Read Kok Borok UÁINWINI SA PHIMA 19 Bible Online

UÁINWINI SA PHIMA 19 - Kok Borok bible

UÁINWINI SA PHIMA 19

¹“Subraiyung norokni Kaitor norokno rwna hwnmani a hani dopharokno sokomor bai khe tei norok bórokno rwkhlai bai khe bórokni kamiyungrogo tei nokrogo achugwi phuru khe,

²Subraiyung norokni Kaitor norokni bagwi rwmani a ha-o norokni sakni bagwi khungtham kamiyungrokno khak di,

³Subraiyung norokni Kaitor norokno ha rwna naimani a hano man khe abono bak tham khlaiwi bak di tei aro lamarok snam di, abo tẃi khe borok butharnairok a kamiyungo khárwi man anw.

⁴“Khoroksa swk borok tei khoroksa swkno buthar khe bo aro yóknani bagwi khárwi mano, abórok khe omo hai se; khoroksa swk nok arini borokno jolima kwrwi twtwi tei swkango mungsa hamya chabwi buthar khe bo aro khárwi yógwi mannai.

⁵Rom di, khoroksa swk borok bo sakni nok ari borok bai buphang tanna bagwi bolongo thángwi tanna bagwi rua har phuru yak kepleui nok ari borokni sago nangwi kha tei aro’-no bo thwi kha, abo tẃi hwn khe bo a khungthamni bere khungsa kamiyungo khárwi yógwi man anw,

⁶phiya a khárthai belai kwchal hwn khe, butharnaino thẃini yagul sunani bagwi joliui riphrigwi bono romnai tei butharwi páinai. A borok butharjaknani nang ya, tamni hwn khe, bo swkango bono jolima kwrwi.

⁷Aboni bagwino ang norokno dagi-o, norokni sakni bagwi kamiyung khungthamno khak di.

⁸Tumungno Subraiyung norokni Kaitor norokni hano teibo phuar khe, bo norokni chuchusongno swmai tangma tẃi’-no tei bórokno swmai tang tẃi’-no bebak hano rw khe,

⁹ang tini norokno rwmani bebak dagimarokno khir khir khe khna khe, Subraiyung norokni Kaitorno hamjagwi bini lama tẃi him khe norok o kamiyung khungthamno karwi tei kubunni kamiyung khungthamnobo snam phi di.

¹⁰Subraiyung norokni Kaitor norokni bagwi norokno rwmani a ha-o, borok kahamrokni thẃi ta kochok thung tei norokni saka-o a thẃini marja ta klai thung.

¹¹“Phiya ba khoroksa swk sakni arino joliui bono naichomwi achomsa bú khe tei bo thwi khe, bo a kamiyungrokni bere yókna bagwi khungsa swgo khár khe,

¹²hakhe bini tongthai kamiyungni okrarok borok rohorwi aro bono tubunai tei bono butharnani bagwi thẃini yagul sunai borokni yago yapharjaknai.

¹³Norok bono ta khairok di. Norok Israilrokni bisingni borok kahamni thẃi kochokmano ma khibinai; abo hai khe norokni kaham wngnai.

¹⁴“Subraiyung norokni Kaitor norokni bagwi rwna nai tongma a ha-o swkango tongnairok hani ari-o marini bagwi holong kái kha, norok arini borokni a marini holongno ta se di.

¹⁵“Khoroksa swk mungsa samung sitra eba cha ya, phano khlai kha hwn khe, bini bagwi o khoroksa sakki kók sama bai wng glak, khoroknwi eba khoroktham sakki kók sama bai buj thummano sachu-ui mano.

¹⁶Tumungno tatal sakki, khoroksa swkno haino bachaui bono samung sitrarokni bagwi berwi sa kha hwn khe,

¹⁷a sakki wngnai bai sajaknai khoroknwnwi’-no Subraiyungni bwskango tei a jorani ochairokni tei buj thumnairokni bwskango ma bachauinai.

¹⁸Ulo buj thumnairok saktharwi cherwi nainai tei nai di, a sakki tatal hwn khe tei bo bini takhukni bagwi tatal sakki wngwi tong khe,

¹⁹hakhe bo bini takhukno khlaina muchung tẃi’-no bonobo norok khlai di; hakhe norokni bisingni samung hamyano ma khibinai.

²⁰Abono khnaui tei kubunni bororok kirijagwi norokni bisingo omo hai samung hamya tei khlai glak.

²¹Norok ta khairok di: Langmani bagwi khe langma, mokolni bagwi khe mokol, buani bagwi bua, yakni bagwi yak, yakungni bagwi yakung ma wngnai.