Read Kok Borok UÁINWINI SA PHIMA 2 Bible Online

UÁINWINI SA PHIMA 2 - Kok Borok bible

UÁINWINI SA PHIMA 2

¹“Aboni ulo Subraiyung ano sama tẃi’-no Twijlang Kwchakni lam romwi chwng hasing haphar tẃi lam rw lai kha. Sal kwbángma chwng hachuk Idomo kiting laiwi ma tong lai kha;

²Aboni ulo Subraiyung ano hai hwnwi sa kha,

³‘Chwng oro sal kwbángma romwi o hachukrokno kitingwi himgurung laiwi tong kha tei chwng salsibai bwkhak se thángthai.

⁴Bo o kókrokno norokno hai hwnwi sa di hwnwi dagi kha, norok tei kisa kheno Idomo tongnai norokni sandai Esauni bwsarok tongmani amchoi gana tẃi khe thángnani nang anw tei bórok norokno kirijak anw. Aboni bagwi norok belai khe hus wng di;

⁵phiya norok bórok bai ta nang lai di. Tamni hwn ba ang norokno bórokni hani banta rw glak, yakamsa ha phano rw glak, tamni hwn ba ang hachuk ha Idomno rw kha.

⁶Norok bórokni thani chánani bagwi chámung paiwi chá di; tei nungnani twibo rang bai’-no paiwi nung di.

⁷Tamni hwn ba, Subraiyung norokni Kaitor nini yakni bebak samungo nono hamari rw kha. O kotor hasing hapharo norok himgurungwi tong phurubo naikini khlai kha. A nokha bisi brwichi Subraiyung nini Kaitor nwng bai máng tong kha, nwng mungsa-obo biyal wng buya.’

⁸Hakhe chwng Esauni bosong chini takhuksongrok tongma Seir ha lái tháng kha. Chwng Araba lamano karwi klang kha, abo Elat tei Esiongeber jora kwrwngo. “Hakhe chwng kiphilwi hasing haphar Moabni lam rwui tháng lai kha.

⁹Phiya Subraiyung ano hai hwnwi sa kha, ‘Moabno ta cheklek di tei joli rwui bórok bai choba ta nang lai di, tamni hwn ba bórokni ha bantano ang nono rw glak. Ang Lotni bwsarokno Arno bórokni ha banta hwnwi rw kha.’

¹⁰(Swkango aro Emimrok tong lang kha, bórok Anakimrok hai belai kuchuk kotor kotor gwja, bórok borokbo kwbáng.

¹¹Anakimsong hai bórokbo Rephaim hwnwi sinijago; phiya ba Moabsong khe bórokno Emim hwno.

¹²Horisasongbo swkango Seiro tong kha. Phiya ba Esauni bosongrok bórokno rwkhlaiwi rohor kha tei sokomor súgwi bórokni a tongthai-o tong lai kha. Israilrokno Subraiyung na di hwnwi rwmani hano khlai tẃi’-no bórokbo a hano abo haino khlai kha.)

¹³‘Tabuk norok bacha di, Jeredni twisani harungno lái si di.’ Hakhe chwng Jered twisani harung basu-ui tháng lai kha.

¹⁴Tei Kades-barneani simi lam rwui Jered harung basu ya sak jora aro nokha bisi thamchichar ká kha; Subraiyung bórokni bagwi swmai tangma tẃi’-no bebak bathamni sengkrakrok komor bai kha.

¹⁵Bo bórokno bebak pái súgwi sokomor bai ya sakno Subraiyung bórokno kebengwi tong kha.

¹⁶“Chobani bebak choba nang lainai sengkrakrok pái súgwi thwi bai khe,

¹⁷Subraiyung ano hai hwnwi sa kha;

¹⁸‘Tabuk, tini’-no norok Arni lama tẃi Moab amchoino ma láinai,

¹⁹tei norok Ammonsarokni aro sógwi anw, bórokno ta cheklek di eba bórok bai ta nang lai di, tamni hwn ba ang a hano Lotni bwsarokno rw kha.’

²⁰(Abo Rephaimrokni ha hwnwibo sinijago, Rephaimsong swkango aro tongbu kha, phiya ba, Ammonsong khe bórokno Jam-jumim hwnwi ringo.

²¹Bórokbo Anakimsong haino kolok, kotor kotor tei borok kwbángma gwja; phiya ba Subraiyung abórokno Ammonsarokni mokol bwskango’-no sokomor kha tei bórokno rwkhlaiwi bórokni a ha-ono tong lai kha.

²²Bo Seiro tongnai Esauni bwsarokno khlaima haino khlai kha, ulo Horisasongno bórokni bwskangni sokomor kha. Bórok bebakno rwkhlaiwi bórokni tongthai-o tong lai kha, tabuksak jora arono tongwi tong lai kho.

²³Hakhe Abimsong hakchal Gaja kami kwrwngwi tongnairok, Kapthorni Kaphtorimrok, bórokno sokomorwi bórokni tongthai-o tong lai kha.)

²⁴‘Norok bachaui, lam rw si di, Arnon twima harungno bár di. Nahar di, ang Hesbonni habugra Amorsa Sihonno tei bini hano nini yapha-o yaphar kha. Nwng abórokno yago nana cheng si di tei bo bai choba nang lai si di.

²⁵Tinini simino ang nokha tola-o tongnai bebak dopharokno nono kirijak rwnani bagwi chengnai. Bororok nini kókno khna kheno bwkha sundruma chaui kwlwibra bainai.’

²⁶“Aboni ulo ang Kedemotni hasing hapharo tongwi Hesbonni habugra Sihonni thani tẃitun rwi rohorwi tong kwchangni kók kwchárwi sa hor kha.

²⁷‘Nini hani kwchar tẃi khe ano lái rw di, ang lama tẃi simi se láiwi thángnai, ang yagra eba yaksi babai phér glak.

²⁸Nwng ano chánani bagwi rang bai chámung phal di, nungna bagwi twibo rang bai’-no phal di. Lama tẃi yakung bai himwi simi thángna bagwi rw ja di.

²⁹Chini Kaitor Subraiyung chwngno ha rwna hwnwi kók rwmani, Jordan basu-ui sógwi ya sak, Seiro tongnai Esauni bwsarok tei Aro tongnai Moabsong ani bagwi abo haino khlai kha.’

³⁰Tamo khe Hesbonni habugra Sihon bini ayang tẃi chwngno láina rw li ya. Tamo khe Subraiyung nini Kaitor bono nini yago rwnani bagwi bini bwkhano kwrak khlai kha tei tabuk khlai tongmani bini bwkhano buj tháisa khlai kha.

³¹Subraiyung ano hai hwnwi sa kha, ‘Naisik di, ang Sihon tei bini hano nono rwnani cheng kha. Tabuk nwng mechenna cheng si di tei bini hano nini yago na si di.’

³²Aphuru Sihon tei bini bebak bororok ongkhorwi phaiwi Jahaso chwng bai choba nang phai kha.

³³Subraiyung chini Kaitor bono chini yago yaphar kha; tei chwng bono bini bwsarokno tei bini bebak bororokno mechen súk kha.

³⁴Aphuru chwng bini bebak kamiyungrokno yapha-o chop kha tei aroni chwlarokno, bwrwirokno, chwrairokno khobwi bebak bororokno pái súgwi sokomor súk bai kha. Chwng mungsano phano narwk li ya.

³⁵Mal-mata tei aroni sekproma manwirok simi chwng sakni bagwi narwk kha.

³⁶Aroerni simi, abo khe Arnon twima rukung jora tei harung bwsateni kamiyungni simi hakchal Giliad jora Subraiyung Kaitor chini yapha-o rwmani harok kaisa phano chini thani kwrak ya.

³⁷Ammonsarokni ha Jabok tei twima rukungni amchoi tei hachuk kamini kamiyungrogo tei Subraiyung chini Kaitor chwngno ta tháng di hwnmarogo simi norok ta tháng di.