Read Kok Borok JOHON 6 Bible Online

JOHON 6 - Kok Borok bible

JOHON 6

¹Aboni ulo Jisu Galili twibom ayang naro tháng kha. (A twibomno Tiberiabo hwno.)

²Bo hamyarokno ham rwmani soidomni samung nukma bai borok kwbángma bono rwkthar lai kha.

³Jisu hathái-o kasaui thángwi bini sagrirok bai achuk lai kha.

⁵Jisu yang yang naharwi borok kwbángma bini aro phaima nugwi Philipno hai hwnwi sa kha, “Aswk bororokno chá rwnani chwng buroni chámung painai?”

⁶(Bo Philipno potaliui naina bagwi se o kókno sa-o; tamo khlainai khlai ya abo bo kaham khe saui manjak se.)

⁷Philip hai hwnwi sa kha, “Kisa kisa khe rwna phano se aswk bororokni bagwi chámung painani rang khok nwira bai suda se wng glak.”

⁸Simon Pitorni takhuk Andria hwnwi sagri khoroksa hai hwnwi sa kha,

⁹“Oro chwrai khoroksa tongo, bini yago barlini ruti lepba tei á maknwi tongo. Aswk borogo omo saboni bukungo silnai?”

¹⁰“Bororokno achuk rw di,” hwnwi Jisu bórokno hwn kha. (Aro jabra kwbángma tongo.) Hakhe bebak borok achuk kha, aro chwlarok khorok basai wng thotok.

¹¹Jisu a ruti naui Kaitorno hambai rwui aro achukjak lukurokno banta khe rw kha, phiya a áno nauibo abo hai’-no banta khe rw kha. Hakhe bórok cháui man sak’-no chá lai kha.

¹²Bórok bebak’-no ok pungwi chá bai khe Jisu bini sagrirokno hai hwnwi sa kha, “Chikhaksa kwma ya tẃi khe bára tong rwkmarokno khochaui ton di.”

¹³Sagrirok abono khocha bai kha, hakhe naiwi nai ba barlini a ruti lepbani bororok cháma bárano khochamani ura khung chiknwi pung kha.

¹⁴Lukurok Jisuni o soidomni samungno nugwi hai hwnwi sa kha, “Omo ba swngcharo phainai hwnmani a diyari se wngna bla.”

¹⁵Hakhe bórok bono bugra snamna bagwi romphre nai kha hwnwi saui manẃi Jisu hai’-no hai saichung hathái-o tháng kha.

¹⁶Sanja jora wng kheno bini sagrirok twibom bwkhak ongkhorwi tháng kha,

¹⁷hakhe rungo kasa laiwi twibom ayang naro Kapharnaum bwkhak kiphilwi tháng lai kha. Yang le hor wngwi phai kha, aphuru phano Jisu bórokni aro phai ya kho.

¹⁸Aphuruno nokbar kotor sipchama bai twini potika pupak súgwi tong kha.

¹⁹Sagrirok mail kaitham kaibrwi chok laiwi tháng khe bórok Jisuno twi saka tẃi himwi rung bwkhak phaima nuk kha, hakhe belai kirijak lai kha.

²⁰Jisu bórokno hai hwnwi sa kha, “Ta kiri di, omo ang se!”

²¹Hakhe bórok bono rungo tisana nai lai kha, aphuru’-no bórok thángna hwn thani’-no a rung sógwi rwi kha.

²²Teini salo twibom ayang naro tongnai lukurok nai ba aro rung khungsa se. Jisu bini sagrirok bai rungo tháng li ya hwnwi bórok saui mano, bono klangwi sagrirok simi se thángo.

²³Aphuru Subrai hambai rw baiwi lukurokno ruti chá rwma gana-o Tiberia bwkhakni rung khungnwi khungtham phai kha.

²⁴Lukurok nai ba aro Jisubo kwrwi, bini sagrirokbo kwrwi, hakhe bórok rungo kasaui Kapharnaumo bono naitukna tháng lai kha.

²⁵Bórok twibom ayang naro Jisu bai malaiwi hai hwnwi sẃng kha, “Hodakra, nwng buphuru oro sók phai kha?”

²⁶Jisu hai hwnwi sa kha, “Ang norokno sóino kubui kók sa-o, a ruti ok pungwi ma chá kha hwnwi se norok ano naitugo, ani soidomni samung nugwi naituk ya.

²⁷Sogwi thángnai chámungni bagwi ta tang di, mwthang phlainai chámungni bagwi se tang di. Borokni Sajla se abo tẃi chámung norokno rwnai, tamni hwn khe Bupha Kaitor aboni bagwi se bono mari bu-ui rw-o.”

²⁸Hakhe bórok bono hai hwnwi sẃng kha, “Kaitorni samung khlaina bagwi chwng tamo khlaina nangno?”

²⁹Jisu hai hwnwi sa kha, “Kaitor rohormani borokno poito khlai di; omo’-no Kaitor khlai di hwnmani.”

³⁰Bórok hai hwnwi sẃng khua, “Nono poito wngna tẃi nwng chwngno bubo tẃi soidomni samung phunuk kha ba? Nwng tamo khlainai?

³¹‘Bo bórokno chá rwna bagwi chuknohani chámung rw kha,’ hwnwi elembago sama hai’-no chini chuchusong hasing panthoro manna chá lang kha.”

³²Jisu bórokno hai hwnwi sa kha, “Ang norokno sóino kubui kók sa-o, Musi norokno rwmani a chámung abo chuknohani ya. Apha se chuknohani a chámung kubuino rw-o.

³³Tamni hwn khe chuknohani ongkhorwi phainai abo se Kaitor rwmani chámung; bo’-se swngcharno mwthangnai.”

³⁴Bórok bono hai hwnwi sa kha, “Hodakra, chwngno abo tẃi chámung máng rwui tong di.”

³⁵Jisu bórokno hai hwnwi sa kha, “Angno mwthangnai chámung. Ani thani phainai borok bo ok khui phlai glak, phiya ano poito khlainai borok bo twi kang phlai glak.

³⁶Norok ano nugwi suda poito khlai ya, o kók ang norokno sa kha bla.

³⁷Apha ano rwmani joto borok ani thani phainai, phiya ani thani phainai borokno ang kiphil rwui rohor glak.

³⁸Tamni hwn khe ano rohornaini muchung tẃi samung khlainai hwnwi se ang chuknohani ongkhorwi phai-o, ani muchung tẃi khlaina hwnwi ya.

³⁹Ano rohornai ano rwmani a bororokni bere khoroksano phano kwmajak yaui páithakni salo ang bórokno khoroksa kwrwi tẃi mwthangwi tisa thung hwnwi se bo muchungjago.

⁴⁰Sajlano nugwi poito khlainairok mwthangjak phlai thung hwnwi se Apha muchungjago, hakhe páithakni salo ang bórokno mwthangwi tisanai.”

⁴¹“Ang’-no chuknohani ongkhorwi phainai a chámung,” hwnwi bo sama bai Judairok bono tẃi hunu-hanai sa lai kha.

⁴²Hakhe bórok hai hwnwi sa lai kha, “O borok Josepni bwsla Jisu ya diba? Buma buphasongno chwng saui mano. Hakhe bo tabuk bahai khe chuknohani ongkhorwi phainai hwnwi saui tong sla?”

⁴³Jisu bórokno hai hwnwi sa kha, “Omo tẃi hunu-hanai ta sa lai di.

⁴⁴Ano rohornai Apha yak so ya khe khoroksa phano ani thani phaiwi man ya; phiya páithakni salo ang bono mwthangwi tisa anw.

⁴⁵Diyarirok hai hwnwi swi lang kha, ‘Jotono Kaitor bai phrwngjak anw.’ Aphani kók khnaui rwngnairok bórok jotono ani thani phai-o.

⁴⁶Aphano khoroksa swk nuk kha, a kók ya kho; Kaitorni aroni phainai bo simi se Aphano nugo.

⁴⁷Ang norokno kubu kubui’-no sa-o, ano poito khlainai borok bo mwthangjak phlai kha.

⁴⁸Ang’-no mwthangnai chámung.

⁴⁹Norokni chuchusong hasing panthoro manna cháui suda thwi bai kha.

⁵⁰Phiya o chámung le Chuknohani ongkhorwi phaima se, hakhe abono chánai borok bo thwi glak.

⁵¹Ang’-no chuknohani ongkhorwi phainai a mwthangnai chámung. Tumungno khoroksa swk o chámungno chá khe bo kwthang tong phlainai. Ang bono chámung rwna hwnmani abo khe ani bahan se, swngchar ba mwthangjak thung hwnwi abono ang rwnani.”

⁵²Aboni bagwino Judairok bórok kiching bórok panjalwi tokra rw lai ahai hwnwi sa lai kha, “O borok tamo khe bini bahanno chwngno chána hwnwi rwui mannai ba?”

⁵³Jisu bórokno hai hwnwi sa kha, “Ang norokno sóino kubui kók sa-o, norok Borokni Sajlani bahan chá ya khe, phiya bini thẃi nung ya khe norok kwthang ya.

⁵⁴Ani bahan chánai borok, ani thẃi nungnai borok bo mwthangjak phlai kha, hakhe ang bono páithakni salo mwthangwi tisanai.

⁵⁵Ani bahan se sóini chámung, ani thẃi se sóini nungjaknai.

⁵⁶Ani bahan chánai borok, ani thẃi nungnai borok bo ani bisingo tongo, angbo bini bisingo tongo.

⁵⁷Apha kwthang ano rohoro, bini bai’-no angbo kwthang; omo hai kheno ano chánai borok bo ani bai thangnai.

⁵⁸Hakhe omo’-no chuknohani ongkhorwi phainai a chámung; omo norokni chuchusong cháui thwimani a chámung ya. O chámungno chánai borok bo kwthang tong phlainai.”

⁵⁹Kapharnaumni thumnogo phrwngwi tong phuru Jisu o kókrokno sa-o.

⁶⁰Omono khnaui sagrirokni bisingo baksa baksa hai hwnwi sa lai kha, “Omo khe jobor kók kwrak klai-o! Omono sabo khnaui mannai?”

⁶¹Bini sagrirok abono tẃi hunu-hanai sa laimano Jisu saui manẃi hai hwnwi sa kha, “Aswk bai’-no norok yakar bai sinai, hai da?

⁶²Rom di, Borokni Sajlano bini agini tong thani kasaui tháng phima nuk khe norok tamo hwnnai sla?

⁶³Borokno mwthangnai wng kha Kaitorni Phola se, bórokni phan le mungsa phano chúk ya. Ang norokni thani kók samani abono Phola, abono mwthangnai.

⁶⁴Hai phano norokni bere baksa poito khlai ya.” (Sabo sabo bono poito khlai ya, sabo ba bono rom rwno Jisu abo yaphangni simi’-no saui mano.)

⁶⁵Bo kók manju-ui hai hwnwi sa kha, “Hai hwnwino ang norokno o kók sa-o, Apha phai rw ya khe kebo ani thani phaiwi man ya.”

⁶⁶Aboni bagwi bini sagrirokni bisingo kwbángma uslu bai kha, bo bai tei himnai kwrwi kha.

⁶⁷Abono nugwi Jisu a sagri chiknwirokno hai hwnwi sẃng kha, “Hakhe norok buda thángna muchung bai?”

⁶⁸Simon Pitor hai hwnwi sa kha, “Subrai, saboni aro chwng thángnai? Nini thani se mwthang phlainai kók tongo.

⁶⁹Hakhe nwng’-no Khristo, Kaitor kwthangni Sajla hwnwi chwng katswi sauibo man kha tei poitobo khlai kha.”

⁷⁰Jisu bórokno hai hwnwi sa kha, “Norok chiknwirokno ang sagri chong ya diba? Ahai twtwi se norokni bere khoroksa soitan tongo!”

⁷¹Bo omo Simon Iskariotni bwsla Judasni kók sama se Sagri chiknwirokni bere bo khoroksa wng twtwi suda se Jisuno rom rwnai.