Read Kok Borok UÁINWINI SA PHIMA 24 Bible Online

UÁINWINI SA PHIMA 24 - Kok Borok bible

UÁINWINI SA PHIMA 24

¹“Chwla Khoroksa swk bwrwi khoroksa bai káijakmani ulo bihikni mungsa swk tongmung cha ya nuk khe tei bo a bwrwino kaksen bwlái kangsa swiwi bini yago yapharwi nokni tikhlaiwi rohor rwui mano.

²Hakhe a bwrwi bini nokni thángmani ulo kubun chwlani bihik wngwi mano.”

³Tei a ulni bwsaibo bono hamjak li ya hwn khe tei bini bagwi kaksen bwlái swiwi bini yago yapharwi bini nokni bono tikhlaiwi rohor khe, eba káijaknai a ulni bwsai thwi tháng kha hwn khe,

⁴hakhe bono tikhlaiwi rohornai swkangni a bwsaibo bini deramani bagwi bono tei uáisa káijak phirwi man glak; tamni hwn ba, abo Subraiyungni thani selengmasingcha samung; Subraiyung norokni Kaitor norokni ha wngna bagwi rwnanai tongma a ha-o sumsok ta tubu di.

⁵“Borok khoroksa swk káijakma kwtal hwn khe bono choba-o ta rohor di tei bono mungsa swk kubun samungrok ta ber di. Tamo khe bo nokha bisi kaisa jora tẃi sakni nogo’-no lengla thung, bo káijak khaba bihikno’-no bwkha tongthok rw thung.”

⁶Khoroksa phano khoroksa swkno lakai rw phuru bini mosorok hulmani holongno eba holong bwsano lakaini bagwi manwi ta narwk di. Abo hai khlai khe bini langmano se narwkma klai-o.

⁷“Tumungno borok khoroksa swk Israil bwsarokni bere khoroksa swkno khok khe tei bono nini seleng khlai khe eba seleng wngna bagwi phalwi rohor khe, nwng butharjaknai. Omo hai khe norok norokni bisingni samung sitrani yógwi mannai.”

⁸Nwng bukurni kirimasingcha kwsa manẃi tong khe, Lebi ochairok nono tamo khlai di hwn khir khir khe abo haino khlai di; ang bórokno dagimarokno nwng khir khir khe khnaui tong di.

⁹Ijip hani norok nongkhorwi phaimani jora-o Subraiyung norokni Kaitor lama-o Miriamno tamo khlai kha muitu khe nai di.

¹⁰“Nini nok arini borokno mungsa swk kisa lakai rw khe, nwngbo mungsa swk manwi nono lakaini bagwi manwi rwmano nanani hwnwi bini nok bisingo ta hap di.”

¹¹Nwng phataro’-no bachaui tong di tei lakai nanai borok lakaini manwi tubu-ui nini thani rw phai thung.

¹²Tumungno a borok bigra hwn khe nwng bini lakaini manwino narwgwi aro thu-ui ta ton di.

¹³Saltháng kheno bini lakaini bandar manwino bono kiphilwi rw di, hakhe bo bini sakni rí-chum bai thu-ui nono hamari rwnai tei abo Subraiyung norokni Kaitorni bwskango bujsói tẃinaini samung wngnai.

¹⁴“Norok bigrarokni tei kwrwisarokni mulani rangno ta kwcha rw di, Israilrokno phano wng thung tei norokni kamiyung khungsa swgo tong phainai buini hani borok phano wng thung bórokni manthaino ta kwcha rw di.”

¹⁵Norok bórokni samungni manthaino sal brúmno sal hap ya sini’-no rwui pái di, tamni hwn khe bórok bigra gwjaba samung tangwi se cháui tong lai ja-o; wng ya khe bórok nini cha yani bagwi Subraiyungno nini bagwi khontai rwui kapnai tei aboni bagwi nwng majra klainai.

¹⁶“Bwsarokni cha yani bagwi buma-bupha butharjak glak, eba buma-buphani cha yani bagwi bwsarokno butharwi man ya; bebak borokno sak sakni sumsokni bagwi butharjakna nang anw.”

¹⁷Buini hani borok eba ma-pha kwrwirokni buj thum phuru buj sói khlai ya ta wng di; randijwkrokni rí-chumno lakaini bagwi bini rírokno bandar ta na di.

¹⁸Muitu khlai di, norok ha Ijibo seleng khatibu kha, phiya ba Subraiyung norokni Kaitor norokno aroni phiyók kha; aboni bagwi ang norokno omo hai khlainani bagwi dagi-o.

¹⁹Norok kheto-o norokni bwthái bwchlwi thum phuru mothasa swk pogwi kabujak khe, abono naharna ta tháng phi di, abo buini hani borokni, ma-pha kwrwirokni tei randijwkrokni bagwi tong thung, abo bai Subraiyung norokni Kaitor norokni yakni bebak samungo norokno hamari rwnai.

²⁰“Norok norokni tháistwi bwthái khak phuru khe, aphuru karjakmarokno tei uáisa bedego ta naituk phi di, abo buini hani borok, ma-pha kwrwirok tei randijwkrokni bagwi tong thung.

²¹Tei norokni angur barini angur bwthái khak phuru khakbaimani ulo tei uáisa ta khagwi di, abórok buini hani borok ma-pha kwrwi tei randijwkrokni bagwi tong thung.”

²²Muitu khlai di, norok Ijip ha-o seleng khatibu kha; aboni bagwi ang norokno omo hai khlaina bagwi dagi-o.