Read Kok Borok UÁINWINI SA PHIMA 9 Bible Online

UÁINWINI SA PHIMA 9 - Kok Borok bible

UÁINWINI SA PHIMA 9

¹“O Israilsarok khna di; norok tabuk Jordan twimano bárnai, abo láiwi aro norok norokni slái dopha kotorrokno tei phan gwnang kuk dopharokno, nokha khujak chokdeual rwjak kamiyung kotorrokno mechenwi rwkhlai bainai,

²a dopharok belai kuchuk kotor gwja, bórok wng kha, Anakimrok, norok bórokno saui mano tei ‘Sabo Anakni bwsarokni bwskango bachaui mannai tong?’ hwnwi samano khna kha.

³Phiya ba tini norok saui man di, Subraiyung norokni Kaitor sakphang’-no monoknai hór wngwi norokni bwskang bwskang láiwi thángnai. Bo bórokno sokomornai; Bo bórokno mechenwi norokni yago rwnai, hakhe Subraiyung norok bai swmai tangma tẃi’-no daktino rwkhlai bainai tei sokomor suknai.

⁴“Subraiyung norokni Kaitor norokni bwskangni bórokno rwkhlaima yagulo norok sak sakno, ‘Ang le kaham ba aboni bagwi se o hani bugra wngna bagwi rw-o’ hwnwi ta uansuk di, o bororokni hamyani bagwi se Subraiyung bórokno norokni bwskangni rwkhlaiwi rohoro.

⁵Abo nwng tongmung kaham eba khá sóini bagwi bórokni hano norokni khlaina thángwi tongo hai ya, tamo khe, a dopharokni tongmung sitrani bagwi se tei nini chuchusongrokni thani, Abraham, Isak tei Jakobsongni thani swmai tangwi kók rwmani narwkna bagwi se Subraiyung nini Kaitor nini bwskangni bórokno rwkhlainai.

⁶“Aboni bagwi saui man si di, Subraiyung nini Kaitor nono nini tongtharni bagwi o ha kahamno nini yago rwnai abo ya, tamni hwn ba nwng kók khna ya borok.

⁷Nwng hasing hapharo Subraiyung nini Kaitorno khá hamya khlaimarokno muitu khe nai di, pogwi ta tháng di. Ha Ijipni nongkhorwi phaima salni simi o ha-o sók phaima jora tẃi norok Subraiyungni kebengnai borok wngwi phai kha.

⁸Norok Horebo Subraiyungno bwkha cha ya khlaiwi joli rw kha tei Subraiyung jolijagwi norokno sokomorna hwnwi uansuk kha.

⁹Hakhe ang Subraiyung bai rwjak raida swijak holong belep lep nwino naharna bagwi hachugo kasaui tháng phuru, nokha sal brwichi tei hor brwichi ang hachugo tongbu kha, aphuru ang mungsa chámungbo chá buya, twi bo nung buya.

¹⁰Tei Subraiyung ano Kaitorni yasi bai swijak a holong belep lepnwino rw kha. Hachugo lukurok thumsa wngmani salo hór bising tẃi Subraiyung norokno sakhlai kha, a bebak kóktháirok a holong belep lepnwi-o swijak tongo.

¹¹Tei nokha brwichi sapung tei hopungni ulo Subraiyung a holong lepnwi-o swijak kerongno ano rw kha.

¹²Subraiyung ano hai hwnwi sa kha, ‘Bacha di, oroni dakti’-no nongkhorwi tháng di, tamni hwn ba nini bororokno nwng Ijip hani tikhlaiwi tubumani, a bororok samung hamya khlai kha. Ani dagima lamani phérwi bórok sak sakni bagwi mwtai tak lai kha.’

¹³“Subraiyung ano hai hwnwibo sa kha, ‘O bororok kubui’-no gwdna kwrak gwja, Ang abono nuk kha;

¹⁴ano saichung khe yakarwi rw di,hakhe Ang bórokno sokomorwi nokha tolani bórokni bumungno hu-ui khibi anw; hakhe Ang norokno bórokni slái phan gwnang kuk tei kwbáng kuk dopha khlainai.’

¹⁵Aphuru ang kiphilwi hachukni ongkhorwi phai kha, aphuru hachuk hór bai khamwi tongo. Tei aphuru ani yago kerongni holong belep lepnwi tongo.

¹⁶Ulo ang naisik kha tei nuk kha, norok Subraiyung norokni Kaitorni thani sumsok khlai kha. Norok sak sakni bagwi musuk bwsani mang tak lai kha. Subraiyung norokno dagima lamani dakti’-no phérwi tháng lai kha.

¹⁷Aboni bagwi ang a holong lapnwino ani yakni khitarwi norokni mokol bwskango’-no swbaiwi rw kha.

¹⁸Hakhe ang haino hai Subraiyungni bwskango botok khe nokha sal brwichi hor brwichi klaiwi tong kha; ang chábo chá li ya twibo nung li ya tamni hwn khe norok Subraiyungni mokol bai chajak ya wngmani samungno tangwi bono joli rw kha.

¹⁹Tamni hwn ba, Subraiyung norokno sokomorna hwnwi jolijagwi tungphlaui tongma bai ang belai kiri kha; phiya ba, aphuru-obo Subraiyung ani koimano khna kha.

²⁰Tei Subraiyung Aronno belai khe jolijagwi sokomorna hwnwi tong kha tei aphurubo ang Aronni bagwibo suri san kha.

²¹Aphuru norokni sumsok, norok takmani a musuk bwsano, naharwi hóro sógwi khibi kha tei sukhrup kha, hadlwi hai wng ya sak kaham khe sukhrubwi hului hachukni yorkhlainai twisa-o a hadlwino khichonwi rohor kha.

²²“Norok Tabera-o tei Masa-o tei Kibrot-hataba-obo Subraiyungno joli rw kha.

²³Tei Subraiyung Kades-barneani norokno, ‘Norok bachaui tháng di, ang norokno rwmani hano baithangni khlaiwi di,’ hwnwi sa phuru aphuru bo norok Subraiyung norokni Kaitorni dagima kókrokno na li ya. Norok bono poito khlai li ya tei bini kókno khna li ya.

²⁴Norokno ang sini phuruni simino, norok Subraiyungno kebengma nuk kha.

²⁵“Hakhe ang a nokha sal brwichi hor brwichi Subraiyungni bwskango botok khe klaiwi tongmani khe ang saui man kha, bo norokno sokomorna hwnwi bwkha chapjak.

²⁶Hakhe Subraiyungni thani ang omo hai khe suri sano, ‘O Subraiyung, nwng nini bororokno nini phankrak bai tei suar bai khe ha Ijipni phiyók kha, nwng bórokno ta sokomor ja si di.

²⁷Nini seleng Abraham, Isak tei Jakobsongno muitu khlai di, o bororokni gwdna rakmano, borok hamya wngmarokno tei bórokni sumsokrokno ta naisik si di.

²⁸Tumungno nwng o bororokno sokomor khe, Ijipsarok hai hwnwi sa lai anw, “Subraiyung bórokno rwna hwnwi swmai tangmani ha-o tlangwi man li yani bagwi bórokno sokomor kha, phiya bo bórokno naislerjagwi bórokno hasing hapharo butharnani tubu-ui phai kha.”

²⁹Phiya ba o bororok khe nini borok tei nini borok wngna bagwi chongjakrok, bórokno nwng’-no nini phankrak phan bai khe tei yak phologwi Ijip hani tikhlaiwi tubu kha.’