Read Kok Borok JOHON 21 Bible Online

JOHON 21 - Kok Borok bible

JOHON 21

¹Aboni ulo Jisu Tiberia twibomo bini sagrirok bai tei uáisa nukjak kha. Bo omo hai khe nukjak kha.

²Simon Pitor, Thoma (bono Apherbo hwno) Galilini Kanani Nathanial, Sebedaini bwsarok phiya Jisuni tei sagri khoroknwibo thansa khe tong laimani.

³Simon Pitor teirokno hai hwnwi sa kha, “Ang á romwi grana.” “Chwngbo nini logi thángnai,” hwnwi bórok bono sa kha. Hakhe bórok thángwi rungo kasaui lai kha, aile hopungwi á masa phano romwi man li ya.

⁴Aichuk pile-pile-o Jisu twi rukungo bachaui kha, hai phano sagrirok bono Jisu hwnwi siniui man li ya.

⁵Bo bórokno hai hwnwi sa kha, “Takhukrok, norok á masa phano romwi man li ya da?” “I’nhi, masa phano ya,” hwnwi bórok sa kha.

⁶Bo bórokno hai hwnwi sa kha, “Rungni yagra bwkhak chei khiklai di, hakhe man anw.” Aboni bagwino bórok chei khiklai kha, hakhe á kwbángma chei-o klaima bai bórok chei soui tisaui man li ya.

⁷Hakhe Jisu hamjakmani a sagri Pitorno hai hwnwi sa kha, “Ubo Subrai se!” Simon Pitor “Ubo Subrai se,” hwnwi khna kheno sago rí kwrwini bagwi bo sago rí thepaui twi-o bakhlaiwi rw kha.

⁸Tei sagrirok á kupulung cheino sopre laiwi twi rukungo rungo phai lai kha. Aphuru bórok twi rukung bai kwbáng chal tha ya, muk nwi sara nwi swk wng anw.

⁹Twi rukungo kasa khe’-no bórok hangar bai hór mwchẃngjak nuk kha, aro á sókjak, rutibo berajak.

¹⁰Hakhe Jisu bórokno hai hwnwi sa kha, “Norok tabuk rommani áno kisa tubu di.”

¹¹Simon Pitor rungo kasaui á kotor kupulung cheino soui hakungo tisaui tubu kha. Aro á maksara bachi-tham tongo. Á kwbángma tong phano a chei kichik li ya.

¹²Jisu bórokno hai hwnwi sa kha, “Phai di, chá phai di.” Sagri khoroksa phano bono “Nwng sabo?” hwnwi sẃng rak li ya, bórok bono Subrai hwnwi saui man kha.

¹³Jisu thángwi a ruti naui bórokno rw kha, phiya u ánobo ahai kheno rw kha.

¹⁴Kwthwini mwthangwi tisajakma ulo Jisu omo bai khe uáitham sagrirok bai nukjak kha.

¹⁵Bórok chá bai khe Jisu Simon Pitorno hai hwnwi sa kha, “Johonni bwsla Simon, omorokni slái da nwng ano hamjak kuk?” “I’n, Subrai, ang nono hamjakmani nwng saui mano,” hwnwi Pitor sa kha. Hakhe Jisu bono hai hwnwi sa kha, “Ani mera bwsarokno mwrwk di.”

¹⁶Jisu hai’-no hai bono hai hwnwi sa kha, “Johonni bwsla Simon, nwng ano ha da hamjak?” “I’n, Subrai, ang nono hamjakmani nwng saui mano,” hwnwi bo sa kha. Jisu bono hai hwnwi sa kha, “Ani merarokno nai di.”

¹⁷Jisu tei uáisa bono hai hwnwi sa kha, “Johonni bwsla Simon, nwng ano ha da hamjak?” Jisu bono “Nwng ano ha da hamjak?” hwnwi omo bai khe uáitham sẃngma bai Pitor khá hamya wngwi hai hwnwi sa kha, “Subrai, nwng bebak’-no saui mano. Ang nono hamjakmani nwng saui mano.” Jisu bono hai hwnwi sa kha, “Ani merarokno mwrwk di.

¹⁸Ang nono sói’-no kubui kók sa-o, nwng sikla phuru chango rí khaui thángna muchung thani-o thángo. Phiya chakra wng khe nwng yak pholok anw, hakhe bui se nini yakrokno khaui nwng thángna muchung ya thani-o tlang anw.”

¹⁹(Jisu o kókni bising tẃi Pitor bahai khe thwiwi Kaitorno chẃngsacha khlaino a kókno sama se.) Hakhe Jisu bono hai hwnwi sa kha, “Ang sama hai tong di.”

²⁰Pitor uphilwi Jisu hamjakmani a sagrino phaima nuk kha. Chá lai phuru Jisuni bwkhak jabirwi “Subrai, nono sabo rom rw no?” hwnwi sẃngnai abo’-no a sagri.

²¹Pitor bono nuk kheno Jisuno hai hwnwi sẃng kha, “Subrai, o borokni tamo wngnai?”

²²Jisu bono hai hwnwi sa kha, “Ang phai ya sak bono tonna nai khe nini tamo ba? Ang sama hai’-no nwng tong di!”

²³Hakhe a sagri thwi glak hwnwi poito khlainairokni bisingo o kók rwchar kha. Hai phano bo thwi glak hwnwi Jisu sama ya; bo hai hwnwi se sa-o, “Ang phai ya sak bono tonna nai khe nini tamo ba?”

²⁴O kókrokno sanai’-bo a sagri, swinai’-bo a sagri. Phiya bo samani abo kubui’-no hwnwi chwng saui mano.

²⁵Hakhe Jisu teibo aswk samung kwbángma khlai kha, abórokno mungsa mungsa khe swi khe aswk bijap kwbángma wng anw abo o swngcharo suda chak glak hwnwi ang khá ka-o.