Read Kok Borok JOHON 18 Bible Online

JOHON 18 - Kok Borok bible

JOHON 18

¹Suri san baiwi Jisu bini sagrirok bai aroni kutulwi Kidron twisa ayang naro tháng kha. Aro bari khungsa tongo, hakhe Jisu sagrirok bai aro habwi tháng kha.

²Rom rwnai Judas a barino saui mano, tamni hwn khe bini sagrirok bai Jisu aro kwbángma’-no kuthum lai kha.

³Hakhe Judas sengkrakrokno phiya ochai okrarok tei Pharisairok bai rohorjaknai noktharni sebukrokno tlangwi a bari-o tháng kha. Bórok da-seng tẃi laijak, chati-holarok tẃi laijak.

⁴Bini tamo wngna naiwi tong kha Jisu abono saui man kha. Aboni bagwino bo jabirwi bórokno hai hwnwi sẃng kha, “Norok sabono naituk lai?”

⁵“Nasaretni Jisuno,” hwnwi bórok sa kha. “Ang’-no Bo,” hwnwi Jisu sa kha. A rom rwnai Judas bórok bai baksa aro bacha laijak.

⁶Jisu “Angno bo” hwnwi sa phuru bórok uklok uslu-ui ha-o pwtap pwtip klai lai kha.

⁷Hakhe Jisu tei uáisa hai hwnwi sẃng kha, “Norok sabono naituk lai?” “Nasaretni Jisuno,” hwnwi bórok sa phi kha.

⁸Jisu hai hwnwi sa kha, “Ang’-no bo hwnwi ang ba norokno sa kha bla. Norok ano naitugwi tong khe o bororokno rohor di.”

⁹(“Nwng ano rwmani bororokni bere khoroksa phano kwma li ya,” hwnwi bo samani a kók nang phaina hwnwi se bo amo hai sa-o.)

¹⁰Simon Pitorni thani seng kongsa tongo. Bo abono thorotsa sotroui ochai bokhorokni selengno tanwi bini yagra khunju rakhlai rw kha. A selengni bumung wng kha Malko.

¹¹Hakhe Jisu Pitorno hai hwnwi sa kha, “Seng da phi di! Apha ano nung di hwnwi rwmano ang nung glak da hwn?”

¹²A sengkrakrok bórokni bokhorok bai tei Judai sebukrok bai baksa Jisuno romwi kha lai kha.

¹³Hakhe puila bono Hannani aro tlang kha. Bo wng kha a bisini ochai bokhorok, Kaiaphani bwkra.

¹⁴O Kaiaphano aswk borokni bagwi khoroksa thwima se ham kugo hwnwi Judairokno sanai a borok.

¹⁵Simon Pitor bai tei khoroksa sagri Jisuno rwktharwi tháng kha. A sagri ochai bokhorok bai sini laijak. Aboni bagwi bo ochai bokhorokni nokhla-o Jisu bai habwi tháng kha,

¹⁶Pitor khe phataro duglam gana bachaui tong rwk kha. Ochai bokhorok bai sini laijak a sagri kiphilwi thángwi duglam mwrwknaijwkno saui Pitorbo bisingo tubu kha.

¹⁷Duglam mwrwknaijwk Pitorno hai hwnwi sẃng kha, “Nwngbo a borokni sagri ya da?” “I’nhi, ang ya,” hwnwi Pitor sa kha.

¹⁸Aphuru kwchangma bagwi selengrok bai sebukrok aro hangar bai hór mwchẃngwi bacha laiwi hór tongwi tong lai-o. Pitorbo bórok bai baksa bachaui hór tongwi kha.

¹⁹Ochai bokhorok Jisuno bini sagrirokni kók bai bini phrwngmani kókno sẃng kha.

²⁰Jisu hai hwnwi sa kha, “Ang ba lukuno pháng pháng kheno sa bla. Judairok kuthummani thumnokrok bai noktharo’-no ang phrwng bla. Ang kók tháisa phano khogwi sa ya kho.

²¹Hakhe tamo wngwi nwng ano sẃng? Ani kók khnanairokno se sẃng di. Ang bórokno tamo sa bórokno sẃng di; bórokno ang samanino saui mano.”

²²Jisu o kók sa khe sebuk khoroksa bono thapra phungsa chatsa khe nangwi hai hwnwi hwn kha, “Ochai bokhorokno bahai khe nwng o kók sa rak kha de!”

²³Jisu bono hai hwnwi sa kha, “Ang tháisa swk cha ya kók saui tong khe abono jotonono sa di. Ang samani omo kubui khe tamo wngwi nwng ano bu sla?”

²⁴Hakhe Hanna bono khajak khe’-no ochai bokhorok Kaiaphani aro rohor kha.

²⁵Pitor aro bachaui hór tongwino tong kho. Aphuru aro tongnairok bono hai hwnwi sẃng kha, “Nwngbo a borokni sagri ya da?” Hakhe Pitor abono gosi li ya, “I’nhi, ang ya,” hwnwi bo sa kha.

²⁶Pitor bai khunju tankhlaijaknaini sandai ochai bokhorokni seleng khoroksa hai hwnwi sacha kha, “Ang nono bari-o bo bai nuk ya da?”

²⁷Hakhe Pitor hai’-no hai abono gosi li ya. Hai kheno aphuru tokla kokchigwi rw kha.

²⁸Bórok Jisuno Kaiaphani nokni gobornorni noyungo tlang kha. Aphuru phung aisirisiri. Yókma Tero cháui manna tẃi khe Judairok sakno kwthar narwkna bagwi noyungo hap lai li ya.

²⁹Aboni bagwino Pilat phataro ongkhorwi bórokno hai hwnwi saui kha, “Norok o borokno tamni majra ber lai?”

³⁰“Bini majra kwrwi khe chwng bono nini thani tubu ya,” hwnwi bórok sa kha.

³¹Pilat hai hwnwi sa kha, “Norokni borokno norokno tlang di. Norokni Kerongo tongma hai’-no bini buj thumwi lai di.” Judairok hai hwnwi sa kha, “Chini muchung tẃi chwng khoroksano phano butharwi man ya.”

³²(Jisu bo bubo tẃi khe thwi no abo phunuguibo samani nang phaina bagwi se omo wngo.)

³³Pilat noyungo kiphilwi thángwi Jisuno ringwi hai hwnwi sẃng kha, “Nwng Judairokni bugra da?”

³⁴Jisu hai hwnwi sa kha, “Omo nwng sẃngma da, eba khe ani mungwi bui nono sama da?”

³⁵Pilat hai hwnwi sa kha, “Ang le Judai diba? Nini bororok bai ochai okrarok bórok se nono ani yago yaphar phai bla. Nwng tamo khlai kha?”

³⁶Jisu hai hwnwi sa kha, “Ani ha-o swngcharni ya. Ani ha-o swngcharni wngma te ani logisongrok Judairokni yakni ano narwkna bagwi choba khlai kha mun. I’nhi, ani ha oroni ya.”

³⁷Hakhe Pilat bono hai hwnwi sẃng kha, “Hakhe nwng bugra da?” Jisu hai hwnwi sa kha, “Ang bugra hwnwi nwng’-no saui tong kha bla. Kók kubuino sana bagwi se ang achai-o, aboni bagwi se ang o swngcharo phai-o. Kubuini bwkhak tongnai joto borok ani kók khna-o.”

³⁸“Tamono kubui hwn?” hwnwi Pilat sẃng kha. Aphuru Pilat hai’-no hai phataro ongkhorwi Judairokno hai hwnwi sa kha, “Bono majra bernani ang mungsa phano nuk ya.

³⁹Norokni bisingo wngwi tongma hai Yókma Ter brúm brúm ang khoroksano alongni phiyók phiyógwi rohoro. Hakhe Judairokni bugrano norok ano phiyók di da hwn?”

⁴⁰Bórok chirikhógwi hai hwnwi sa kha, “I’nhi, bono ya! Barabano se phiyók di!” (Baraba wng kha dagait se.)