Read Kok Borok JOHON 20 Bible Online

JOHON 20 - Kok Borok bible

JOHON 20

¹Kaitho Salni phung aisirisiri katswi pile-pile-o Magdalani Mariam mangkhoro thángwi duglamni holongdap norjak nugwi kha.

²Hakhe bo khachigwi Simon Pitor bai Jisu hamjakmani a sagrini aro thángwi hai hwnwi saui kha, “Bórok Subraino mangkhorni tlang kha. Buro tonwi kha abo chwng saui man ya.”

³Hakhe Pitor bai a sagri ongkhorwi mangkhoro tháng kha.

⁴Bórok khoroknwi’-no khachik lai kha, tamo khe a sagri Pitorni slái swkang khachigwi mangkhoro sógwi kha.

⁵Bo bokhorok bomwi naisonwi a lilonni rírok simi klaijak nuhur kha, hai phano bo bisingo hap li ya.

⁶Bini ulo Pitor phaiwi mangkhoro hap phlaiwi tháng kha. Bo a lilonni ríroknobo klaijak nugwi kha.

⁷Jisuni bokhorok phánmani rínobo nugwi kha. Abo a lilonni rírok bai klaijak ya, aboni abo thepjak.

⁸Hakhe mangkhoro swkang sógwinai a sagribo bisingo hap kha; abono nugwi bo poito khlai kha.

⁹(Jisu kwthwini thangwi bachanai hwnwi elembakni o kókno bórok aphuru phano romwi man ya kho.)

¹⁰Aphuru a sagrirok nogo kiphilwi tháng kha.

¹¹Mariam kap twtwi mangkhorni phataro bachajak. Kap twtwi’-no bo bomsonwi mangkhoro naison hor kha,

¹²hakhe Jisuni mangno tonmani aro rí kuphur kanjak suari khoroknwino nuhur kha; khorokphango khoroksa, phiya yakung yaphango tei khoroksa achukjak.

¹³“O bwrwima, nwng tamo wngwi kap?” hwnwi bórok bono sẃng kha. Hakhe bo hai hwnwi sa kha, “Bórok ani Subraino tlang tháng kha, hakhe buro tonwi kha abo ang saui man ya.”

¹⁴Bo o kókno sa baiwi uphilwi Jisuno aro bachajak nuk kha, tamo khe bono Jisu hwnwi siniui man li ya.

¹⁵“O bwrwima, nwng tamo wngwi kap? Nwng sabono naituk?” hwnwi Jisu bono sẃng kha. Bari mwrwknai wngjak tẃi wngwi bo bono hai hwnwi sa kha, “Takhuk, nwng bono tlang khe buro tonwi kha ano sa di. Hakhe ang bono tlang anw.”

¹⁶Jisu bono hai hwnwi sa kha, “Mariam!” Bo uphilwi Hibru kók bai hai hwnwi sa kha, “Rabuni!” (Abo “Hoda” hwnma se).

¹⁷Jisu bono hai hwnwi sa kha, “Ano ta rom khu di, ang Aphani aro tabuk phano kasaui tháng ya kho. Tamo khe tháng di, ani takhukrokno hai hwnwi saui di, ‘Ang Apha Kaitorni aro kasaui thángnai, ani Apha khe noroknibo Nwpha, ani Kaitor khe noroknibo Kaitor.’ ”

¹⁸Hakhe Magdalani Mariam thángwi sagrirokno bo Subraino nukmano tei Subrai bai bo sajakmano saui kha.

¹⁹A Kaitho Salni horo sagrirok Judai hodarokno kirima bagwi nok khungsa-o dugar berebwi thansa khe tong lai kha. Aphuru Jisu bórokni kwcharo bacha phaiwi hai hwnwi sa kha, “Norok ham di.”

²⁰O kók saui bo bini yak bai oglepno bórokno phunuk kha. Sagrirok Subraino nugwi belai tongthokjak kha.

²¹Jisu hai’-no hai bórokno hai hwnwi sa kha, “Norok ham di. Apha ano rohorma hai angbo norokno rohoro.”

²²O kók saui bo bórokno subui hai hwnwi sa kha, “Phola Kwtharno yachak di.

²³Norok khoroksa swkni sumsokno nakar khe a borokni sumsok nakarjak kha; phiya norok nakar ya khe abo nakarjak ya.”

²⁴Sagri chiknwirokni bere Thoma hwnwi khoroksa (bono Apherbo hwno) Jisu phai phuru bórok bai kwrwi.

²⁵Hakhe tei sagrirok bono “Chwng Subraino nuk kha,” hwnwi sa kha. Thoma hai hwnwi sa kha, “Bini yakni kanta bujak mari nuk ya sak, a kanta bujak mari-o ani yasi soraui nai ya sak, phiya bini oglebo ani yak sitogwi nai ya sak ang kisa phano poito khlai ya.”

²⁶Nokha horsni ulo sagrirok hai’-no hai nok bisingo thansa khe tong laimani. Thomabo bórok bai tongo. Dugar berepjak, ahai phano Jisu bórokni kwcharo bacha phaiwi hai hwnwi sa kha, “Norok ham di.”

²⁷Hakhe bo Thomano hai hwnwi sa kha, “Nini yasi oro sora di, ani yakrok nai di phiya nini yak phologwi ani oglebo sitogwi nai di. Poito khlai ya ta wng si di, poito khlai di.”

²⁸Thoma bono hai hwnwi sa kha, “Ani Subrai, ani Kaitor!”

²⁹Jisu bono hai hwnwi sa kha, “Nwng ano nukma bagwi da poito khlai? Ano nuk yaui’-no poito khlainairok bórok hamchajak.”

³⁰Bini sagrirokni bwskango Jisu soidomni samung teibo kwbángma khlai kha; abórok oro swijak li ya.

³¹Jisu Masia phiya Kaitorni Sajla hwnwi norok poito khlaiwi omoni bising tẃi bini mungwi mwthangjak thung hwnwi se o kókrok swijago.