Read Kok Borok UÁINWINI SA PHIMA 20 Bible Online

UÁINWINI SA PHIMA 20 - Kok Borok bible

UÁINWINI SA PHIMA 20

¹“Norok norokni arirok bai choba nang laina tháng phuru-o norokni slái kwbángma korairok, chobani malkhungrok tei kwbángma sengkrakrokno nuk khe, abórokno nugwi norok ta kiri di; tamni hwn khe ha Ijipni norokno tikhlaiwi tubunai Subraiyung norokni Kaitor norok bai tongo.

²Phiya norok choba nang lainani swkang ochai phaiwi sengkrak bodolrokno ahai hwnwi ma sanai,

³‘O Israil, khna di! Norok tini norokni arirok bai choba nang lainani bagwi gana-o thángwi tong kha. Bwkha ta bái di, eba ta kiri di, ta kwlwibra di, eba bórokno belai ta kiri di.

⁴Tamni hwn ba, Subraiyung norokni Kaitor se norokno mwthangna bagwi tei norokni wngwi norokni arirok bai choba nang lainani bagwi norok bai baksa khe thángwi tongo.’

⁵“Tangphangrok lukurokno o kókno sa thung, ‘Norokni bere sabo nok kwtal tangwi abono, basibujak ya tong? Bo choba-o thwi khe kubun borok se abono basi anw, aboni bagwi bo bini nogo kiphilwi tháng thung.

⁶Tamni hwn ba sabo angur bari khlaidrop tei bini bwtháirok ma khak yarok da tong tung? Bo choba-o thwi khe kubun borok se aboni swkangni bwtwi ma nung gra anw, aboni bagwi bo bini nogo kiphilwi tháng thung.

⁷Phiya káijakna bagwi kók sẃngjakrok da tong? Bo choba-o thwi khe kubun chwla se a bwrwino káijak anw, aboni bagwi bo bini nogo kiphilwi tháng thung.’

⁸“Tangphang lukurokno teibo kók sa di, ‘Norokni bisingo kirijaknai tei bwkha kebel borok sabo tong? Tong khe bo bini nogo kiphilwi tháng thung, wng ya khe bini bwkha hai bini takhuksongrokni bwkhabo báiwi tháng anw.’

⁹Tangphangrok sengkrakrokno kók saui pái khe, bórok sengkrakrokni saka sengkrak bokhorokno chongnai.

¹⁰“Norok khungsa swk kamiyung bai choba nang lainani bagwi tháng khe, swkang bórok bai kwtha lainani kók sa lai gra di.

¹¹Aro-o bo kwtha laina soiwi nini bagwi lama phiyogwi rw khe, hakhe a kamiyungni bebak borok norokno ma monnai tei nini seleng wng bainai.”

¹²Phiya ba bórok kwtha lainani lon ya hwn khe norok bórok bai choba nang lai di tei norok a kamiyungno gerep di,

¹³tei Subraiyung norokni Kaitor abono norokni yago rw kha hwn khe, norok aroni bebak chwlarokno seng bai tanwi buthar di.

¹⁴Phiya ba bwrwirokno, chwrairokno tei mal-matarokno, kamiyungo tongma bebak manwirok sakni bagwi segwi nama manwi hwnwi’-no yachak di. Tei Subraiyung norokni Kaitor bai arirokni aroni rwjakmani manwirokno norokni sakni samungo thepaui mano.

¹⁵Norok bai kwchalni kamiyungroknobo tei oroni dopharokni ya a kamiyungroknobo haino khlai di.

¹⁶Phiya a dopharokni kamiyungrokno, Subraiyung norokni Kaitor norokno norokni bagwi rw khe a bisingni langma gwnang mungsano phano kwthang ta ton di.

¹⁷Norok Subraiyung norokni Kaitor dagima hai khe’-no, bórokno Hitirokno, Amorsarokno, Kanansarokno, Peressarokno, Hibisarokno tei Jebussarokno’-no sokomor súk di.

¹⁸Hakhe bórokni mwtairokni thani selengmasingcha samungrok khlaimani hai norokno khlaina bagwi phrwng anw tei omo hai khe norokbo Subraiyung norokni Kaitorno kebengwi sumsok khlai anw.

¹⁹Norok kamiyung khungsa swkno yago nana bagwi choba nang laiwi jora kolokma abono gerebwi ton khe, aroni buphangrokno rua bai tanwi ta pái bai di. Norok abórokni bwtháirokno cháui mano, abórokno ta tanphái bai di, abórok ba borok da tamo norokno gerep thani kebengma-o thepajaknai ba?

²⁰Phiya ba, norok bwthái thái ya hwnwi saui manmani buphangrokno simi tanphái bai di, tamo khe norok bai choba nang lainai kamiyungrokno mechenwi man súk ya khe sakni bagwi hapharni buphangrokno gerepna samungni bagwi tanphái di.