Read Kok Borok UÁINWINI SA PHIMA 30 Bible Online

UÁINWINI SA PHIMA 30 - Kok Borok bible

UÁINWINI SA PHIMA 30

¹“Ang norokni bwskango o hamarirok bai sraimungrok norokni saka-o sók phai phuru khe Subraiyung norokni Kaitor norokno koproi rwui tlangnai a hano norok bwkha-o chu-ui tháng di.

²Tei Norok Subraiyung norokni Kaitorni thani kiphil di tei ang tini bebak dagimani kókrokno bebakno khna di, norok tei norokni bwsarok bebakno bwkha bai tei uansukma bai khe khna di.”

³Hakhe se Subraiyung norokni Kaitor norokno buini yakni phiyóknai tei norokno khairogwi Subraiyung norokni Kaitor norokno pisa-piring khlaima a harokni kiphilwi tubu-ui thumnai.

⁴Norokno ha páithago rwui rohorjak phano Subraiyung norokni Kaitor aroni norokno thumnai tei bo norokno aroni kiphilwi tubunai.

⁵Subraiyung norokni Kaitor norokno norokni chuchusong manmani a ha-o norokno tubunai tei bo norokno norokni chuchusongni slái teibo hamcha rwnai tei kwbángbo khlainai.

⁶Phiya Subraiyung norokni Kaitor norokni bwkhani tei norokni bosongrokni bwkhani sakurno ranai, hakhe ha-o kwthang tongna bagwi norok Subraiyung norokni Kaitorno bebak khá bai-khúk bai tei uansukma bai khe hamjak di.

⁷Tei Subraiyung norokni Kaitor o bebak sraimungrokno nono sátoknai nini kena arirokno rwnai.

⁸Ang tini norokno bini dagimarokno rw-o; norok haino hai Subraiyungni kókno khna di.

⁹Hakhe Subraiyung norokni Kaitor norokno teibo hamcha rwnai, norok yak rwma bebak samungo tei norokni okni bwtháirok, norokni mal-matarokni bwsarok, hapharni mai khulrok hamnai. Norokni nwphasongrokno bwkha phurjakma haino Subraiyung haino hai khá phurjagwi hamcha rwnai.

¹⁰“Tumungno norok Subraiyung norokni Kaitorni kók khna khe tei kerong bijabo swijak tongma bini dagimarokno tei raidarokno tẃi khe tei Subraiyung norokni Kaitorni thani bebak bwkha rwui bebak uansukma bai kiphilwi phai di.

¹¹“Tamni hwn khe ang tini o dagimungrokno norokno dagimani norokni bagwi belai kutuk ya tei hakchalbo wng ya.

¹²Obo chuknoha buya, norok hai hwnwi sanani, ‘Sabo chini bagwi chuknoha-o kasaui thángnai hakhe abono khnaui chwng abo tẃi khe tongnani?’

¹³Omo twijlang ayang naro buya ba norok, ‘Sabo ba chini bagwi twijlang naro thángnai, hakhe chwng abono khnaui man anw tei abo hai khlaiwibo man lainai?’ hwnwi sana nang ya.

¹⁴Phiya ba, a kókthái norokni belai gana-o se; abono khlaiwi manna bagwi omo norokni búkhúgo’-no tei norokni bwkha’-ono tongo.

¹⁵“Nai di, ang tini norokni bwskango langma bai kaham tei hamna chanano tei thwinani bai komornano’-no chongwi nana bagwi ton kha.

¹⁶Tamo khe, ang tini norokno dagi-o, Subraiyung norokni Kaitorno hamjaknani, bini lama tẃi himnani tei bini dagimarok, bini raidarok tei kerongrokno, tẃi di hwnwi dagi-o; hakhe se thangwi tongnai, ernai tei hakhe Subraiyung norokni Kaitor norok yago nana bagwi hapna nai tongmani a ha-o hamari rwnai.

¹⁷Phiya ba, norokni bwkha phér khe tei kók khna ya wng khe tumungno kubun mwtairokno khulum khe tei bórokno mon khe,

¹⁸ang tini norokno sakhlaiwi rw-o, norok kubui’-no sokomorjak bainai. Norok sakni ha khlaina bagwi Jordan twima basu-ui thángwi hapna nai tongma a ha-o norok umor logwi tongwi man glak.

¹⁹Ang tini norokno kebengwi nokha bai hano kókumu narwgwi sa-o, ang norokni bwskango langma bai kwthwino hamari bai sraimungno ton kha. Aboni bagwi, norok tei norokni bwsarok kwthang tongnani tẃi khe langmano saiwi na si di.

²⁰Subraiyung norokni Kaitorno hamjak di, bini khorangno khna di tei bini thani kwrak khe tong di. Tamni hwn khe, Subraiyungno norokni langma tei, Subraiyung norokni chuchusongno, Abraham, Isak tei Jakobsongno ha rwna hwnwi kók rwma a ha-o norok umor kolok wngwi tongwi man anw.”