Read Kok Borok UÁINWINI SA PHIMA 27 Bible Online

UÁINWINI SA PHIMA 27 - Kok Borok bible

UÁINWINI SA PHIMA 27

¹Musi tei Israilni okrarok bororokno hai hwnwi dagi kha: “Ang tini norokno dagimarokno bebak’-no tẃiwi tong di.

²Subraiyung norokni Kaitor norokno ha rwna hwnma-o hapna bagwi Jordan twimano basu-ui ayang naro sógwi phuru khe kisa holong kotor kotorno bera di tei abono lepejaknai bai lepe di.

³Tei ayang naro sógwimani ulo Subraiyung norokni chuchusongni Kaitor norokni thani swmai tangwi rwna hwnmani haino dut bai piya bwtwi yorjak hano Subraiyung norokni Kaitor norokno rwna naimani ha-o sógwi khe norok a holongo kerongni bebak kóktháirokno swi di.

⁴Hakhe norok Jordan twima basuma ulo ang norokno dagima hai kheno Ebal hathái-o a bebak holongrokno kái di tei abono lepejaknai bai lepe di.

⁵Tei aro norok Subraiyung norokni Kaitorni bagwi holongni háyá kaisa snam di, snam phuru sorni manwi ma phnang glak.

⁶Norok Subraiyung norokni Kaitorni a háyáno holong ra yaui snam di; tei aboni saka-o Subraiyung norokni Kaitorni bagwi sógwi yaphar di.

⁷Tei khakchangni yapharmung yaphar di tei arono chá lai di tei Subraiyung norokni Kaitorni bwskango tongthok lai di;

⁸tei a holongthai saka-o o kerongrokni bebak kóktháirokno belai srai-srai khe swi di.”

⁹Aboni ulo Musi tei Lebi ochairok bebak Israilrokno hai hwnwi sa kha, “O Israilrok siring siring wng bai di tei khna di! tinini o salo norok Subraiyung norokni Kaitorni borok wng bai kha.

¹⁰Aboni bagwi bini kókno khna di tei tini ang norokno kerong rwmarokno bebakno tẃi lai di.”

¹¹A salo Musi Israilrokno hai hwnwi sa kha,

¹²“Norok Jordan twima basuma ulo bororokno hamari sakhlai phuru khe Simion, Lebi, Juda, Isakar, Josep tei Benjamin bosongrok, Gerisim hathái-o bachaui di.”

¹³Tei swraimung sakhlai phuru khe, Ruben, Gad, Aser, Jebulun, Dan tei Naptali bosongrok Ebal hathái-o bachaui di.

¹⁴Lebisong o kókrokno khorang kotor khe sakhlainai.

¹⁵“ ‘Kaitor holongni eba buphangni tei kubun manwi bai mwtai taknaino tei abono serek-serek khe khulumnaino swrai-o; Subraiyung takjak mwtai khulummano selengjago.’ Hakhe aphuru bebak bororok khúk perwi ‘Amen’ hwnwi hwn lainai.

¹⁶“ ‘Khoroksa swk ma-phano sak nang ya wng khe, bo swraimung nangjak.’ Hakhe aphuru bebak bororok khúk perwi ‘Amen’ hwnwi hwn lainai.

¹⁷“ ‘Khoroksa swk sakni nok arini ha arini marino sénai borok bo swraimung nangjak.’ Hakhe aphuru bebak bororok khúk perwi ‘Amen’ hwnwi hwn lainai.

¹⁸“ ‘Khoroksa swk mokol nuk yano lama koró rw khe bo swraimung nangjak.’ Hakhe aphuru bebak bororok khúk perwi ‘Amen’ hwnwi hwn lainai.

¹⁹“ ‘Khoroksa swk buini hani borokno, ma-pha kwrwirokno eba randijwkrokno buj sói khlai ya khe, bo swraimung nangjak.’ Hakhe aphuru bebak bororok khúk perwi ‘Amen’ hwnwi hwn lainai.

²⁰“ ‘Khoroksa swk buphani bihik bai thunai, bo buphani lachimungno phunukma bagwibo swraimung nangjak.’ Hakhe aphuru bebak bororok khúk perwi ‘Amen’ hwnwi hwn lainai.

²¹“ ‘Khoroksa swk borok mal-matarok bai thunai, bo swraimung nangjak. Hakhe aphuru bebak bororok khúk perwi ‘Amen’ hwnwi hwn lainai.

²²“ ‘Khoroksa swk sakni bukhuk bai, eba buphani bwsajwk phano eba bumani bwsajwk bai thunai borok, bo swraimung nangjak.’ Hakhe aphuru bebak bororok khúk perwi ‘Amen’ hwnwi hwn lainai.

²³“ ‘Khoroksa swk sakni kwrajwk bai thunai borok bo swraimung nangjak.’ Hakhe aphuru bebak bororok khúk perwi ‘Amen’ hwnwi hwn lainai.

²⁴“ ‘Khoroksa swk sakni nok ari borokno tepsa khe butharnai borok, bo swraimung nangjak.’ Hakhe aphuru bebak bororok khúk perwi ‘Amen’ hwnwi hwn lainai.

²⁵“ ‘Khoroksa swk borok kahamno butharna bagwi rang nanai borok, bo swraimung nangjak.’ Hakhe aphuru bebak bororok khúk perwi ‘Amen’ hwnwi hwn lainai.

²⁶“ ‘Khoroksa swk o kerongni bebak kóktháirokno tẃinani bagwi sakthar ya khe, bo swraimung nangjak.’ Hakhe aphuru bebak bororok khúk perwi ‘Amen’ hwnwi hwn lainai.