¹⁵Subraiyung norokni Kaitor norokni bisingnino norokni bagwi ang hai khoroksa diyari snam anw, bini kókno se norok khna di.

¹⁶“Tamni hwn ba Horebo lukurok kuthum laima salo Subraiyung norokni Kaitorni thani norok hai hwnwi sa lai ya diba, ‘Chwng Subraiyung chini Kaitorni khorangno tei uáisa khna li ya eba omo hai hórjlaibo ta nuk si thung, wng ya khe chwng thwinai.’

¹⁷Aphuru Subraiyung ano hai hwnwi sa kha, ‘Bórok samani abo kahamno sa kha.

¹⁸Ang bórokni bagwi bórokni takhukrokni bisingnino nwng hai khoroksa diyari snam anw; tei bini búkhúgo ani kóktháirok rw anw tei ang dagimarokno bo bórokno sa anw.

¹⁹Tumungno a diyari ani mungwi ani kók samano khna ya hwn khe, bono ang baithang’-no majra rwnai.

²⁰Phiya ba diyari khoroksa swk ang sa di hwnwi dagima kwrwi twtwi ani mungwi kók sa khe, eba kubun mwtairokni mungwi phano kók sa khe, bo butharjakna nangnai.’

²¹Tumungno nwng bwkha bising bising, ‘Bahai khe chwng o kók Subraiyung samani hwnwi sinai?’ hwnwi saui mano, abo khe,

²²tumungno khoroksa swk diyari Subraiyungni mungwi kók sa khe, tamo khe a kók nang ya hwn khe tei kubui wng ya khe, hakhe a kókthái Subraiyung sama ya; a diyari khá chongwi sakni kók samani se, norok aboni bagwi bono kirithai kwrwi.