Read Kok Borok UÁINWINI SA PHIMA 21 Bible Online

UÁINWINI SA PHIMA 21 - Kok Borok bible

UÁINWINI SA PHIMA 21

¹“Tumungno Subraiyung norokni Kaitor norokno rwna hwnmani hani haphar bukcha-o khoroksa swkni mang kwthwi klaijak man khe tei bono sabo bai ba butharjak kha saui man ya hwn khe,

²hakhe norokni okrarok tei buj thumnairok thángwi, a mang kwthwi tongmani kamiyungrokno su-ui nainai, mang kwthwi tongmani bai bu kamiyung sampha kuk,

³abo hai khe a kwthwi máng bai sampha kuk kamiyungni okrarok uáisabo samungo thepajak ya kho tei horbak ma so ya kho abo hai musuk bwsano ma tubunai.”

⁴Aboni ulo a kamiyungni okrarok, a musuk chasloksano twisa yorjak harung kwrẃngsa-o ma tubunai. A harungo bórok a musukni totra mothorwi khibi di.

⁵Aboni ulo Lebini bwsa ochairok gana-o phainai, tamni hwn khe Subraiyung norokni Kaitor bórokno Subraiyungni mung bai hamari rwna bagwi chong kha tei bórokni bising tẃi’-no bebak kók báng laima tei buthar laimarokni kók sachujaknai.

⁶Aboni ulo mang kwthwi gana kuk kamiyungni bebak okrarok a harungo totra mothorjak musuk chasloksani saka-o bórokni yak sú-ui páinai,

⁷tei bórok sakhlainai; chini yak bai o borokno ma buthar ya tei butharnainobo chwng mokol baithang nuk ya.

⁸O Subraiyung, nwng nini Israil bororokno phiyók kha; bórok kahamni thẃini majrano nini borok Israilrokni bisingo ta ton ja di. Kwrwi borok butharmani cha yarokno ta ton di. Abo bai’-no bórokni a thẃini majrano nakar ja di.

⁹Abo hai khe norokni bisingni borok kahamni thẃi kochokmani cha yano nor di, tamni hwn khe Subraiyungni mokolo chajakma sóino norok khlai di.

¹⁰“Norok norokni arirok bai choba nang lainani tháng khe tei Subraiyung norokni Kaitor bórokno norokni yago yaphar khe tei norok bórokno khaui tlangwi tháng khe,

¹¹tei a khaui tubujaknairokni bere bwrwi naithok nugwi khá phurwi norok hik songna muchung khe,

¹²hakhe nwng bono nogo tubu-ui phai di; tei a bwrwi bini khorokni bwkhnai silwi ma páinai tei yásku ma ranai,

¹³tei bo bini a khaui tubujak phuruni rírokno ma khibiui rwnai tei nini nogo tongwi nokha talsa supungwi bini buma buphani bagwi khá kham thung, aboni ulo nwng bini thani thángwi man anw, nwng bini bwsai wng anw tei bo’-bo nini hik wngnai.”

¹⁴Tei nwng bo bai khá kochom súk ya hwn khe, bo thángna muchung thani’-no bono rwui rohor di; phiya ba rangrok bai bono phalwi man glak, bono selengjwk hai khe tonwi man glak, tamni hwn khe nwng bono lachi rw kha.

¹⁵Rom di, khoroksa swkni hamjakma tei hamjaktha ya bihik khoroknwi tongo, hamjakma tei hamjaktha ya bórok khoroknwini nogo’-no bwsa chwla achai kha tei hamjaktha yani nokni bihikni nokni bwsa okra wng khe,

¹⁶hakhe a borok sakni bwslasongno manthaino banta khlaiwi rw phuru hamjaktha ya hikni bwsa okrano karwi hamjakma hikni bwsano okrani sói manthaino rwui man ya.

¹⁷Phiya ba bo hamjaktha ya hikni nokni bwsano sakra hwnwi sakni bebak tong kwrwini banta kwnwi bono ma rwnai, tamni hwn khe bo bini phan swkangni bwthái sakrani manthai bini’-no wngnai.

¹⁸“Khoroksa swkni bwsa kók na ya tei kebengnai wng khe, ma-phani kók khna ya wng khe tei khoraimani bo sak nang ya wng khe,

¹⁹hakhe bini buma bupha bono romwi kamiyungni okrarokni thani tei bini tongthai kamiyungni duglamo tlangwi thángnai.”

²⁰Tei bórok kamiyungni okrarokno hai hwnwi ma sanai, “Chini o bwsa kók na ya tei kebengwi máng tongo. Bo chini kók khna glak. Bo chábo chákrak tei nubo nungkrak.

²¹Hakhe kamiyungni bebak bororok bono holong khitarwi buthar anw, abo hai khe norokni bisingni hamyano sokomor di, hakhe bebak Israilrok abono khnaui kirijak bai anw.

²²“Khoroksa swk borok butharjakna nangnai majra khlai kha hwn khe tei butharjak kha hwn khe, norok bono buphango khachiui rw khe,

²³bini kwthwi mangno hopung buphang saka-o ta ton di; norok a salo’-no bono phob di, tamni hwn ba buphango khachijaknai borok bo Kaitorni swraimung nangjak. Subraiyung norokni Kaitor norokno rwmani a hano norok ta dera rw di.”