Read Kok Borok UÁINWINI SA PHIMA 26 Bible Online

UÁINWINI SA PHIMA 26 - Kok Borok bible

UÁINWINI SA PHIMA 26

¹“Subraiyung norokni Kaitor norokni baithangni bagwi rwna hwnmani a ha-o norok habwi yago naui aro achugwi anw,

²Subraiyung norokni Kaitor norokno rwna hwnmani a ha-o wngmani bebak bwthái bwchlwirokni tháiswkang kisa naui ura-o da di. Hakhe Subraiyung norokni Kaitorno bini mungni bagwi chongma’-ono tlangwi tháng di.

³Norok a jora-o ochaini samungni bagwi chongjakni thani thángwi bono hai hwnwi saui di, ‘Tini ang Subraiyung norokni Kaitor norokni thani sakhlai rw-o. Chini chuchusongno Subraiyung ha rwna hwnwi swmai tangmani a ha-o ang phaiwi sók phai kha.’

⁴Ochai bini yakni a urano naharwi norokni Subraiyung Kaitorni háyá-o ma beranai.

⁵“Nwng Subraiyung norokni Kaitorni bwskango o kókno sakhlai di, ‘Ani apha wng kha khoroksa ayang uyang berainai Aramisani bosongni se tongmani, bo borok kisa tlangwi Ijip ha-o ongkhorwi thángmani buini hani borok wngwi tongwi kha tei aro dopha wngwi kha, kotor wng kha, phan gwnang tei mung gwnang wngwi bacha kha.

⁶Tamo khe Ijipsarok chwngno sátok kha, chwngno dukhu rw kha tei samung kwrak kwrak tang rw kha.

⁷Hakhe chwng Subraiyung chini chuchusongni Kaitorni thani kap lai kha tei Subraiyung chini khorangno khna kha, chini sátokjakmano, chwng panjalwi ma tangmano kusupjakmarokno nuk kha.

⁸Hakhe Subraiyung phankrak yak bai, yaktwk phologwi tei belai kirimasingcha tei podrepot mari tei uanamasingcha soidomni samungrok phunukma bising tẃi ha Ijipni chwngno phiyógwi tubu kha;

⁹tei bo chwngno o ha-o tubu-ui phai kha tei o hano chwngno rw kha, o ha dut bai piya bwtwi bai yorjak.

¹⁰Tabuk o Subraiyung nai di, nwng ano rwmani o hani’-no bwthái, swkangni bwtháirokno ang tubu-ui phai kha,’ hwnwi saui nwng Subraiyung norokni Kaitorni bwskango abono yapharwi norokni Subraiyung Kaitorno khulum di;

¹¹tei Subraiyung nini Kaitor nono tei nini núkhungno rwmani hani bebago’-no hamarirok rwmani, abórok bebakni bagwi nwng tei Lebisong tei nini bisingo tongnai buini hani bororok bai khe norok bebakno tongthok lai di.

¹²“Norok bebak norokni nokha bisik thamni chi-o kaisarokno khaliui tonwi pái anw, a nokha bisik thamni bisi khe chi-o kaisa rwmani bisi, norok abono Lebirokno rw di, buini hani bororokno, ma-pha kwrwirokno tei randijwkrokno abono rw di, abo bai bórok nini kamiyung bisingo cháui khá kochom anw.”

¹³Ulo nwng Subraiyung norokni Kaitorni bwskango o kókno sa di, “Ang ani nokni bebak kwthar manwi tongmarokno Lebino, buini hani bororokno, ma-pha kwrwirokno tei randijwkrokno nwng dagima hai kheno tlangwi rwui kha. Ang nini dagimarokni kókrokno nor li ya tei pogwibo tháng li ya.”

¹⁴Ani khá khammani jora-o ang aroni kwthar manwirokno kisa phano chá ya, ang kwthar ya tong phuru aroni mungsano phano nor ya tei thwinairoknobo oroni kisa phano rw ya. Ang ani Subraiyung Kaitorni khorangno khunju kaichom kha, nwng dagima tẃi’-no ang khlai kha.

¹⁵Nwng chukha-o tongwi nini kwthar tongthaino naikhlai di, nini Israilrokno hamari rw di tei chini chuchusongni thani rwna hwnwi nwng swmai tangmani a dut bai piya bwtwi yorjak hano hamari rw di.

¹⁶“Subraiyung norokni Kaitor tini norokno dagi-o o dagimarokno tei kerongrokno tẃi di; norokni bebak bwkha bai khúk bai tei yak bai omorokno bebakno khir khir khe tẃiwi tong di.

¹⁷Tini norok hai hwnwi sakhlai kha, Subraiyungno norokni Kaitor wngnai tei norok bini lama tẃi him di, bini dagimarokno tei raidarokno tẃi di tei bini khorangno khunju-o kái di.

¹⁸Tei Subraiyungbo tini hai hwnwi sakhlai kha, bo swmai tangma haino norok bini sakni borok tei rangchak-ríchak wng kha tei bini bebak dagimarokno norok khnaui ma tongnai.

¹⁹Tei bo bini snamjak bebak dopharokni bere norokno kotor kwplai lobjaknai, mung kotor tei bórom gwnang khlainai tei bo swmai tangma haino norokno Subraiyung norokni Kaitorni bagwi borok kwthar khlai kha.”