Read Kok Borok UÁINWINI SA PHIMA 3 Bible Online

UÁINWINI SA PHIMA 3 - Kok Borok bible

UÁINWINI SA PHIMA 3

¹“Aboni ulo chwng kiphilwi lam rwui Basan bwkhak tháng lai kha tei Basanni habugra Og bini bebak sengkrakrokno tẃiwi chwng bai choba nang lainani bagwi Edrei-o phai lai kha.

²Subraiyung ano hai hwnwi sa kha, ‘Nwng bono ta kiri di, tamni hwn khe ang bono tei bebak bini sengkrakrokno, bini hano nini yago yaphar kha. Nwng Hesbono tongnai Amorsarokni habugra Sihonno khlaima hai bonobo abo tẃi’-no khlai di.’

³Hakhe Subraiyung chini Kaitor Basanni habugra Og bai bini bebak sengkrakrokno chini yago yaphar kha. Chwng bórokno khoroksano phano narwk li ya khe swprak kha.

⁴Aphuru chwng bini bebak kamiyungrokno yapha-o chop kha; bórokni yakni kamiyung dok chibo karjak yaui yago najak kha. Argobni bebak amchoi, Basanni habugra Og baithang tongmani habo naharjak bai kha.

⁵Bebak kamiyungrok kuchuk chokdeual tei hap-lamni duglam polaknwi gwnang tei berepjaknairok gwnang, phiya abono karwi kwbángma chokdeual bai khopjak ya kamirokbo tongo.

⁶Chwng Hesbonni habugra Sihonno khlaima hai kheno bórokni bere khoroksa phano tong rwk ya tẃi khe sokomor súk kha, chwla, bwrwi, chwrai khonairokno tei kamiyungo tong bainairokno sokomor bai kha.

⁷Phiya ba bebak mal-matarokno tei sekproui nama manwirokno khe chwng sak sakni bagwi narwk kha.

⁸Aphuru chwng Jordanni salkabai ayang naro tongnai Amorsongni habugra khoroknwini yakni Arnon harungni simi hachuk Harmon jora bebak hano yapha-o na kha.

⁹(Sidonsarok khe hachuk Harmonno Sirion hwno tei Amorsarok khe Senir hwno.)

¹⁰Chwng Giliad bai Basanni bebak haphar milikni bebak kamiyungrokno, Basanni habugra Ogni Saleka tei Edrei kamiyungrokno na bai kha.

¹¹(Tamni hwn ba Rephaimrokni bere Basanni habugra Og simi se tong rwk si-o. Bini thuyam tei sorni[1] thuthai,[2] tabukbo Ammonsarokni Rabba-o tong kho. Abo yak bai su khe kebeng muk 9 kosong khe muk 4 ká-o.)

¹²“Aphuru chwng Areorsongni aroni namani Arnon twi rukungni, Giliad hachukni kosa jora tei aroni kamiyungrokno, ang Rubensongno tei Gaditsongno Aroerni salsibai bwkhakni amchoirokno rwui rw kha.

¹³Giliadrokni khaksa tei Basanni habugra Ogni bebak hano ang Manaseni khaksa bosongrokno rw kha.” (Basan hani Argobni bebak amchoino Rephaimsongni ha hwnwi sinijago.

¹⁴Manaseni bosongni Jair, Argobni bebak amchoi tei Gesursa bai Makatsasongni ari jora bebakno na bai kha; bini bumungno rwgwi Basan hani bumung. Habot-jair hwnwi mung pharjak kha, tabuksak jora tẃi a bumung’-no tong kho.)

¹⁵Ang Makirsongno khe Giliadno rw kha.

¹⁶Tei Giliadni simi harung Arnon jora, harung kwchar tei hakchal Ammonsarokni ha ari twijlang Jabokno ang Ruben bai Gadit bosongrokno rw kha.

¹⁷Tei harung ha Araba, Jordan rukungni ha ari Chineretni simi saltháng phaisingni harep Pisga jora ganani Twijlang kwthwi jora rw kha.

¹⁸“A jora-o ang norokno hai hwnwi dagi kha, ‘Subraiyung norokni Kaitor o hano norokno nana bagwi rw kha. Tamo khe norokni bebak phan gwnangrok tei sengkrakrok norokni takhuk Israilrokni slái swkang’-no láiwi ma thángnai.

¹⁹Phiya ba norokni bihiksongrok, bwsarok bai Chwrai khonairok tei bebak mal-matarok khe (ang saui mano norokni kwbángma mal-matarok tongo) ang norokno rwmani a kamiyungo tongwi mannai.

²⁰Subraiyung norokno lengla rwma hai norokni takhuksongrokno rw ya sak tei bórokbo Subraiyung norokni Kaitor bai rwjakma Jordan ayang narni hano bórokno rw kha, bórokbo a hano na phuru khe, norokni bebak bororok ang bai rwjakma sak sakni ha-o kiphilwi phaiwi mannai.’

²¹Aphuru ang Josuano hai hwnwi dagi kha, ‘Subraiyung nini Kaitor a bugra khoroknwino khlaimano, nwng mokol baithang’-no nuk kha. Abo hai kheno nwng thángmani a harokno Subraiyung abo haino khlainai.

²²Norok bórokno ta kiri di, tamni hwn khe Subraiyung norokni Kaitor se baithang norokni bagwi choba khlainai.’

²³“Aphuru ang sakthar súgwi Subraiyungni thani hai hwnwi suri san kha:

²⁴‘O Subraiyung Kaitor, nwng nini selengno nini kotor kuar phankrak yakni samungrokno phunukna cheng laha; nini omo hai samungrok, phankrak samung kotorno, nokha bai o ha saka-o khlaiwi mannai bu mwtai se tongnai?

²⁵Nono koi ja-o, ano Jordanni ayang naro thángwi a ha kaham, naithok hachukni kamiyung tei Lebanonno nukna rw ja di.’

²⁶Phiya ba norokni bagwi se Subraiyung ano jolijak si-o, tei ani surimano khwna li ya. ‘Aswkno wng kha! Omono tẃiwi nwng ano tei mungsa kók ta sa si di!’ Hwnwi Subraiyung ano sa kha.

²⁷Pisgani buchugo kasaui di tei salthángbai, salsibai tei salgrabai tei salka babai kaham khe mokol bai kaichomwi nahar si di, tamni hwn khe nwng Jordanni ayang naro ma lái glak kha ba.

²⁸Phiya ba Josuano dagiui samung yaphar di tei bono bwkha bacha rw di tei phan rw chru di. Tamni hwn khe bo se o bororokni bwskango láinai tei nwng nuhurma a hano bo se man rwnai ba.’

²⁹Aboni bagwi chwng khe Betpeorni ayang narni harungo tong lai kha.