Read Kok Borok JOHON 1 Bible Online

JOHON 1 - Kok Borok bible

JOHON 1

¹Kók yaphangni simi’-no tongo; Kók Kaitor bai tongo tei o Kók’-no Kaitor.

²Yaphangni simi’-no Kók Kaitor bai tongo;

³bini yak tẃino Kaitor bebak’-no snam bai kha; aswk snamjakmani bisingo bono karwi mungsa phano snamjak ya.

⁴Bini thani-o se langma tongo, o langma’-no bororokni pohor.

⁵Pohor mwnakma-o piro, hakhe mwnakma pohorno pir ya khlai man ya.

⁶Kaitor Johon hwnwi borok khoroksano rohor kha.

⁷Bororokni thani bo a pohorni kókno sanani phai-o, bebak borokno o kókno khnaui poito khlaina tẃi khe bo sanani phai-o.

⁸Bo a pohor ya, pohorni kókno sanani se bo phai-o.

⁹Joto borokni thani pirnai a sóini pohor Aphuru’-no swngcharo phai-o.

¹⁰Hakhe Kók swngcharo tong phai kha tei bini yak tẃi se o swngcharno snamjago, aile swngchar bono sini li ya.

¹¹Bo bini ha-o phaimani se, hai phano bini bororok bono yachak sok li ya.

¹²Tamo khe bono poito khlaiwi yachak soknairokno, bini mungno poito khlainairokno bo Kaitorni bwsa wng rw kha.

¹³Bahan-bwthẃini muchung tẃi buya, borokni muchung tẃi buya tamo khe Kaitor bini muchung tẃi se achainairokno achai rw-o.

¹⁴Kók mang wngwi chini bisingo tong phai kha, hakhe chwng bini chẃngsacha nuk kha, abo khairokma bai kubui bai kupulung; Buphani songdari Sajla hwnwi bo a chẃngsachano man kha.

¹⁵Johon bini kók sa kha, hakhe bo sotonwi hai hwnwi sa kha, “Bini kókno’-no ang hai hwnwi samani, ‘Bo ani slái ulo phainai, phiya ba bo ani slái tor kugo, tamni hwn khe ang achai ya sini’-no bo tongo.’ ”

¹⁶Bo belai khairokma gwnang wngma bai chini kaham khlai kha, kahamni saka kaham khlai máng tong kha.

¹⁷Kaitor Musini yak tẃi Kerong rw kha; phiya ba khairokma bai kubui sók phai kha Jisu Khristoni yak tẃi.

¹⁸Kaitorno khoroksa phano nuknai kwrwi kho; Phani yapha khuri-o tongnai songdari Sajla bo simi se bono phunuk kha.

¹⁹Omo khe Johonni sakni kók samani, Jerusalemni Judai hodarok Johonno ochai bai Lebirokni yak tẃi “Nwng sabo?” hwnwi sẃng rw hor kha.

²⁰Hakhe bo sa yaui tong li ya, bo glang glang kheno “Ang Masia ya,” hwnwi gosi kha.

²¹Hakhe bórok bono hai hwnwi sẃng kha, “Hakhe nwng sabo? Elia da?” “I’nhi, ang ya,” hwnwi Johon sa kha. Bórok bono hai hwnwi sẃng khua, “Nwng da a Diyari sla?” “I’nhi,” hwnwi bo sa khua.

²²Hakhe bórok hai hwnwi sa kha, “Nwng sabo sla? Chwngno sẃng rw rohornairokno chwng sauina nang anw. Nwng le tamo sabo abono sa di.”

²³Johon hai hwnwi sa kha, “Ang omo se: “ ‘Hasing panthoro khoroksa hai hwnwi chirikhókjak: Subrai himnani lamano kepleng khe snam di!’ ” (O kók Jisaia diyari samani.)

²⁴A rohorjaknairok wng kha Pharisairok se.

²⁵Hakhe bórok Johonno hai hwnwi sẃng kha, “Masia buya, Elia buya, phiya a Diyari buya khe nwng tamo wngwi baptisma rw sla?”

²⁶Johon hai hwnwi sa kha, “Ang twi bai baptisma rw-o; tamo khe norokni bisingo khoroksa tongo, norok bono sini ya,

²⁷bo ani slái ulo phainai, hai phano ang bini yaklap sokokna suda chúk ya.”

²⁸Johon baptisma rwma dikholo Jordan twima ayang narni Bethania-o ahairok wngo.

²⁹Teini salo Jisuno bini phaising phaima nugwi Johon hai hwnwi sa kha, “Iko, nahar di, Kaitorni mera bwsa! Swngcharni sumsokno bo’- se ruju-ui tlangnai.

³⁰Omono ang hai hwnwi samani a borok, ‘Khoroksa ani slái ulo phainai, phiya ba bo ani slái tor kugo, tamni hwn khe ang achai ya sini’-no bo tongo.’

³¹A borok sabo ang saui man ya, tamo khe bo’-no Israilrokni thani sini rwna hwnwi se ang twi bai baptisma rwna phai-o.”

³²Johon Jisuni kók hai hwnwi sa kha, “Ang Pholano pharuk hai khe nokhani birkhlai bini sago tong phaima nuk kha.

³³Ang bono sini ya tongmani’-no, tamo khe twi bai baptisma rw di hwnwi ano rohornai Kaitor hai hwnwi sa kha, ‘Nwng Pholano birkhlai khoroksani sago tong phaima nuk anw, a borok’-no Phola Kwthar bai baptisma rwnai.’

³⁴Ang omono nuk kha, hakhe norokno o kók sa-o, omono Kaitorni Sajla.”

³⁵Teini salo Johon bini sagri khoroknwi bai aro tong phai khua.

³⁶Aphuru bo Jisuno himwi tongma nuhurwi hai hwnwi sa kha, “Iko, nahar di, Kaitorni mera bwsa!”

³⁷A sagri khoroknwi bini o kók khnaui Jisuno rwktharwi tháng kha.

³⁸Hakhe Jisu uphilwi bórokno rwktharma nugwi “Norok tamo rutuk” hwnwi sẃng kha. Bórok hai hwnwi sa kha, “Rabi, nwng buro tong?” (Rabi phrwngnaino hwnma se.)

³⁹Bo hai hwnwi sa kha, “Phai di, nai phai di.” Aboni bagwino bórok Jisu bai thángwi bo tongmano nai kha. (Aphuru sarikni kaibrwi wng thotok.) Hakhe bórok hor kwrwngwi bo bai tong bu kha.

⁴⁰Johonni kók khnaui Jisuno rwktharnai khoroknwini bere khoroksa khe Simon Pitorni takhuk Andria.

⁴¹Andria bini takhuk Simon bai malai graui hai hwnwi sa kha, “Chwng Masiano nuk kha.” (Masia “Khristono” hwnma se.)

⁴²Hakhe bo Simonno Jisuni thani tubu kha. Jisu bono naisigwi hai hwnwi sa kha, “Nwng Johonni bwsla Simon. Nini mung Kepha wngnai.” (Kepha bai Pitor thansano, abo “Holong” hwnma se.)

⁴³Teini salo Jisu Galili-o thángnani khá chong kha. Bo Philip bai malaiwi “Ani logi phai di!” hwnwi sa kha.

⁴⁴(Philip Betsaidani borok, abo Andria bai Pitor tongmani taun.)

⁴⁵Philip Nathanial bai malaiwi hai hwnwi sa kha, “Musi Kerong bijabo swi langmani, phiya diyarirokbo swi langmani a borokno chwng nuk kha. Bo Josepni bwsla Jisu, Nasaretni phaimani.”

⁴⁶Hakhe Nathanial hai hwnwi sẃng kha, “Nasaretni mungsa phano kaham ongkhorwi da manno?” “Phai di, nai phai di,” hwnwi Philip sa kha.

⁴⁷Bini ayang Nathanialno phaima nugwi Jisu bini kók hai hwnwi sa kha, “Omo se sóini Israilsa, bini bisingo tatal kwrwi.”

⁴⁸“Nwng ano bahai khe sini sla?” hwnwi Nathanial bono sẃng kha. Jisu hai hwnwi sa kha, “Philip nono ring ya sini khwichang buphang tola tong phuru ang nono nuhur kha.”

⁴⁹Nathanial hai hwnwi sa kha, “Hodakra, nwng Kaitorni Sajla! Nwng Israilrokni bugra!”

⁵⁰Jisu hai hwnwi sa kha, “Khwichang buphang tola ang nono nuhur kha hwnwi sama bai da nwng poito khlai lang? Nwng omoni slái teibo samung kotor nuk anw.”

⁵¹Jisu teibo hai hwnwi sa kha, “Ang norokno sóino kubui kók sa-o, norok chuknoha phiyokjak nuk anw, hakhe Kaitorni suarirokno Borokni Sajlani saka tẃi kasamani ongkhormani nuk anw.”