Read Kok Borok UÁINWINI SA PHIMA 8 Bible Online

UÁINWINI SA PHIMA 8 - Kok Borok bible

UÁINWINI SA PHIMA 8

¹“Tini ang norokno bebak dagimano norok saktharwi abórokno bebakno tẃiwi tong di, hakhe Subraiyung Kaitor norokni chuchusongno rwna hwnwi swmai tangmani a ha-o habwi erwi bisi kwbángma tongwi mannai.

²Tei nwng o bebak lama kolokma láiwi phaimani kókno muitu narwk di, Subraiyung nini Kaitor norokno nokha bisi brwichi hasing haphar tẃi khe norokno amjogwi naina bagwi tei norokno koinene khlai rwna bagwi phiya norokni bwkhano saui manna bagwi bo omo hai khlai kha.

³Bo norokno ok khui rwui koinene khlai kha tei manna chá rw kha, abono norokbo sini ya norokni chuchusongrokbo sini ya. Bororok mai cháma bai simi kwthang tong ya, tamo khe Subraiyungni búkhúkni ongkhormani bebak kókrok bai se kwthang tongnai hwnwi norokno phrwngna bagwi se omo hai khlai-o.

⁴A nokha bisi brwichi-o norokni kanma chummarok soroi wng li ya tei nini yakungbo robon li ya.

⁵Borok, bwsano phrwngna bagwi swprakma hai Subraiyung norokni Kaitorbo norokno khlai-o, omono nwng bwkha bai si di.

⁶Aboni bagwi norok bini lamarok tẃi bwkha-o kirima bai khe Subraiyung norokni Kaitorni dagimarokno tẃiwi tong di.

⁷Tamni hwn khe Subraiyung norokni Kaitor norokno kwrẃngsa ha kahamo tlangwi tongo, a ha-o harung tei hachukrok, twisarok, twikherengrok, twimuk yorjak tei twisarok tongo.

⁸A ha-o gom, barli, angurrok, khwichangrok tei dalimrok tongo; tháistwini thok tei piya bwtwirokbo tongo.

⁹A ha-o norok mungsa chámung-nungmungni bagwi biyal wng glak, nang ya a hani holongrok khe sor se tei hatháini hano khur khe pitol mannai.

¹⁰Tei norok cháui nungwi khakchangma man khe, norokno a ha kaham rwmani bagwi norok Subraiyung Kaitorno hambai rw lainai.

¹¹“Hus wng di, Subraiyung norokni Kaitorno ta pok di ang tini bini bebak dagimarokno, kerongrokno tei raidarok nono rw kha, abórokno tẃiwi tongnano ta koró di,

¹²cháui nungwi bwkha kochom khe, nok kaham huk kaham tangwi aro achugwi khe

¹³tei norokni mal-mata puru-puru er khe, nini rangchak tei rukphai báng khe tei nini tongmani bebakno tei bo báng phuru,

¹⁴aphuru norok kung chuknai tei norokno seleng khlaiwi tongmani ha Ijipni tikhlaiwi tubunai Subraiyung norokni Kaitorno poknai.

¹⁵Bo se a kirimasingcha hasing haphar tẃi twi kangjak twi kwrwi haphar tẃi kirimasingcha chibukrokni kwchar tẃi tei sindrai bai kupulung tẃi norokno tubu-ui phai kha. Bo norokno holong kwrakni twi tikhlaiwi rw kha.

¹⁶Bo, nuchusongrokbo sini twrwng ya abo tẃi chámung, manna bai khe hasing hapharo norokno ok supung kha, bo norokno koinene wng rwui ulo norokni kahamni bagwi amjogwi nai kha.

¹⁷Norok sak sak hai hwnwi saui mano, ‘Ani phan bai tei ani baithangni yak bai se ani bagwi omorokno khlai-o tei aji-o.’

¹⁸Phiya ba Subraiyung norokni Kaitorno muitu khlai di, tamni hwn ba bo se norokno gwnang wngnani phan rw-o. Bo nini chuchusong bai swmai tangmano tabukbo narwgwi tongmani bagwi se bo omorokno khlaiwi tongo.

¹⁹Tumungno Subraiyung norokni Kaitorno pogwi kubun mwtairokno rwkthar khe tei abórokno khulum khe ang norokno tini hus khe rw-o; norok sóino komornai.

²⁰Subraiyung norokni Kaitorni kókno khunju kan ya khe, norokni bwskango Subraiyung kubun dopharokno sokomorma hai kheno norokbo abo hai kheno komornai.