Read Kok Borok UÁINWINI SA PHIMA 29 Bible Online

UÁINWINI SA PHIMA 29 - Kok Borok bible

UÁINWINI SA PHIMA 29

¹Subraiyung Horebo swmai tangmano karwi Horebo omo hairok khe Israilrok bai swmai tangna bagwi Musino dagi kha.

²Musi bebak Israilrokno ring kha tei bórokno hai hwnwi sa kha: “Subraiyung Ijip ha-o Pharaono tei bini bebak selengrokno tei bebak ha-o tangma samungrokno norokni mokol bwskango khlaijak kha, abo norok baithang’-no nuk kha.

³A kotor amjokmung, a bebak marirok tei a kotor kotor uanamasingcha soidomni samungrok norok mokol baithang’-no nuk kha.”

⁴Hai phano Subraiyung tabuk sak jora tẃi norokno sinani bagwi bwkha, nuknani bagwi mokol tei khnanani khunju rw ya kho.

⁵Ang nokha bisi brwichi norokno hasing hapharo tẃither kha. Norokni sakni chumma rírok kichik li ya tei norokni yakungni yaklaprokbo cham phlai li ya.

⁶Ang norokni Subraiyung Kaitor hwnwi saui manna bagwi norok rutirok chá li ya tei angur bwtwi eba chuakrokbo nung lai li ya.

⁷Tei norok oro sók phai khe aphuru Hesbonni habugra Sihon tei Basanni habugra Og chwng bai choba nang lainani ongkhorwi phai kha, phiya ba chwng bórokno mechen kha.

⁸Tei Chwng bórokni hano segwi na kha tei a hano Rubensongno, Gadsongno tei Manasesongni khaksa bosongno rwui rw kha.

⁹Aboni bagwino norok yak rwmani bebago’-no samung chanani bagwi o swmaini kóktháirokno bebakno khir-khir khe tẃi di.

¹⁰“Norok bebakno tini Subraiyung norokni Kaitorni bwskango kuthumui bacha phai di, norokni bosongni bokhorokrok, norokni okrarok samung tangnairok tei Israilni chwlarok,

¹¹tei norokni chwrai khonairok, norokni bihiksong tei norokni bathamo tongnai buini hani bororok, buphang philnairok tei norokni twi khóknairokno khobwi;

¹²Subraiyung norokni Kaitor bai swmai tang laina bagwi phai bai di, Subraiyung norokni Kaitor tini norok bai swmai tangnai.

¹³Aboni bagwino bo norokni thani tei norokni chuchusongni thani, Abraham, Isak tei Jakobni thani swmai tangmani haino srai-srai khlaina bagwi norokno tini bini bororok khlainai tei bo norokni Kaitor wngnai,

¹⁴tei ang o swmaino norok bai simino tango abo tẃi hai ya,

¹⁵tini oro chwng bai baksa Subraiyung chini Kaitorni bwskango bachaui tongnairok bai tei chwng bai baksa tini oro kwrwirok baibo tangjago.

¹⁶“Tamni hwn ba chwng Ijip ha-o bahai khe tongbu kha tei dopharokni ha kwchar tẃi bahai khe sók phai kha, abo norok’-no saui manjak.

¹⁷Tei norok bórokni selengmasingcha takjak mwtairokno tei buphangni, holongni, rukphai tei rangchakni takjak mwtairokno nuk kha.”

¹⁸Srai-srai wng di oro chwlarokni bere bwrwirokni bere khoroksa phano Subraiyung chini Kaitorni aroni bwkha phérwi thángwi a dopharokni mwtairokno monna thángnai kwrwi; norokni bere rotomsanai bisni buphang kaisabo kwrwi hwnwi srai-srai wng di.

¹⁹Tei o sraimungni kókno khnaui khoroksa swk phano khá bising bising sakno hambai rwui ta sa thung, ang mungsa wng glak hwnwi kók khna yaui bini muchung tẃi’-no tongnairok kwrwi hwnwi srai-srai wngna nangnai. Omo hai hwn khe kahamnobo tei hamyanobo sokomornai.

²⁰Subraiyung omo hai borokno nakar glak. Phiya Subraiyung bono sokomor súk bai ya sak a borokni saka-o Subraiyungni jolima hór chẃngnai tei a bijabo swijak bebak sraimungrok bini saka-o klainai tei Subraiyung ha sakani bini bumungno hu-ui khibinai.

²¹Subraiyung o kerong bijabo swijak bebak sraimungrokni kókno tẃiwi digi-sigi rwna bagwi bono bebak Israil dopharokni bisingni khaknai.

²²“Tei Subraiyung a ha-o bebak digi-sigi tei hamya tubumano, ulo phainai bosongrok tei norokni ulo achainai norokni bwsarok tei hakchal hani phainai buini hani bororok abono nuk anw.

²³Subraiyung sakphang belai jolima bagwi Sodom tei Gomora, Adma tei Jeboimrokno sokomor tẃi khe, o hani bebak hapharno gwndwk tei, sóm bai khampra rwui páinai tei aro mungsa jabrarok phano achaiwi man glak.”

²⁴Aphuru bórok tei bebak dopharok hai hwnwi sa lai anw, “Subraiyung tamni bagwi ba o hano omo hai khlai kha? Tamni bagwi ba aswk khe jolimano phunuk kha?”

²⁵Aphuru bororok hai hwnwi sa lai anw, “Omo wng kha, bórok bórokni chuchusongno Ijip hani tikhlaiwi tubuma jora-o Subraiyung bórokni Kaitor bórok bai swmai tangma, a swmaino khibima bagwi se bórok manjago.

²⁶Phiya bo uphilwi thángwi kubunni mwtairokno monwi bai kha, bórok a mwtairokno sibo sini ya tei bórokno rwbo rwjak ya.

²⁷Aboni bagwi Subraiyung joliui o bijabo swijak bebak sraimungrokno o ha-o tubu-ui phai kha.

²⁸Hakhe Subraiyung joliui borokni hani phuichaui kubun ha-o rwui rohor kha, abo tinisak jora nugwi tongo.

²⁹“Huijak manwi bebakno Subraiyung chini Kaitorni se, phiya ba phunukjak o kerongrokni bebak kóktháirokno chwngno tei chini bwsarokno kusung kusung tẃinani bagwi rwjak kha.