Read Kok Borok UÁINWINI SA PHIMA 32 Bible Online

UÁINWINI SA PHIMA 32 - Kok Borok bible

UÁINWINI SA PHIMA 32

¹“O nokharok khna di, ang kók sanai; o ha ani khukni kókrokno khna di.

²Ani phrwngma uatwi hai khe ua thung, ani kóktháirok pantwi hai khe klai thung, sam kwlwi-o uatwi dumui-dumui klái tẃi khe, buphangrokni saka-o uatwi bwthái kotor klai tẃi wng thung.

³Tamni hwn ba ang Subraiyungni bumungno sakhlainai; bini bororok chini Kaitorni chẃngsachano lob di!

⁴“Bo wng kha holong, bini samungrok sói cha súkjak; tamni hwn ba bini bebak lamarok sói, kók narwknai Kaitor, bo cha ya khlai ya. Bo kubui tei bini thani cha ya kwrwi.

⁵Bórok bono tẃiwi sitra khe tang lai kha, bórokni lachimasingchani bagwi bórok tei bini bwsarok wng li ya; bórok lama korójak tei khechra bosong gwja.

⁶Butuarok, norok Subraiyungno abo hai khe da yagul su? Bo norokni nwpha ya diba, nono snamnaisa ya diba, nono sabo tak kha tei snam kha ba?

⁷“Láiwi thángnai salrokno muitu khlai di; láiwi thángnai kusung kusung bosongrokni kókrokno uansuk phi di. Nwphano sẃng di, bo nono sa anw, nini okrarokno sẃng di, bórok swbai sa anw.

⁸Kwplaikuksa, dopharokno bórokni manthaino rw phuru, bo bebak bororokno swkak phuru, aphuru khe Israilsarokno lekhauino bo bororokni bagwi hani ari khaui rw-o.

⁹Tamo khe Subraiyungni banta khe bini bororok se; Jakobni bosong se bini le manthai.

¹⁰“Bo bono hasing hapharni haphar tei nokbar sibchaui tongjak bukcha khibijak hani manbu kha; Bo bono kati rwui ton kha, tei naikini khlaiwi ton kha; bini mokolni kosomno kati rwui ton tẃi khe kati rwui ton kha.

¹¹Toling sakni bothopno snam tẃi khe, sakni bwsarokni saka-o bwkrang phehel tẃi, kangkhung phehelwi bórokno kobolwi ton tẃi bwkrang saka-o khe bórokno tẃi-o;

¹²Subraiyung saichung se bono tẃidulwi tlang kha; bo bai baksa aro tei mungsa swk sini ya mwtai kwrwi.

¹³Bo swngcharni bebak kuchuk saka tẃi bono kasa rw kha, tei hapharo tháimarokno chá rw kha; bono holongni piya bwtwi khan kha, holong kwrakni thok rw kha.

¹⁴Mal-matarokni tei merarok, punrokni dutrok doirok bai merarok kuphung tei punrok, Basanni khá phurma mera, tei gom kaham kuk bono rw kha, angurni bwtwi kahamno nung rw kha,

¹⁵“Phiya Jesurun bupham khaui londa wng khe lathi rwui rw kha; nwng kuphung, rwja tei milik wng kha; hakhe nono taknai Kaitorno khibiui rw kha. tei mwthangnai holongno sejaui kók sa kha.”

¹⁶Bórok sini ya mwtairok bai risi nang rw kha, selengmasingcha manwirok bai bono joli rw kha.

¹⁷Bórok sói mwtai yarokni thani se ratharmung ratharwi yaphar lai-o, abórok khe mwtai kwtal kwtalrok, mwtairokni thani bórok si se sini ya, omorokno nuchuchusong ki se kiri lang ya gwja.

¹⁸Norokno mannai nwpha o Holongthaino norok pok lai kha, nwma hai khe norokno achai rwnai Kaitorno norok pok kha.

¹⁹Subraiyung omono nugwi bórokno khibi kha, tamni hwn khe bini sakni Sajla tei sajwksongni, samungrok bai bono joli rwjak kha.

²⁰Hakhe bo hai hwnwi sa kha, ‘Ang bórokni aroni ani mwkhangno huinai, hakhe ang bórokni páithak tamo wngno abono nainai, bórok lama korójak bosong, bórokni bwsarokni thani kubui kwrwi.

²¹Bórok tatal mwtairok bai khe ano músú rw kha, chúk ya takjak mwtairok bai ano joli rw kha, borok khayarok bai músú rwnai; butua dopharok bai bórokno ang joli rwnai.

²²Tamni hwn ba ani thamchi bai hór chẃng kha; bo bai kuthuk morke jora khampranai, omo ha tei aro tongma manwirokno monogo; tei bebak hachuk yaphango hór phnango.

²³“ ‘Ang bórokni saka-o digi-sigino rúngnai, bórokni saka-o ani bebak chakhla koknai.

²⁴Bórok ok khuima bai rampra bainai; kutung tei kirimasingcha khe sokomormung bórokno kobolnai: ang bórokno kebengwi uátharnairokno rohornai; hadlwi-o malnai bis gwnang chibukrokno rohornai:

²⁵Lama-o seng bai butharwi bórokno bwsa kwrwi khlainai; noksingo kirima bai koboljak anw; chwla sikla, bwrwi siklarok komor bainai, abuktwi chánai chwrai bai bwkhnai kuphur burarokno butharjaknai.

²⁶Ang hai hwnwi sa kha, “Bórokno hakchalo pisa-piring khe rohornai, bororokni bisingni bórokni mungno hu-ui páinai.”

²⁷Phiya ba, ang kirima khe arirokni thamchino se, bórokno kebengnai bororok da kók kotor sa langno; ulo bórok hai hwnwi sa lainai, “Chini yak bai se chwng kwplai wngo, o samungrok Subraiyung khlaimani wng ya.” ’

²⁸“Bórok wng kha uansukna rwng ya dopharok; borokni bisingo kaham hamya uansuknai kwrwi.

²⁹Bórok sinai wng khe se romwi man kha mun, bórokni páithago tamo wngno saui man kha mun;

³⁰khoroksa borok ba bahai khe khoroksai bororokno riphrik rohorwi mannai, tei borok khoroknwi bahai khe khorok chisai bai choba khlai mannai? Bórokni borokno phal ya khe, tei Subraiyung bórokno yakar súk ya khe bahai khe mannai?

³¹Tamni hwn khe bórokni holong chini holong hai ya, chini arirokbo abo hai kheno saui mano.

³²Tamo khe bórokni angur buphang Sodomni angur buphangni achaimani; tei Gomorani angur bwtháirok wng kha thwinai bithi; bórokni bwthái buthuprok wng kha kwkha.

³³Bórokni angur bwtwi wng kha chibukni bis, abo wng kha thamchi gwnang chibukni bis.

³⁴“Omo ani khatijak ya diba? Ani rwbamo rúngjak ya diba?

³⁵Yagul suma bai supungwi rw phinani samung; sói jora-o bórokni yakung kásle anw, tamo khe bórokni khá báima sal samphaui tong kha; bórokni bai klainani sal samphajak, bórokni thani a phainai douino tongo.

³⁶Tamo khe Subraiyung bini bororokni buj thumnai; tei bini selengrokno khairoknai, bórokni phan kwrwi kha, khajak eba karjak khoroksa phano kwrwi.

³⁷Aboni ulo bo hai hwnwi sa anw, ‘buko bórokni mwtairok, buko a holong, bórok bwkha bera laimani,

³⁸ratharwi yapharmani muini bupham chánairok buko tei nungmung yapharmarokno nungnairok buko? Bórok bachaui norokno chuba thung, kati rw thung.

³⁹“ ‘Tabuk nai di, Ang, Ang’-no bo, ano karwi tei kubunni kaitor kwrwi; ang’-no butharo, ang’-no mwthango; ang’-no kwsa cha rw-o, tei ang’-no ham rw-o; ani yakni phiyógwi mannai tei khoroksa phano kwrwi.

⁴⁰Ang chuknoha phaising yak tisaui sakhlai-o, kubui’-no ang mol brúm brúm kwthang.

⁴¹Ang ani seng kwchẃngno hul khe, tei buj thumnani yak rw kha, hwn khe, ani arirokno yagul snai, tei ano sejanairokno sátoknai.

⁴²Ang ani chakhlarokno thẃi khanwi phek rwnai, aphuru ani seng khe borok bahan chánai; tanwi butharjaknairokni tei choba-o manjaknairokni thẃi arirokni bokhorokrokno chá anw.’

⁴³“Dopharok bini bororok bai baksa chirigwi lob di; tamni hwn khe bo bini selengrokni thẃini yagul sunai; bono kebengnai bororokno yagul sunai, bini hani tei bini bororokni bagwi súchanai.”

⁴⁴Musi Nunni bwsla Josua bai baksa phai kha tei bororokno-o rwchapmungni bebak kókrokno saui khna rw kha.

⁴⁵Musi bebak Israilrokni thani-o bebak kókrokno saui tong phuru-o

⁴⁶bo bórokno hai hwnwi sa kha, “Ang tini norokni thani sakhlaiwi mano norok bebak kóktháirokno bwkha-o chop di tei norokni bwsarok o raidarokni bebak kókrokno tẃiwi tongnani bagwi sakthar thung, aboni bagwi nwsarokno omono dagi di.”

⁴⁷Omo norokni bagwi haino nang nung ya kók ya, phiya ba, omo wng kha norokni langma. Omorok bai se norok Jordan basu-ui thángwi sakni ha hwnwi manma a ha-o dwgwi tongwi mannai.

⁴⁸Tei a salo’-no Subraiyung Musino hai hwnwi sa kha,

⁴⁹“Nwng Moab hani Jerikoni kamiyungni tei babaisa-o tongnai Abarim hachugo kasaui di; Nebo hathái-o kasaui ang Israilrokno rwna nai tongmani a ha Kananno naharwi nai di.

⁵⁰Tei nini takhuk Aron Hor hathái-o thwiwi bini bororok bai thángma hai kheno nwngbo abo hai kheno nwng kasama hachugo’-no thwinai tei nini bororok bai thansa wngwinai.

⁵¹“Tamni hwn ba norok khoroknwino Jinni hasing hapharni Meriba Kades twi gana-o norok Israilrokni bwskango ang bai poito swbai kha tei Israilsarokni bisingo ani kwtharno tẃi li ya.

⁵²Aboni bagwi nwng a hano hakchalo tong twtwi simi nuk sinai; ang Israilrokno rwma a ha-o nwng ma hap glak.”