Read Kok Borok UÁINWINI SA PHIMA 6 Bible Online

UÁINWINI SA PHIMA 6 - Kok Borok bible

UÁINWINI SA PHIMA 6

¹“Norokno phrwngna bagwi Subraiyung norokni Kaitor ano o dagimarok tei raidarokno kerongrokno rw kha, norok sakni ha khlaina bagwi hapna naiwi tongmani a ha-o norok omorokno khlai manna bagwi se rw-o.

²Subraiyung sak sakni Kaitorno kiriui, nwng nini bwsarok tei nusuksong, ang rwma swijak raida tei dagimungrokno tẃiwi nini páithak thangsung jora abo tẃi hai khe tong di, abo tẃi khe nini umor kolok wngnai.

³Aboni bagwi o Israilsong khna di, abórok bebakno saktharwi tẃiwi tong di, hakhe dut bai piya bwtwi yorjak ha-o nini hamari wngnai tei norok aro ernai.

⁴“O Israil khna di: Subraiyung chini Kaitor, bo simi se Subraiyung;

⁵tei nwng Subraiyung nini Kaitorno nini bebak khá bai khúk bai tei phan bai khe hamjak súk di.

⁶Phiya ang nono tini dagimani bebak kóktháirok nini khá-o tong thung;

⁷phiya norok sak sakni bwsarokno abono khir-khir khe phrwng di, norok nogo achuk laiwi tong phuru, lama-o him twtwi tei thunani bagwi roko laiwi tong phuru tei thumani bacha phuru’-obo o kókrokno saui khna rw di.

⁸Nwng nini yago abórokno mokolo klaina tẃi khe khaui ton di tei abórokno kwpalo khajaknai hai khe nini mokol kolnwini kwcharo ton di.

⁹Tei nini nok duglamni thonglarogo tei phatarni hap-lamo abórokno swiwi ton di.

¹⁰“Nuchu Abraham, Isak tei Jakobsongno Subraiyung nini Kaitor a hano rwna hwnwi kók rwmani abo norok tangmani wng ya, a kotor kotor naithok naithok kamiyungrogo norokno tubu-ui phai phuru khe,

¹¹tei nokrokbo manwi kaham kaham bai máng kupulung, abórok norok baithang supungmani wng ya, twikhorbo norok sak khurmani wng ya, angur bwlwng tei olib bwlwngrokbo norok kámani wng ya, abórokno cháui ok pung phuru khe,

¹²aphuru hus wngwi tong di, norokno Ijip ha-o seleng khatiui tongmani yakni phiyógwi tubunai a Subraiyungno pogwi ta tháng di.

¹³Nwng Subraiyung nini Kaitorno kiriui tong di, bono simi se mon di, bini mung bai simino swmai tang di.

¹⁴Norok kubunni mwtairok tei norokno kitingwi tongnai dopharokni mwtairokno ta rwkthar di.

¹⁵Tamni hwn ba nwng bai tongnai Subraiyung nini Kaitor wng kha risi gwnang Kaitor hus khe tong di, wng ya khe Subraiyung nini Kaitorni thamchi nini saka-o klai anw tei bo ha sakani nono sokomor anw.

¹⁶“Norok Masa-o khlaima hai Subraiyung norokni Kaitorno ta amjok di.

¹⁷Norok Subraiyung norokni Kaitorni dagima tei bini kerong tei raida rwjakmarokno saktharwi tẃiwi tong di.

¹⁸Nini hamarini bagwi tei Subraiyung nuchusongni thani rwna hwnwi swmai tangmani a ha kahamma-o habwi tongwi manẃina bagwi Subraiyungni mokolo bubo ba sói tei kaham abono khlai di.

¹⁹Nini bwskangni bebak nini arirokno rwkhlai rohorwi Subraiyung swmai tang tẃi’-no mannai.

²⁰“Thinango nwsarok, ‘Subraiyung chini Kaitor norokno dagimungrok, raidarok tei kerongrok rwmani, abórokni gujokrok ba tamo?’ hwnwi sẃng khe,

²¹aphuru nwng nwsarokno hai hwnwi sa di, ‘Chwng ha Ijibo Pharaoni seleng khatiui ma tongmani, Subraiyung bini phankrak yak bai ha Ijipni chwngno tikhlaiwi tubu kha;

²²tei chini mokol bwskango Subraiyung Ijip ha-o, Pharao tei bini bebak núkhungrogo kotor kuk uanamasingcha, kirimasingcha tei soidomni marirok phunuk kha;

²³tei chini chuchu bora-rachisongni thani hano rwna hwnwi swmai tangmani bagwi bo chwngno a hani tikhlaiwi tubu kha.

²⁴Hakhe Subraiyung chwngno o bebak dagimarokno tẃiwi tongnani dagi kha. Chini kahamni bagwi tei kusung thangwi tongna tẃi khe chini Subraiyung Kaitorno kirina bagwi sa kha.

²⁵Chwng Subraiyung chini Kaitor chwngno dagima tẃi bini thani a bebak dagimarokno saktharwi khnaui tong khe chini tongma kwthar wngnai.’