Read Kok Borok UÁINWINI SA PHIMA 34 Bible Online

UÁINWINI SA PHIMA 34 - Kok Borok bible

UÁINWINI SA PHIMA 34

¹Hakhe Musi Moabni hapharni Nebo hachugo, Jeriko ganani Pisgani bochlongo kasa kha tei Subraiyung bono Danni simi Giliad jora bebak ha phunuk kha,

²tei bebak Naptali tei Ephraim bai Manase ha tei salthángbai twijlang jora tẃi Judani bebak harok;

³tei salgrabaini ha bai Joar jora tei kamiyung khajuri phang tei Jeriko hapharni amchoirok phunuk kha.

⁴Tei Subraiyung bono sa hai hwnwi kha, “Ang o hano Abrahamno, Isakno tei Jakobno ‘Ang nini bosongno rwnairwnai’ hwnwi kók rwmani, ang a hano nini mokol baithang phunuk kha, phiya ba nwng aro thángwi man glak.”

⁵Hakhe Subraiyungni seleng Musi Subraiyungni kók tẃi’-no aro Moab ha-o thwi kha,

⁶tei bo ha Moabni harungni Bet-peoro bono phob kha; phiya ba bono phobma abo buro tabuk jora tẃi khoroksa phano saui man ya.

⁷Thwi phuru Musini umor nokha bisi saranwichi wng kha; bini mokol muk ya wng lang ya tei bini phanbo holi lang ya.

⁸Aboni ulo Israilsarok Musini bagwi Moab hapharo nokha sal thamchi jora kap lai kha; abo hai khe Musini bagwi khá khammani kók saui bórokni kap laimani sal mwthakjak kha.

⁹Hakhe Nunni bwsla Josua simung bai phola bai kupulung wng kha, tamo khe Musi bini saka-o yak bera lang kha tei Israilsarok bini kókno khá uárwi Subraiyung Musino dagimano rwgwi samung khlaina nang kha.

¹⁰Musi hai khoroksa swk diyari phano Israilrokni bisingo tei achai phai li ya; Subraiyung bo bai mwkhang naisik lalai khe kók sa lai lang kha.

¹¹Tamni hwn khe Subraiyung bono rohorwi bo Ijip hano Pharaoni tei bini bebak seleng tei bebak hani bagwi podrepot mari bai uanamasingcha phunuk kha,

¹²tei bebak Israilrokni mokol bwskango Musi phankrak yak tei kirimasingcha kwbángma samung khlai lang kha.