Read Kok Borok UÁINWINI SA PHIMA 28 Bible Online

UÁINWINI SA PHIMA 28 - Kok Borok bible

UÁINWINI SA PHIMA 28

¹“Tumungno norok Subraiyung norokni Kaitorni kók khna súk khe tei ang tini norokno rwmani dagimarokno bebakno khir-khir khe tẃi khe, Subraiyung norokni Kaitor norokno ha sakani bebak dopharokni slái kuchugo tisanai.

²Tumungno norok Subraiyung norokni Kaitorni kókno khna kha hwn khe, o bebak hamarirok norokni thani sók phainai tei nono tẃiwi tongnai.

³Norok kamiyungo hamari gwnang wngnai tei haba-o bo hamari gwnang wngnai.

⁴Norokni okni bwthái, norokni habani bwthái, norokni mal-matarokni bwthái, norokni musuk-merakrokni bwsarok hamari gwnang wngnai.

⁵Nini ura tei mairung bamtwkrok hamari gwnang wngnai.

⁶Bisingo hapma jora-o tei phataro ongkhorma jora-obo norok hamari gwnang wngnai.

⁷“Norokno kebengwi bachanai norokni arirok bórok norokni bwskango Subraiyung chen rwnai; bórok lama twngsa tẃi norokno kebengwi phainai, phiya ba lama twngsni tẃi bórok norokni bwskangni khárnai.

⁸Subraiyung norokni mayam nogo tei norok yak rwmani a samungrogo hamari rohornai. Norokni Subraiyung Kaitor norokno rwmani a ha-o norokno hamari rwnai.

⁹Tumungno norok norokni Subraiyung Kaitor dagimano tẃi tong khe tei bini lama tẃi him khe, bo swmai tangwi kók rwma hai kheno Subraiyung norokno bini borok kwtharrok snamnai;

¹⁰tei ha sakani bebak bororok norokno Subraiyungni bororok hwnwi ringjakmano nuknai tei bórok norokno kirijak bainai.”

¹¹Norokni chuchusongno rwna hwnwi swmai tangmani a ha-o Subraiyung norokno belai gwnang khlainai norokni okni bwthái, norokni mal-matarokni bwtháirogo tei habani bwtháirogo hamari kupulung khe rwnai.

¹²Subraiyung bini hamarikhokno norokni bagwi phiyogwi rwnai tei norokni bebak samungo hamari rwna bagwi sói jora’-ono norokni ha-o uatwi rwnai: tei norok dopha kwbángmano’-no solok rwnai tei norok khe solok na glak.

¹³Tumungno norokni Subraiyung Kaitor dagimarokno khna di hwnwi tini ang norokno dagimarokno khnaui tẃi khe, Subraiyung norokno bokhorok snamnai, khitung snam glak; norok kuchugo se tongnai, norok hachero nongkhor glak

¹⁴tei tini ang norokno dagima kóktháirokni ayang uyang ta wng di tei kubun mwtairokno monna bagwi yagrabo ta tháng di yaksibo ta tháng di.

¹⁵“Phiya ba, norok Subraiyung norokni Kaitorni kók khna ya hwn khe tei ang tini norokno bebak bini dagimarokno tei raidarok rw kha, abórokno tẃiwi tong ya khe, o bebak swraimungrok norokni thani klainai tei norokno mechennai.”

¹⁶Norok kamiyungo swraimung nangjak wngnai tei haba-obo swraimung nangjak wngnai.

¹⁷Norokni ura tei mairung bamtwkrok swraimung nangjak wngnai.

¹⁸Norokni okni bwthái, norokni habani bwthái tei norokni musukrokni bwsa tei nini pun merarokni bwsarok swraimung nangjak wngnai;

¹⁹bisingo hap phaima jora-o norok swraimung nangjak wngnai tei phataro ongkhorma jora-obo norok swraimung nangjak wngnai.

²⁰“Subraiyung norokni saka-o swraimung, uanama tei bwkha báimarokno norok sokomorjak súk ya sak norok bebak yak rwma a samungrogo rohorwi achomsa khe norokno sokomornai; tamni hwn khe norok bono khibiui bebak samung sitrarokno tang lai kha.

²¹Norok sakni bagwi naharna naiwi tongmani a ha-o norokno sokomor súk bai ya sak Subraiyung norokni thani sitra bokrok rohornai.

²²Subraiyung ram rwnai bemuk bai kulum, kiyórma, belai kutung tei uatwi ua ya, nokbar kotor tei buphangrok mwran rwma bai khe norokno tekto rwnai; komor súk yasakno abórok norokno rwktharnai.

²³Tei norokni bokhorok sakani nokha pitol tei ha khe sor hai wngnai.

²⁴Norok komor súk yasakno Subraiyung ha-o hadlwi tei hasingni uatwi ua rwnai.

²⁵“Subraiyung norokni arirokni bwskango norokno buthar rwnai, norok lama twngsa tẃi bórokno kebengwi tháng khe, lama twngsni tẃi bórokni bwskangni khár anw. Ha sakani bebak ha-ono buini kirimung wngnai.

²⁶Phiya norokni mang kwthwi nokhani tokrokni tei mal-matarokni chámung wngnai; khoroksa phano abórokno nornai tong glak.

²⁷Subraiyung norokno Ijip hani a kula tei solonai kwsa robonnai tei motóknai bothrairok bai sátoknai, a bemukrokni ham phlaiwi man glak.

²⁸Subraiyung norokno kobor khlaiwi, mokol nuk ya khlaiwi, bwkha kwmam rwui sátoknai.

²⁹Sal diborono norok, mokol nuk ya khe mwnago kopromwi beraima hai ma berai anw. Norokni mungsa samung phano cha glak; sal phai kheno sal brúmno norok sekjaknai, khoroksa phano norokno kati rw glak.

³⁰Nini bagwi bwrwi khoroksano kók sẃng anw, phiya kubun chwla se bono tlangwi romphre anw, norok nok tang anw, phiya ba aro-o norok tongwi man glak. Norok angur bari khlai anw phiya ba aboni bwthái ma chá glak.

³¹Norokni musuk norokni bwskango ratharjak anw, phiya norok aboni bahan ma chá glak. Norokni koraichirka norokni bwskango’-no phan khe segwi tlangjak anw, abo norokno kiphilwi rw phirjak glak; norokni mera bodol norokni arirokno rwjaknai tei phiyóknai khoroksa phano tong glak.

³²Norokni bwsla tei bwsajwksong kubunni dopharokni thani rwjak anw; tei sal brúm brúm bórokno naising te naising te norokni mokol ruainai tei norokni yago phan tong glak.

³³Norok sini ya dopha kaisa norokni hapharni bwtháirokno tei norokni kolomtwi bai manmarok cháui páinai tei norokni mungsa tong glak, sal brúm panjalwi sátokjaknai.

³⁴Norok mokol bai nugwi, aswkno kobor chanai.

³⁵Subraiyung norokni yáskú-o, yakungo kula kotor thái rwnai tei yakungni yaphachwlaini simi bokhorok jora ham phlai ya kwsa cha rwui tekto rwnai.

³⁶“Subraiyung norokno tei habugrano buini ha-o tlangwi tháng anw, a ha-o norokbo tei norokni chuchusongrokbo ma tongwi ya kho; norok aro buphangni tei holongni takjak mwtairokno ma monwi anw.

³⁷Tei Subraiyung norokno koproi rwmani a harokni bororok norokni manjakmarokno nugwi kwmam anw; bórok norokno mwnwi lai anw tei kara thwng lai anw.

³⁸Norok bwchlwi kwbángma hapharo tlangwi sarwi anw, phiya ba aroni kisicha se ma ra anw; tamni hwn khe kúkthora cháui páinai.

³⁹Norok angur buphang káiwi abono santiui ton anw; phiya ba bwtháirok ma thum glak tei bwtwibo ma nung glak; tamni hwn khe yóngrok cháui páinai.

⁴⁰Nini hani bebak amchoi-o tháistwi buphang achai-o; phiya ba norok thok man glak, tamni hwn khe tháistwi bwthái kwraiwi páinai.

⁴¹Norokni bwsa chwla tei bwsa bwrwi man anw; phiya ba bórok norokni wng glak; tamni hwn khe bórok choba-o khajagwi tlangjak bai anw.

⁴²Norokni bebak buphang tei bwthái bwchlwirok yóngrok bai cháui páijaknai.

⁴³Norokni bisingo tong phainai buini hani bororok norokni slái sal brúmno cha rwk cha rwk wngnai, yang nwng khe sal brúm kwlwk rwk kwlwk rwk wngnai.

⁴⁴Bo se norokno lakai rwnai phiya ba, norok khe borokno lakai rwnani mungsa tong glak. Páithago khe bórok se norokno tẃidulnai.

⁴⁵O bebak digi-sigirok norokni thani sók phainai tei bórok komor súk ya sak norokno rwktharnai, tamni hwn khe, Subraiyung norokni Kaitorni kókno khna li ya tei bo rwmani kerongrokno tẃi lai li ya.

⁴⁶Omorok bebak nini tei norokni bosongni thani mol brúm brúmo Kaitorni kwmamsingcha mari.

⁴⁷“Tamni hwn khe Subraiyung norokno bebago’-no hamari rw phano; norok bono khá tongthogwi bwkha kuphur khlaiwi mon li ya.

⁴⁸Phiya Subraiyung norokno kebengwi norokni arirokno rohor anw, norok bórokno ma monnai. Norok ok khuinai, twi kangnai tei rí kwrwi wngnai, bebakni’-no biyal ma wngnai. Tei bórok norokno sokomor súk ya sakno norokni gwdna-o sorni horbak bal rwui tonnai.

⁴⁹Subraiyung norokno kebengwi hakchal ha páithakni kaisa dophano toling birwi phaima hai khe norokno choprokna bagwi tubu anw, a dopharokni kókrokno norok buchiui man glak.

⁵⁰A dopha belai bwkha sitra mwkhang kwrak, bo chakrarokno sak nang ya tei chwrairoknobo khairok ya.

⁵¹Tei norok komor súk ya sak bórok norokni mal-matarokni bwsarokno tei norokni hapharni bwthái bwchlwirok cháui páinai; bórok norokno sokomorwi pái ya sak norokni bagwi bwthái bwchlwi, angur bwtwi eba thok, nini musukni bwsarokno eba norokni merani bwsarokno narwk glak.

⁵²Tei norokni bebak ha-o bebak kamiyungrokno tei norok bwkha beramani a kuchuk chokdeual báiwi klai yasak’-no gerebwi tonnai. Subraiyung norokni Kaitor norokno rwmani bebak kamiyungrokno bórok gerebwi tonnai.

⁵³Tei norokni arirok bai norok aswk khe sátokjak anw, a gerebwi tonjak phuru norok Subraiyung norokni Kaitor rwmani sakni okni bwtháino, sajlarokni tei sajwkrokni bahanno chá anw.

⁵⁴Aphuru norokni bere borok kwchang kuk tei bwkha kaham kuk hwnjaknai bórok, sakni takhukno, bini hamjakma hikno tei bini kwthang tongma bwsaroknobo khairok glak;

⁵⁵bo cháui tongmani bini bwsarokni bahanno kisa phano buino rw glak; tamni hwn khe bini aro tei mungsa phano kwrwi kha, gerebwi tonwi tekto rwjak phuru omono ma chá sinai.”

⁵⁶Norokni bere bwkha kaham kuk tei khairoknai bwrwi bo nokni nongkhorwi yakung ha se ká ya bo hai bwrwi se bini hamjakma bwsaino tei bini hamjakma sajla tei sajwkrokno chámung khlainai

⁵⁷tei sakni yakung kongnwini kwchar tẃi ongkhornai okni achaidrop tei sak bámani chwraini saka-o yak rwnai, tamni hwn ba belai biyalni bagwi bo abono huiwi chánai.

⁵⁸“Tumungno norok Subraiyung norokni Kaitorni chẃngsacha tei kwmamsingcha mungno kiriui o bijabo kerongni kókrok swijak tongma khir-khir khe rákhok ya khe,

⁵⁹hakhe Subraiyung norokno tei norokni bosongno sal kolok jora hamya digi-sigirokno rwnai; abo bisi dwgwi tongnai bemuk bai tekto rwnai.

⁶⁰Phiya norok kiriui tongmani Ijip hani bemukrokno norokni thani tubunai, a bemukrok norokni logisong wngwi tongnai.

⁶¹Subraiyung o kerong bijabo swijak ya abo tẃi bebak hamya cha yarok tei tekto norok komorwi tháng ya sak Subraiyung norokni saka-o tubunai.

⁶²Norok nokhani athukiri kwbángma wngma hai norok báng phano kisicha se tong rwk anw, tamni hwn khe norok Subraiyung norokni Kaitorni kók khna li ya.

⁶³Tei Subraiyung norokno hamcha rwna bagwi bwkha tongthokma haino Subraiyung norokno báikhrup rwui tei sokomorwi bo bwkha tongthokjago; tei norok hapna nai tongma a hani norokno phuichaui khibinai.

⁶⁴Hakhe Subraiyung norokno bebak dopharokni bisingo pisa-piring khlai rwnai, ha yaphangni simi páithak jora pinnai. Aro-o norok tei norokni chuchusongbo sini ya buphang tei holongni snamjak mwtairokno khulum lai anw.

⁶⁵Phiya norok a dopharokni bisingo kisa phano tongthokma man glak tei norokni yakungni yapha tolani bagwi lenglathai tong glak. Phiya Subraiyung aro norokno bwkha kwlwi rwnai, mokol siyari wngnai tei bwkha kwbai wngnai.

⁶⁶Phiya norok kwthang da tongno tong ya uana máng tongnai, hor-sal kiriui máng tongnai, ta uana di hwnwi bwkha bacha rwnai khoroksa phano tong glak.

⁶⁷Norok bwkha-o kirima chá anw tei mokol bai kirimasingcha nugwi, aboni bagwi phungo, ‘Buphuru sanja wngnai?’ hwnwi sa anw! tei sanja-o khe ‘Buphuru phung wngnai?’ hwnwi sa anw!

⁶⁸Subraiyung a Ijip hani lama-o rungkotor bai khe norokno tei uáisa tlangwi tháng anw tei a ha-o norok seleng selengjwk hai wngwi sakno arirokni thani phaljakna nang anw, hai phano khoroksa phano norokno painai tong glak.”