Read Kok Borok JOHON 17 Bible Online

JOHON 17 - Kok Borok bible

JOHON 17

¹O kók sa baiwi Jisu nokhasa naisaui hai hwnwi sa kha, “Apha, jora sók phai kha. Nini Sajla nono chẃngsacha khlaiwi manna tẃi khe nwng bono chẃngsacha khlai di.

²Tamni hwn khe nwng bono rwmani joto borokno bo mwthang phlai thung hwnwi nwng bini yago bebak bororokno rw bai kha.

³Nwng simi se kubuini Kaitor, hakhe nono sinimani, phiya nwng rohormani Jisu Khristono sinimani abo se borokno mwthang phlainai.

⁴Khlai di hwnwi ano rwmani samungno khlai baiwi ang o swngcharo nini chẃngsachano phunuk kha.

⁵O Apha, o swngchar wng ya sini ang nini thani tong phuru ani chẃngsacha tongma hai nwng tabuk ano nini bwskango chẃngsacha khlai di.

⁶“Nwng o swngchar bisingni ano rwmani bororokno ang nono sini rw kha. Bórok nini’-no, hakhe bórokno nwng ano rw kha. Bórok nini kók khna kha,

⁷hakhe bórok tabuk saui man kha nwng ano rwmani abo jotono nini aroni phaima se.

⁸Nwng ano samani kókno ang bórokno sa kha, bórokbo abono khna kha. Ang nini aroni phaimani se hwnwi bórok saui man súk kha, phiya nwng ano rohoro hwnwi bórok poito khlai kha.

⁹“Ang bórokni bagwi se suri sano. Ang o swngcharni bagwi suri san ya, nwng ano rwmani bororokni bagwi se ang suri sano, tamni hwn khe bórok nini’-no.

¹⁰Ani tongmani bebak’-no nini máng, phiya nini tongmani bebak’-no ani máng; hakhe bórokni bising tẃi ani chẃngsacha phunukjak kha.

¹¹Ang tabuk nini aro phaina naiwi tongo. Ang o swngcharo tei balogwi tong glak kha, bórok khe o swngcharo tong rwk anw. O Apha Kwthar, nwng bai ang thansa wngma hai bórokbo thansa wngna tẃi khe nwng ano rwmani a mung bai bórokno kati rwui ton di.

¹²Ang bórok bai tong phuru nwng ano rwmani a mung bai bórokno kati rwui phai kha. Ang bórokno kati rwui phai kha, hakhe khoroksa phano kwma li ya; elembakni kók nang phaina bagwi khoroksa kwmathai ba bo simi’-no kwma si-o.

¹³Ang tabuk nini aro phaina naiwi tongo, hakhe ang tongthokma hai’-no bórokbo jai kheno tongthokjak thung hwnwi ang o swngcharo tong sak o kókrokno sa-o.

¹⁴Ang bórokno nini kók khna rw kha, hakhe swngchar bórokno naislerjak kha, tamni hwn khe ang o swngcharni ya wng tẃi’-no bórokbo o swngcharni ya.

¹⁵Bórokno o swngcharni tlang di hwnwi ang nono hwn ya, tamo khe Soitanni yakni simi se kati rwui ton di hwno.

¹⁶Ang o swngcharni ya wng tẃino bórokbo o swngcharni ya.

¹⁷Nwng kubui bai khe bórokno kwthar khlai di; nini kók’-no kubui.

¹⁸Nwng ano o swngcharo rohorma hai’-no angbo bórokno o swngcharo rohor kha.

¹⁹Bórokbo kubui bai khe kwthar khlaijagwi manna tẃi khe ang sakno bórokni bagwi nini yago yaphar kha.

²⁰“Ang bórokni bagwi simi hwnma ya, bórok sama bai’-no ano poito khlainairokni bagwibo hwno.

²¹Bórok thansa wng thung hwnwi ang hwno. O Apha, nwng ani bisingo, angbo nini bisingo tongma hai bórokbo chini bisingo tong thung. Nwng ano rohoro hwnwi swngchar poito khlaiwi manna tẃi khe bórok thansa wng thung.

²²Nwng bai ang thansa wngma hai’-no bórokbo thansa wng thung hwnwi nwng ano chẃngsacha khlaimani aboni bagwino ang bórokno chẃngsacha khlai kha.

²³Bórok thansa wng súk thung hwnwi ang bórokni bisingo tongo; phiya nwng ani bisingo tongo. Hakhe nwng ano rohoro hwnwi, phiya nwng ano hamjakma hai’-no bóroknobo hamjago hwnwi o swngchar saui man anw.

²⁴“O Apha, nwng ano rwmani o bororokno ang tong thani-o ang bai baksa tong thung hwnwi ang muchungo. Hakhe nwng ano rwmani chẃngsachano bórok nuk anw, tamni hwn khe o swngchar wng ya sini’-no nwng ano hamjago.

²⁵O Apha kaham, o swngchar nono sini ya, ang le sini-o, phiya nwng ano rohoro hwnwi o bororok saui mano.

²⁶Nwng ano hamjakmani abo bórokni bisingo tong thung, phiya angbo bórokni bisingo tong thung hwnwi ang bórokno nono sini rw kha, ang omo hai’-no sini rw máng tong anw.”