Read Kok Borok JOHON 12 Bible Online

JOHON 12 - Kok Borok bible

JOHON 12

¹Jisu Yókma Terni nokha saldok swkang Lasar tongmani Bethania-o tháng kha, a Lasar wng kha Jisu kwthwini mwthangmani a borok.

²Hakhe bórok bini bagwi aro panda khlai kha; Martha chá rw kha, Lasarbo Jisu bai baksa chána achuk kha.

³Aphuru Mariam nard kahamni snamjak belai morok thok motom sisisa Jisuni yakungo luproui bini bwkhnai bai hu-ui rw kha, hakhe thok motom báhai nok pung súk kha.

⁴Jisuno rom rwnai Judas Iskariot hwnwi bini sagrirokni bere khoroksa hai hwnwi sa kha,

⁵“O thok motom rang khok thamra khe phalwi tamo wngwi kwrwirokno rw ya wng lang?”

⁶Bo sikhok wngma bai se o kókno sa-o, kwrwirokno khá súgwi sama ya. Bini yago rangni bogol tongma bai aroni le kisa misa na trwng bla.

⁷Hakhe Jisu hai hwnwi sa kha, “Khlai thung! Ano phobna phuruni bagwi bo abono narwk thung.

⁸Kwrwirok ba norok bai máng tong bla, ang le norok bai tong glak.”

⁹Jisuno Bethania-o tongo hwnwi saui manẃi Judairok kwbángma aro tháng kha. Bórok Jisuni bagwi simi thángma ya, Jisu kwthwini mwthangmani a Lasarnobo naina hwnwi thángo.

¹⁰Aboni bagwino ochai okrarok Lasarnobo butharna hwnwi kók chap lai kha,

¹¹tamni hwn khe aswk Judairok bórokni hodarokno yakarwi Jisuno poito khlai rwrwgo.

¹²Tero phainai luku kwbángmarok teini salo Jisuno Jerusalemo phai-o hwnwi khna kha.

¹³Hakhe bórok khajuri bedekrok naui hai hwnwi chirikhógwi bo bai malaina tháng lai kha, “Kaitorno lob di![2] Subraini mungwi phainaino Kaitor hamari rw thung! Israilni bugrano Kaitor hamari rw thung!”

¹⁴Hakhe “Ta kiri di, Siyonni bororok! Nahar di, korai chirka bwsa o khe kasaui norokni bugra phai-o,” hwnwi elembago swijak tongma hai Jisu korai chirka masa nugwi a saka-o kasa kha.

¹⁵

¹⁶Jisuni sagrirok aphuru abono romwi man li ya, bo chẃngsacha khlaijak phuru se elembago bini bagwi o kók swijak tongmano bórok muitu manjago, bórok bono omo hai khlaimanobo muitu manjago.

¹⁷Lasarno Jisu mangkhorni ringwi mwthang phuru bini logi tongnai lukurok o wngmano saui khna rw kha.

¹⁸Aboni bagwino lukurok bo bai malai kha, tamni hwn khe bo o soidomni samung khlaimano bórok khna kha.

¹⁹Aphuru Pharisairok bórok kiching bórok hai hwnwi sa lai kha, “Nai di, chwng ba w se wng li ya bla! Naharwi nai di, swngchar ba bono máng se rwkthar si bla!”

²⁰A ter phuru surina hwnwi Jerusalemo thángnairokni bere baksa Grik tongo.

²¹Bórok Galilini Betsaida o tongnai Philipni thani phaiwi hai hwnwi sa kha, “Takhuk, chwng Jisu bai malaina muchungo.”

²²Philip Andriani thani thángwi saui kha, hakhe bórok khoroknwi’-no Jisuni thani thángwi saui kha.

²³Jisu bórokno hai hwnwi sa kha, “Borokni Sajlani chẃngsacha khlaijaknani jora sók phai kha.

²⁴Ang norokno sóino kubui kók sa-o, maichlam kolsa ha-o klai thwi ya khe bo a kolsa’-no kolsa wngwi tongo. Bo thwi khe se kwbángma thái-o.

²⁵Kwthang tongna muchungnai borok bo thwinai, phiya o swngcharo kwthang tongnano samung nangjak ya borok bo mwthangjak phlainai.

²⁶Ani samung khlaina muchungnai borok bo ani logi phai thung, hakhe ang tong thani ani selengbo ang bai baksa tongwi man anw. Aphabo ani samung khlainaino bóri anw.”

²⁷“Ang tabuk uana kha; ang tamo sanai? O Apha, phaina hwnmano ani thani ta tubu di hwnwi da ang sanai kha? Phiya ba omoni bagwi se ang oro phaimani.

²⁸O Apha nini mwkhang chẃng rw di!” Hakhe nokhasani kók hai hwnwi sakhlaijak kha, “Ang abono chẃng rw kha, phiya tei uáisa chẃng rw anw.”

²⁹Aro bachaui tongnai lukurok a kók khnaui hai hwnwi sa lai kha, “Omo ba phirang se kók bla!” Baksa ba “Suari se bo bai kók sa-o,” hwnwi sa lai kha.

³⁰Tamo khe Jisu bórokno hai hwnwi sa kha, “O kók ani bagwi sama ya, norokni bagwi sama se.

³¹O swngcharni buj thumnani jora tabuk sók phai kha, tabuk o swngcharni bugra rwkhlaiwi rohorjak anw.

³²Ang o hani tisajak phuru ang bebak bororokno ani thani so hor anw.”

³³(Bubo tẃi khe thwino bo abo swkang baira kók khitarwi sama se.)

³⁴Luku hai hwnwi sa kha, “Masia kwthang tong phlainai hwnwi chini Kerongo sajak tongo. Hakhe Borokni Sajla tisajakna nangnai nwng bahai khe sa? O Borokni Sajla hwnjaknai abo sabo?”

³⁵Jisu hai hwnwi sa kha, “Tei srapsa se norokni bisingo pohor tong si anw. Pohor tong sak’-no him lai di, hakhe mwnakma norokni thani phai glak; mwnakma-o himnai borok bo biyang tháng abo saui man ya.

³⁶Pohor tong sak bono poito khlai di, hakhe norok pohorni borok wng anw.” O kók sa baiwi Jisu bórokni aroni sak samlogwi tháng kha.

³⁷Bo bórokni bwskango aswk soidomni samungrok khlai phano bórok bono poito khlai li ya.

³⁸Hakhe Jisaia diyari hai hwnwi sa langmani abo nang phai kha, “Subrai, chwng sama kókno sabo khnanai tong? Bini phanno Subrai sabono phunuk kha?”

³⁹Aboni bagwi bórok poito khlai man li ya, tamni hwn khe Jisaia o kókbo sa lang kha,

⁴⁰“Bórok mokol ta nuk thung, phiya bwkhabo ta si thung hwnwi Kaitor bórokno nuk ya khlai kha, phiya bwkhabo si ya khlai kha. Hakhe bórok ham rwjakna bagwi ani thani kiphilwi phai glak hwnwi Kaitor sa-o.”

⁴¹Jisaia Jisuni chẃngsachano nugwi bini kók sa lango; aboni bagwino bo o kók sa-o.

⁴²Hai phano Judai hodarok kwbángma Jisuno poito khlai kha. Tamo khe Pharisairokni bagwi bórok o kókno pháng-pháng sa rak ya, wng ya khe bórok thumnogo basijak anw.

⁴³Bórok Kaitor bai kaham hwnjakma slái borok bai kaham hwnjakma se hamjago.

⁴⁴Jisu sotonwi hai hwnwi sa kha, “Ano poito khlainai borok bo ano simi poito khlaima klai ya, bo ano rohornainobo poito khlai-o.

⁴⁵Ano nuknai borok bo ano rohornainobo nugo.

⁴⁶Khoroksa swk phano ano poito khlai khe bo mwnakma-o ma tong ya tẃi hwnwi ang pohor wngwi o swngcharo phai kha.

⁴⁷Khoroksa swk phano ang kók samano khnaui abo hai tong ya khe ang bono majra ber ya, tamni hwn khe ang o swngcharno majra bernani phai ya, mwthangnani se phai-o.

⁴⁸Ang kók samano khna yaui ano khibinai borokno majra bernai khoroksa tongo; ang tabuk samani kókno páithakni salo bono majra bernai.

⁴⁹Tamni hwn khe ang ani bai sama ya, ano rohornai Apha se omo hai sa di hwnwi ano dagi-o.

⁵⁰Ang saui mano bo dagimani abo mwthang phlainai se. Hakhe ang samani omo Apha sa di hwnwi samani abo hai se.”