Read Kok Borok UÁINWINI SA PHIMA 4 Bible Online

UÁINWINI SA PHIMA 4 - Kok Borok bible

UÁINWINI SA PHIMA 4

¹“Hakhe tabuk, o Israil, ang norokno dagima raidarokno tei kerong phrwngmarokno khna di. Subraiyung norokni chuchusongni Kaitor norokno a hano rwna naiwi tongmani ha-o habwi kwthang tongwi manna bagwi abórokno khna di.

²Ang norokno dagima kóktháirogo tei kók tháisa phano ta dal di tei tháisa phano ta kháiklai di, tamo khe ang norokno rwmani Subraiyung norokni Kaitorni dagimarokno tẃiwi tong di.

³Bal-peoro Subraiyung khlaimano norokni mokol baithang’-no nuk kha; tamni hwn ba, norokni Kaitor Subraiyung norokni bere Bal-peorno rwktharnai bebaknono norokni bisingni sokomor bai kha.

⁴Phiya ba, norokni bere Subraiyung norokni Kaitorni thani kwrak khe tongnairok tabuk bo kwthang tong bai kho.

⁵Nai di, norok habwina naimani a ha-o habwi a dagijakmarokno tei kerongrokno tẃi tongna bagwi Subraiyung ani Kaitor ano dagima hai’-no tei kerongrok rwma hai’-no ang norokno phrwng kha.

⁶Aboni bagwi abórokno bebakno khir khir khe tẃiwi tong di, hakhe kubun dopharokni thani norok bwswk sinai gwja abono phunuknai. Borok o kerongrokno khna khe, ‘O dopharok kotorrok kubuino si-o tei kwrwng gwja!’ hwnwi ma sa anw.

⁷Bu dopha kotorrokni mwtai ba Subraiyung chini Kaitor chwng ring kheno khnaui tongnai tong tẃi khe aswk samo tongnai tong?

⁸Tei tini ang norokni bwskango bebak raidarokno rw kha tei o kerongni buj bwswk se sói, omo hai kwthar khajak kerong bu dopha kotorrokni tong ba?

⁹“Hus simi wng di, tei nini mokol baithang bai nukmarokno pok ya tẃi khe naichomwi tong di, thangsungo nini bwkhani norjak ya tẃi khe tong di. Omorokno nwng nini bwsa busukrokno phrwng di.

¹⁰Nwng Horebo Subraiyung nini Kaitorni bwskango salsa bahai khe bachaui kha, aphuru Subraiyung ano hai hwnwi sa kha, ‘Bororokno ani thani kwrẃngsa khe thum di, ang bórokno ani kóktháirokno khna rwnai, o ha saka-o kwthang tong sak bórok ano kiriui tongna srwngna tẃi tei bórokni busuk bwsaroknobo phrwng thung.’

¹¹Aphuru norok samo phaiwi hachuk yaphango bacha phai kha tei hachuk hór bai khamwi tong kha, nokha mwnakma bai koboljak, chumui kosombo mwnaksajak.

¹²Aphuru hórni bisingo tongwi Subraiyung norokni thani kók sa kha; Norok kók sama le khnaui tongo, hai phano mungsa mangtangrok hai le nuk ya; tamo khe khorang simi se khna-o.

¹³Tei nwng bai tangmani bini a swmaino tẃina bagwi tamo khlaina nangnai norokno sa kha. Norok Dagimung Kaichirokno ma khnanai, bo abo holongni bwlap lapnwi-o swi rw kha.

¹⁴Aphuru Subraiyung ano dagi kha, norok segwi hapna nai tongmani a ha-o thángwi tongwi phuru tẃinani bagwi bebak dagimung tei kerongrokno norokno phrwng di hwnwi sa kha.

¹⁵“Subraiyung hórjlaini bising tẃi Sinai hathái-o norok bai kók sa kha, a salo norok mungsa mangtangrok nuk ya. Aboni bagwino sak sakni bagwi kaham khe kaichomwi tong di.

¹⁶Norok sak sak dera ya tẃi khe tong di, wng ya khe norok sakni bagwi mungsa swkno sol rwui chwla eba bwrwini mangtang tagwi sumsok phano khlaiwi mano,

¹⁷harokni mungsa swk yabrwi malrokni mangtang phano eba nokha-o birnai mungsa swk tokni mangtang phano,

¹⁸mungsa swk ha saka-o malnaini mangtang phano tei twi-o tongnai árokni mangtang phano snamjagwi mano.

¹⁹Nokhasa bwkhak nwng naisa khe sal, tal tei athukirirok tei bebak nokhani phanno nugwi abórok bai lama ta koró rwjak di tei abórokno tabo ta khulum di tei tabo ta mon di, tamni hwn khe Subraiyung norokni Kaitor abórokno bebak nokha tolani ha saka-o tongnai bebak dopharokni bagwi rw kha.

²⁰Tamo khe Subraiyung norokno sorni thapa hórjlai ha Ijipni tikhlaiwi tubu kha, bini sak baithangni borok wngna bagwi norokno yachagwi tini omo hai khlai kha.

²¹Tei se norokni bagwi Subraiyung ano jolijak kha, tei ano, nwng Jordan ma lái glak tei Subraiyung norokni Kaitor bosong kusung kusungni bagwi rwna hwnmani a ha kahamo ma habwi glak hwnwi swmai tang kha.

²²Tamo khe ang Jordan ma bár yaui’-no o hano thwina nangnai, phiya ba norok khe Jordan bárwi a ha kahamno yago nanai.

²³Aboni bagwi nwng hus wng di, wng ya khe Subraiyung nini Kaitor bai swmai tangmano pogwi Subraiyung norokni Kaitor norokno mungsa swkni mangtangrok phano ta tak di hwnmarokno pogwi mano.

²⁴Subraiyung norokni Kaitor wng kha sokomornai hór hai; bo wng kha risi gwnang Kaitor.

²⁵“A ha-o norok bwsa tei bwsani bwsa achaiwi torwi logwi kwbángma sal dwgwi tong khe, sak sakno dera rwnai tei mungsa swkno sol rwui mwtaini mangtang tak khe tei Subraiyung norokni Kaitorni bwskango cha ya khlaiwi bono thamchi ka rw anw.

²⁶Tumungno norok kók khna ya hwn khe, tini’-no ang norokno kebengwi chuknoha bai hano ringwi sanai, hakhe norok dakti’-no hani komorwi thángnai. Norok Jordan basu-ui thángwi ha nana nai tongmani a ha-o, sal dwgwi tongwi man glak, phiya pái rw súgwi sokomorjak bainai.

²⁷Subraiyung norokno dopharokni bisingo piring-poroi khlainai; Subraiyung norokno tlang thángma a dopharokni bisingo kisa se tong rwknai.

²⁸Tei norok aro mwtairokno mon lainai, yak bai snamjak buphang tei holongni mwtairokno khulum lai anw, abórok nubo nuk ya, khwbo khna ya, chábo chá ya tei báhaibo man ya.

²⁹Phiya ba, aro-o tongwino norok Subraiyung norokni Kaitorno naituknai, tumungno norokni bwkha rw súgwi tei kubui khe naituk khe bono mannai.

³⁰Norok digi-sigi-o klai khe tei ulo omo hairok norokni saka-o sók phai khe a jora-o Subraiyung norokni Kaitorni thani kiphil di tei bini khorangno khna di.

³¹Tamni hwn khe Subraiyung norokni Kaitor wng kha khairoknai Kaitor; bo norokno yakar glak, norokno sokomor glak, tamni hwn khe, bo swmai tangwi nini chuchusongno kók rwmano pogwi tháng glak.

³²“Tamni hwn khe lái thángjak salrokni kókrokno tabuk sẃngwi nai di, nini slái swkangni kókrokno sẃngwi nai di, ha saka-o Kaitor bai borok snamjakmani salni simi tei chuknohani babaisani simi tei babaisano sẃng di, omo hai samung kotor swkango wng da wng kha ba? Tei omo hai kók khw de khwna kha ba?

³³Khoroksa phano khw de khna kha? Hórjlai bising tẃi khe Kaitor kók samani; norok khnaui kwthang tongmani hai, kwthang tongnai da tong?

³⁴Eba khe kaisa swk mwtai dopha kaisa swkno tei kaisa dopharokni bisingni tikhlaiwi tubumani, amjokma bai, soidomni samung bai, kwmamsingcha bai choba bai, phankrak yak bai, yak phologwi, eba samung kotor bai tei kirimasingcha samung bai norokni Subraiyung Kaitor norokni bagwi Ijip ha-o tong phuru norokni mokol bwskango omo hairok khlaima khw de khlai kha ba?

³⁵Subraiyung’-no Kaitor, bono karwi tei kubunni kwrwi, hwnwi nwng saui man thung hwnwi omo nono phunukjak kha.

³⁶Nono sói khe tongna phrwngna bagwi bo nono chuknohani simi bini khorangno khna rw kha. Ha saka-o bo nono bini hórjlai kotor phunuk kha tei hórjlai bising tẃi nwng bini kóktháirokno khna kha.

³⁷Bo nini chuchusongno hamjago aboni bagwi bórokni yagulo bórokni bosongrokno chong kha. Bini phankrak phan bai bo baithang tongwi nono Ijip hani tikhlaiwi tubu kha.

³⁸Norokni slái kotor tei phan gwnang dopharokno rwkhlaiwi rwi rohor bai kha, bórokni ha-o nono hap rwnani tei norokno rwnani bagwi abo hai khlai kha, tabukbo a ha abo haino tong kho.

³⁹Aboni bagwi tabukni simi norok si súk di, bwkha-o ton di, kuchugo chuknoha tei ha saka-o Subraiyung’-no Kaitor, bono karwi tei kubunni kwrwi.

⁴⁰Aboni bagwi nwng tei nini ulni bwsarok hamwi tongna bagwi tei nini Kaitor Subraiyung mol brúmni bagwi nono ha rwma-o umor kolok khe tongwi manna bagwi ang nono bini raidarok tei kerong rwmano tẃiwi tong di.”

⁴¹Hakhe Musi Jordan ayang nar salkabaini kamiyung khungtham khe khak kha,

⁴²aroni bere khungsa swk kamiyungo borok butharnairok khárwi tongwi mannai, muchung yaui eba swkango kena kwrwi phano nok ari borokno buthar khe a kamiyung khungsa swgo khárwi yógwi mano.

⁴³Kamiyung khungtham wng kha, Ruben bosongni bagwi ha milik hasing hapharni Bejer; Gaditsongni khe Giliadni Ramot tei Manasesongni bagwi wng kha Basanni Golan amchoi.

⁴⁴Omo wng kha Musi Israilsarokno kerong rwmani;

⁴⁵omorokno wng kha dagimarok, Israilsarok ha Ijipni ongkhorwi phai phuru kerongrokno tei dagimarokno Musi swbai sukhrubwi samani.

⁴⁶Amorsarokni habugra Sihonni ha, Jordanni salkabaini Betpeor harungo, bo Hesbono tongwi habugra chá kha tei ha Ijipni Israilrok ongkhorwi phai phuru Musi bai mechenjak kha.

⁴⁷Tei bini ha Basanni bugra Ogni ha, Jordan ayang narni salkabai-o tongnai Amorsarokni a bugra khoroknwirokni hano na kha.

⁴⁸Arnon harungni páithak ari Aroerni simi Sirionni[3] harung buchuk jora (abono Harmon) bebak ha,

⁴⁹tei Jordanni bebak haphar tei Araba twijlang jora tei kháma-o Pisgani halap jora khopjago.