Read Kok Borok UÁINWINI SA PHIMA 31 Bible Online

UÁINWINI SA PHIMA 31 - Kok Borok bible

UÁINWINI SA PHIMA 31

¹Aboni ulo Musi nongkhorwi thángwi bebak Israilrokno o bebak kókrokno sa kha:

²Bo bórokno hai hwnwi sa kha, “Ang tabuk ani umor nokha bisi sa-ra tei nwichi wng kha, ang tei tháng-phai wngwi mantha li ya tei Subraiyung ano sa kha, ‘Nwng o Jordan twimano ta basu si di.’

³Subraiyung bo sak baithang nini slái swkang basu-ui thángnai. Bono a dopharokno nini bwskangni sokomornai, hakhe norok abórokni hano yago na di. Subraiyung sama tẃi’-no Josua nini slái swkang basu-ui thángnai.”

⁴Tei Subraiyung Amorsarokni habugra Sihon bai Ogno sokomorwi tei bórokni hano khlaima hai kheno bórokno sokomor phuru abo hai khlainai.

⁵Subraiyung bórokno norokni yago yapharnai, aphuru khe norokno ang dagima hai kheno bórokno khlai di.

⁶“Norok phan thon di tei bwkha rak di; ta kiri di, eba bórokno nugwi kirima ta chá di tamni hwn khe Subraiyung norokni Kaitor norok bai baksa thángwi tongo; bo norokno yakar glak tei khibo khibi glak.”

⁷“Hakhe Musi Josuano ringwi bebak Israilrokni bwskango sa kha, nwng phan thon di tei bwkha rak di, tamni hwn khe Subraiyung bórokni chuchusongno rwna hwnwi swmai tangmani ha-o nwng o bororok bai baksa ma thángnai tei nwng bórokno a hano bórokni khlaiwi rw di.

⁸Tei Subraiyung bo sak baithang’-no nini bwskang bwskang thángnai; bo nwng bai tongnai, bo nono yakar glak, nono khibi glak, ta kiri di tei bwkha ta bái di.

⁹“Ulo Musi o raidarokno swi kha tei Lebi bosongni ochairokni thani yaphar kha, Subraiyung swmai bokhokno tẃinairokno tei Israilrokni bebak tẃiphangrokni thani yaphar kha.”

¹⁰Musi bórokno hai hwnwi dagi kha; “Nokha bisisni bisini páithak brúm’-no lakai yókma bisi-o kainok tero

¹¹bebak Israilrok Subraiyung norokni Kaitorni chongthani bini bwskango kuthum lai di, aphuru nwng bebak Israilrokni bwskango bórokno khna rwui o kerongrokno pori di.

¹²Nwng bororokno chwla, bwrwi, chwrairok tei bebak nini kamiyung bisingo tongnai buini hani bororokno thumsa khlai di, bórokbo khnaui rwngna tẃi tei Subraiyung norokni Kaitorno kiriui tei o kerongrokni bebak kóktháirokno khir-khir khe khlaiwi manna tẃi khe thumsa khlai di.

¹³Tei bórokni chwrai khonairok o kerongno saui man yarok, omono khnaui, norok Jordan basu-ui thángwi sakni ha khlaiwi tongwima a ha-o tongsak’-no norokni Subraiyung Kaitorno kirina rwngna nangnai.”

¹⁴Hakhe Subraiyung Musino hai hwnwi sa kha, “Tabuk, nini thwinani jora sampha kha. Nwng Josuano ring di tei norok khoroknwnwi’-no kók malaiwi rí nogo phai di, aro ang bono samung ber anw.” Hakhe Musi bai Josua thángwi kók malaima nogo thángwi bacha lai kha.

¹⁵Aphuru Subraiyung a rí nogo a chumuini thongla-o nukjak kha; a chumuini thongla rínokni hapma duglam saka-o khe tongwi tong kha.

¹⁶Aphuru Subraiyung Musino hai hwnwi sa kha, “Nai di, nwng nini chuchusong bai baksa thu anw tei o bororok bacha lai anw tei hapnani thángwi tongmani, a hani sini ya mwtairok bai chásmai tong lai anw ano khibi anw tei bórok bai swmai tangmani raidarokno swbai anw.

¹⁷Hakhe ang a salo bórokno jolinai tei bórokno khibinai, bórokni aroni ani mwkhangno huinai tei bórok monokjak bainai, bórokni saka-o juda juda digi-sigi sók phainai; aphuru bórok hai hwnwi sa lai anw, ‘Subraiyung chini bisingo kwrwini bagwi se omo hai wngo hai ya diba?’

¹⁸A salo ang kubui’-no ani mwkhangno huinai tamni hwn khe bórok kubun mwtairokni thani thángwi bebak samung hamyarok tang lai kha.

¹⁹Tabuk norok sakni bagwi o rwchapmungno swiwi narwk di tei nwng Israilsarokno omono phrwng di tei bórokno rwchap rw di, omo hai khe o rwchapmung Israilrokno kebengwi ani kók mukumu wngnai.

²⁰Ang bórokni chuchusongno dut bai piya bwtwi yorjak a ha-o bórokno tubu-ui phai khe, bórok cháui nungwi bupham khaui tei kubun mwtairokni thani thángwi bórokno mon lainai; tei bórok ano joli rwui ani swmaino swbainai.

²¹Bórokni saka-o kwbángma digi-sigi tei tong khochor sók phai khe, o rwchapmung bórokno kebengwi kókumu sanai, tamni hwn khe omono bórokni bosong bai pokjak glak. Ang ha rwna hwnwi swmai tangmani ha-o bórokno tubuma swkang’-no bórokni uansukmarokno ang saui mano tei tabuk uansukmanibo ang saui mano.”

²²Aboni bagwi Musi a salo’-no o rwchapmungno swiwi Israilrokno phrwng kha.

²³Hakhe bo Nunni bwsla Josuano samung berwi hai hwnwi sa kha, “Nwng phankrak wng di tei bwkha ta bái di; tamni hwn khe ang Israilrokno rwna hwnwi kók rwma, a ha-o nwng bórokno tubunai; tei ang nwng bai baksa tongnai.”

²⁴Musi pái súk rwui bebak raidarokni kóktháirokno karjak ya tẃi khe bijabo swiwi pái khe,

²⁵Subraiyungni swmai bokhokno tẃi raida japa tẃinai Lebisongno hai hwnwi dagi kha,

²⁶“Norok o raida swijak bijapno tlangwi Subraiyung norokni Kaitorni swmai bokhokni gana-o ton di, abo norokno kebengwi kókumuni bagwi aro-o tongnai.

²⁷Tamni hwn khe norok kebengwi bachanairok tei norok gwdna kwrak hwnwi ang saui mano, nai di ang kwthang tong twtwi se tabuk norok Subraiyungno kebengwi bacha laiwi tongo hwn khe ang thwimani yagulo tamo khlai langno!

²⁸Norok sak sakni bosongni bebak tẃiphangrokno tei samung tangnairokno ani thani kwrẃngsa khe thumwi tubu di, ang bórokni khunju-o o bebak kókrokno sa anw tei bórokno kebengwi nokha bai swngcharno sakki khlai anw.

²⁹Tamni hwn khe ang saui mano, ang thwimani yagulo norok uáisa bai’-no tong sitra wng bainai tei ani dagimani phérwi lama koró bai anw tei abo tẃi jora phaiwi sók phai anw, norokni hamya máng wng anw, tamni hwn khe norokni yak baithangni samungrokno Subraiyungno joli rw anw.”

³⁰Aboni ulo Musi pái súk ya sak Israilni bebak bororokni khunju-o a rwchapmungrokno saui khna rw kha.