Read Kok Borok JOHON 15 Bible Online

JOHON 15 - Kok Borok bible

JOHON 15

¹“Ang se sóini angur buphang, Apha khe bari bubagra.

²Ani bisingni bwthái thái ya joto bedekno Apha khibiui rw-o, phiya sap wngwi bwthái kwbáng khe thái thung hwnwi tháinai joto bedekno khe bo santiui tono.

³Ang norokno kók samani abo bai norok sap wng kha.

⁴Norok ang bai thansa khe tong di, angbo norok bai thansa khe tong anw. Angur buphango kwphajak ya bedek bwthái tháiwi man ya wngma hai’-no norokbo ang bai thansa khe tong ya khe bwthái tháiwi man glak.

⁵“Ang khe angur buphang, norok khe bedek. Ang bai thansa khe tong khe, phiya angbo bo bai thansa khe tong khe a borok bwthái kwbángma tháinai. Tamni hwn khe ano karwi norok mungsa phano khlaiwi man ya.

⁶Ang bai thansa khe tong ya borok bo bedek hai khitarwi rohorjaknai, hakhe phwranjaknai; abo tẃi bedekrokno thumwi hóro khiklai sókjaknai.

⁷Norok ang bai thansa khe tong khe, phiya ani kókbo norokni bisingo tong khe norok muchungma jora tẃi san di, hakhe abono man anw.

⁸Norok bwthái kwbángma thái kheno Apha chẃngsacha wngo; hakhe omo tẃi kheno norok ani sagri wngnai.

⁹Apha ano hamjakma hai’-no angbo norokno hamjago, norok ani hamjakma bisingo tong di.

¹⁰Ani kók khna kha hwn khe se norok ani hamjakma bisingo tong anw. Angbo abo hai’-no Aphani kók khnama bai bini hamjakma bisingo tongo.

¹¹“Ang tongthokma hai’-no norokbo tongthok thung, phiya norok tongthok súk thung hwnwi se ang o kókrokno sa-o.

¹²Ang hai hwnwi dagi-o, ang norokno hamjakma hai’-no norok kiching norokbo hamjak lai di.

¹³Sakni bayaprokni bagwi thwiwi man khe se a borok bini bayaprokno kaham khe hamjakma klai-o.

¹⁴Ang dagima hai khlai kha hwn khe se norok ani bayap.

¹⁵“Ang norokno tei seleng hwn ya, tamni hwn khe nokphang tamo khlaiwi khlai ya abo seleng saui man ya. Hai hwn yaui ang norokno bayap se hwno, tamni hwn khe Aphani thani khnama jora tẃi ang norokno tháisa kwrwi tẃi sa-o.

¹⁶Norok ano sai ya, ang se norokno sai-o. Hakhe bwthái tongna tẃi khe norok bwthái kwbángma thái thung hwnwi se ang norokno chongwi rohoro. Hakhe ani mungwi Aphani thani mungsa swk san khe bo abono norokno rw anw.

¹⁷Aboni bagwino norok kiching norok hamjak lai di hwnwi ang norokno dagi-o.”

¹⁸“O swngchar norokno naisler khe abo ano naislerma se hwnwi norok si súk di.

¹⁹Norok o swngcharni wngma tlai o swngchar bini hamjakma borok hai khe norokno hamjak kha mun. Tamo khe ang norokno o swngchar bisingni sai kha, hakhe norok o swngcharni ya. Aboni bagwino o swngchar norokno naislerjago.

²⁰Ang norokno o samano muitu narwk di, seleng bini nokphangni slái kotor ya. Bororok ano suda sátok khe noroknobo sátoknai; phiya ani kók khna khe norokni kókbo khnanai.

²¹Norok ani borok aboni bagwi bórok norokno omo hairok khlainai, tamni hwn khe bórok ano rohornaino sini ya.

²²Ang phaiwi bórokno sa phai ya wngma tlai bórok sumsok khlaima klai glak kha mun. Tabuk bórok sumsok gwnang ya hwnwi phunugui man li ya.

²³Ano naislernai borok bo Aphanobo naislerjago.

²⁴Khoroksa phano khlai ya kho abo tẃi samungno ang bórokni bisingo khlai ya wngma te bórok sumsok khlaima klai glak kha mun. Tabuk ang samung khlaimarokno bórok nuk kha ba ang bai Aphano naislerjak kha.

²⁵‘Bórok ereng ereng ano naislerjago,’ hwnwi bórokni Kerongo swijak tongmani abo nang phaina tẃi khe omo ma se ma wngthai klai-o.

²⁶“Chubanai phai anw, abo’-no Aphani aroni rohorjaknai Kubuini Phola. Ang bono Aphani aroni norokni thani rohor anw, hakhe bo ani kók sa phai anw.

²⁷Norokbo ani kók sa anw, tamni hwn khe norok yaphangni simi ang bai máng tongo.”