Read Kok Borok UÁINWINI SA PHIMA 5 Bible Online

UÁINWINI SA PHIMA 5 - Kok Borok bible

UÁINWINI SA PHIMA 5

¹Aphuru Musi bebak Israilrokno ring kha tei bórokno hai hwnwi sa kha, “O Israilrok, ang norokno tini khna rwmani kerong tei dagimung rwmarokno khna di; norok omorokno khir-khir khe srwng di tei tẃiwi tongna nai di.

²Subraiyung chini Kaitor Horebo chwng bai swmai tang kha.

³Subraiyung chini chuchusong bai swmai tang lai ya, phiya ba tabuk chwng oro bebak kwthang tongnairok bai se swmai tango.

⁴Subraiyung hachugo hórni bising tẃi khe norok bai mwkhang dadak-didik khe kók sa kha.

⁵Aphuru ang’-no norok bai Subraiyungni kókno saui khna rwna bagwi Subraiyung bai norokni kwcharo bacha-o; tamni hwn ba norok hórno kiriui hachugo kasa li ya. Bo hai hwnwi sa kha:

⁶“ ‘Ang nini Subraiyung Kaitor se, norokno Ijip ha-o seleng khatiui ma tongmani phiyógwi tubu-o.

⁷“ ‘Ani bwskango nini tei kubun mwtairok ta tong thung.

⁸“ ‘Nwng sakni bagwi mwtai ta tak di, abo nokhani eba khe ha sakani eba twi bisingni mungsa swk hai phano wng thung;

⁹nwng abórokno ta khulum di, tabo ta mon di. Tamni hwn khe ang Subraiyung norokni Kaitor wng kha risi gwnang Kaitor, ang buphasongni cha yani majrano bwsarokni saka-o khiklai-o tei ano yachak ya wngnairokno kusungtham, kusungbrwi bosong jora phnango,

¹⁰phiya ba ano hamjaknai tei ani kók tẃiwi tongnairokno, ang bórokno kusungsai bosong jora khairogo.

¹¹“ ‘Nwng Subraiyung nini Kaitorni bumungno ahaino ta khu di, tamni hwn khe ahaino bini bumung khunaino Subraiyung cha ya kwrwi hwnwi rom glak.

¹²“ ‘Subraiyung nini Kaitor dagima tẃi’-no nwng sabat salno bórom khlaiwi kwthar khlai di.

¹³Norok nokha sal dok samung tang di tei nini bebak samungrokno tang di.

¹⁴Phiya ba nokha Salsni sal khe, Subraiyung nini Kaitorni bagwi lenglama sal, a salo nwng, nini sajwk, sajla, nini seleng selengjwk, nini musuk, eba korai chirka eba kubun mal-matarok, eba buini hani bororok nini hani bisingo tong phainairok, khoroksa phano mungsa samung ta tang di, nini seleng, selengjwksongbo nwng hai kheno lenglama man thung.

¹⁵Tei muitu narwk di, Ijip ha-o norok seleng tongmani, phiya ba Subraiyung nini Kaitor phankrak yak bai tei yak phologwi aroni norokno tikhlaiwi tubu kha; aboni bagwi Subraiyung nini Kaitor lenglama salno tẃina bagwi norokno dagi kha.

¹⁶“ ‘Subraiyung nini Kaitor nono dagima tẃi’-no nwma-nwphano bórom khlai di; hakhe Subraiyung nini Kaitor nono rwma ha-o nwng umor kolok khe tei kwchang kwchang khe tongwi mannai.

¹⁷“ ‘Nwng borok ta buthar di.

¹⁸“ ‘Buitali-buitala ta wng di.

¹⁹“ ‘Nwng ta khok di.

²⁰“ ‘Nini noksa nok arini borokni bagwi tatal khe kók ta sa di.

²¹“ ‘Buini bihikno manna ta muchung di; tei bini nokno, hano, selengrokno, mal-matarokno, korai chirkarokno tei bini mungsa swkno phano manna ta muchung di.’

²²“Subraiyung hachuk saka-o hór bising tẃi khe chumui tei mwnakmani bising tẃi khorang kotor bai norokni kuthumjak bororokno sakhlai kha, aro tei mungsa kóktháirokno sa li ya. Tei aboni ulo bo a kóktháirokno holong bwlap lepnwi-o swiwi ano yaphar kha.

²³“Tei norok mwnakmani bising tẃi a khorang khna phuru hachuk hór bai khampraui tong phuru-o, aphuru norok tei norokni dophani bokhorokrok tei okrarok ani thani phai lai kha.

²⁴Norok hai hwnwi sa kha, ‘Nai di Subraiyung chini Kaitor chwngno bini chẃngsachano tei phanno phunuk kha tei chwng bini khorangno hórjlai bising tẃi khna kha. Chwng tini nuk kha Kaitor khoroksa swk borok bai kók sa phano a borok kwthang tongwi mano.

²⁵Tabuk chwng tamni bagwi thwinai? A kirimasingcha hórjlai chwngno monoknai. Chwng tei uáisa Subraiyung chini Kaitor kók samani khorang khna phi khe chwng thwinai.

²⁶Tamni hwn ba bahan bwthẃi gwnangrokni bere sabo tong, chwng hai hórjlai bising tẃi kwthang Kaitorni khorang khna kha tei tabukbo kwthang tong kho?

²⁷Nwng sakphang’-no gana-o thángwi Subraiyung chini Kaitor bebak kók samarokno khnaui di; Subraiyung chini Kaitor nono samani a kókrokno chwngno sa di, chwng abórokno khnanai tei abo hai kheno tongnai.’

²⁸“Norok ano a kókrokno sa phuruno Subraiyung norokni samani kókrokno khna kha; Subraiyung ano hai hwnwi sa kha, ‘O bororok nono samani a kókrokno ang khna kha; bórok samani abo bebak kubui mángno sa kha.

²⁹Bórokni bisingo omo hai bwkha wng kha, bórok ano kiri bainai tei ani dagimarokno tẃi máng tong lainai, abo bai bórok tei bórokni bwsarokni bagwi kusung kusungni hamari wngnai.

³⁰Nwng thángwi bórokno, “Norok sakni rí nogo kiphilwi habwi bai di” hwnwi saui di.

³¹Phiya ba, nwng oro ani gana-o bacha di, nwng bórokno tamono phrwngnai ang nono a bebak dagimarokno, tong raidarokno tei bujni kókrokno rw anw, ang bórokno nanani bagwi rwmani a ha-o tongwi phuru bórok, khlaiwi manna bagwi nwng bórokno phrwng di.’

³²Subraiyung norokni Kaitor norokno dagima tẃi’-no bebakno khlaiwi tong di; norok aboni yagra eba yaksi ta phér di.

³³Subraiyung norokni Kaitor norokno himna bagwi dagimani bebak lama tẃi norok him di, hakhe norok kwthang tongnai tei hamari mannai tei norok manmani a ha-o umor kolok khe tongwi mannai.