Read Kok Borok JOHON 10 Bible Online

JOHON 10 - Kok Borok bible

JOHON 10

¹“Ang norokno sóino kubui kók sa-o, kutni duglam tẃi hap yaui kwrẃngsa swk tẃi hapnai borok bo sikhok se, dagait se.

²Duglam tẃi hapnai bo’-se mera mwrwknai.

³Bono se duglam mwrwknai duglam phiyogwi rw-o. Merarok bini kók khna-o, hakhe bo bini merarokno mung khu-ui ringwi phataro tlango.

⁴Bebak merano phataro tlang phuru bo swkang swkang himo, merarokbo bini uklok uklok himo, tamni hwn khe bórok bini khorang saui mano.

⁵Bórok borok sini yano rwkthar ya, bini aroni se bórok khár phinai, tamni hwn khe bini khorang bórok saui man ya.”

⁶O rwngthomano Jisu bórokno sama le sa kha, tamo khe bo bórokno tamo sa kha abo bórok se romwi man li ya.

⁷Aboni bagwino hai’-no hai Jisu hai hwnwi sa kha, “Ang norokno sóino kubui kók sa-o, ang’-no merarok hapnani duglam.

⁸Ani slái swkang phainairok le bórok bebak’-no sikhok dagait máng se, merarokbo bórokni kók khna ya.

⁹Ang’-no duglam. Ani tẃi hapnai borok bo’-se mwthangjaknai; bo bisingo ma hapnai, phataro ma thángnai, hakhe sulabo mannai.

¹⁰Sikhok le katswi khoknani, butharnani tei sokomornani simi se phai-o. Ang le bórok mwthangjak thung hwnwi phaima se, mwthangjak súk thung hwnwi phaima se.

¹¹“Ang’-no mera mwrwknai kaham, mwrwknai kaham merarokni bagwi thwiwibo mano.

¹²Muni tubujaknai borok bo mera mwrwknai ya, merarokbo bini ya; bo geguma phaima nuk kheno merarokno khibiui kháro. Hakhe geguma a merarokno bangkhárwibo tlango, piring-poroibo khlai-o.

¹³Muni hwn khe bo khárnai’-no, bo muni simi se ba, bo merarokno khá súk ya.

¹⁴Ang’-no mera mwrwknai kaham. Apha ano sini-o, angbo Aphano sini-o, abo hai’-no angbo ani merarokno sini-o, bórokbo ano sini-o. Hakhe ang bórokni bagwi thwiwibo mano.

¹⁶Ani teibo mera tongo, abórok o kutni ya; abóroknobo ang ma tubuna nang anw. Bórokbo ani kók khna anw, hakhe bórok gut kaisa wng anw, mwrwknaibo khoroksa wng anw.

¹⁷“Ang mwthangjagwi manna tẃi khe thwiwi suda manma bai Apha ano hamjago.

¹⁸Khoroksa phano ano buthar ya; ani muchung tẃi’-no ang thwi-o. Ang thwiwibo mano, thangwibo mano. ‘Ahai’-no khlai di,’ hwnwi Apha ano dagi-o.”

¹⁹O kókrokno tẃi Judairok hai’-no hai chapjagwi man ya wng lai khua.

²⁰Bórokni bisingo borok kwbángma’-no hai hwnwi sa lai kha, “Bo mwtai hamya kolobjak se! Bo kobo kobor se! Tamo wngwi norok bini kók khna laiwi tong ba!”

²¹Baksa ba hai hwnwi sa lai kha, “Mwtai hamya kolobjak khe omo hai kók saui man glak! Phulano mwtai hamya da mokol nuk rwui mannai?”

²²Jerusalemo Nokthar Chengsama Ter sók phai kha. Aphuru masing.

²³Jisu noktharo Solomonni nuka-o himgurungwi tongmani.

²⁴Aphuru Judairok bono chorsa khe kuthumui hai hwnwi sẃng phai kha, “Chwngno tei bwswk dudru mudru khe tonna nai? Srai-srai saui khibi di, nwng Masia da?”

²⁵Jisu bórokno hai hwnwi sa kha, “Ang ba norokno sa kha bla, norok se ano poito khlai ya. Aphani mungwi ang aswk samung khlaimarokno ani bagwi sakki rwui tongo.

²⁶Hai phano norok ano poito khlai ya, tamni hwn khe norok ani mera ya.

²⁷Ani merarok ani kók khna-o, ang bórokno sini-o, phiya bórokbo ano rwktharo.

²⁸Ang bórokno mwthang phlai-o, bórok tei komor phlai glak, phiya khoroksa phano bórokno ani yakni segwi tlang man glak.

²⁹Omorokno ano rwnai Apha bebakni slái kotor. Aboni bagwino omorokno Aphani yakni khoroksa phano segwi naui man ya.

³⁰Apha bai ang chwng thansa se.”

³¹Judairok bono khitarna hwnwi hai’-no hai holong khocha lai phi kha.

³²Hakhe Jisu bórokno hai hwnwi sa kha, “Apha khlai di hwnwi rwmani samung kaham kwbángma ang norokni bwskango khlai kha. Abórokni bisingo bu samungni bagwi norok ano khitar laina nai ba?”

³³Judairok hai hwnwi sa kha, “Samung kahamni bagwi chwng nono khitarna nai ya, Kaitorno hamya sama bagwi se, tamni hwn khe borok wngwi se nwng saichung-saichung Kaitor wngna nai-o!”

³⁴Jisu hai hwnwi sa kha, “ ‘Norok Kaitor bai baksa,’ hwnwi Kaitor samani abo ba norokni Kerongo’-no swijak tong bla.

³⁵Kaitor bini kók sa rwmani a bororokno ‘Kaitor bai baksa’ hwno, phiya Elembakni kók tháisa phano ha-o klai ya hwnwi chwng saui mano.

³⁶Apha se ano chongwi o swngcharo rohoro. Hakhe ang Kaitorni Sajla hwnwi sama bai bahai khe norok ano Kaitorno hamya sa-o hwn ba?

³⁷Ano Aphani samung khlaima nuk ya khe norok ano poito ta khlai di.

³⁸Abórokno khlaima nuk khe ano poito khlai ya phano ani samungrokno simi phano poito khlai di. Hakhe Apha ani bisingo tongo, phiya ang Aphani bisingo tongo, o kókno norok saui man súk nai.”

³⁹Hakhe bórok hai’-no hai bono romna nai kha, ahai phano bo bórokni yakni parsa keple lang kha.

⁴⁰Jisu hai’-no hai kiphilwi Jordanni ayang naro Johon agi baptisma rwui tong thani thángwi tongwi kha.

⁴¹Aphuru borok kwbángma bini thani phai kha. Bórok hai hwnwi sa lai kha, “Johon mungsa phano soidomni samung khlai lang ya, ahai phano bo o borokni mungwi kók sa langmarok bebak’-no kubui máng se.”

⁴²Hakhe aroni borok kwbángma bono poito khlai kha.