Read Kok Borok JOHON 8 Bible Online

JOHON 8 - Kok Borok bible

JOHON 8

¹Hakhe jotono nogo tháng bai kha. Aphuru Jisu Tháistwi hathái-o tháng kha.

²Teini phungo aisirisiri bo noktharo kiphilwi phai kha. Aswk borok kuthumui phai kha, hakhe bo achugwi phrwng kha.

³Aphuru Kerong phrwngnairok bai Pharisairok uaijaui tongma jora manjaknai bwrwi khoroksano tubu-ui bebakni bwskango bacha rw phai kha.

⁴Bórok Jisuno hai hwnwi sa kha, “Hodakra, o bwrwi katswi uaijaui tongma jora’-no manjak kha.

⁵Chini Kerongo Musi omo tẃi bwrwino holong khitarwi buthar di hwnwi dagiui klang kha. Nwng le tamo hwn sla?”

⁶Bórok Jisuno khẃi-o ká rwui bono majra berwi manna tẃi khe omono sama se. Hakhe Jisu bomsonwi yasi bai khe ha-o rik kha.

⁷Bórok bono sẃng máng tongma bai Jisu bokhorok tisaui hai hwnwi sa kha, “Norokni bere sumsok kwrwi borok bo’-no swkang khitar thung.”

⁸Hakhe bo bomson phirwi ha-o rigwi tong phi khua.

⁹Bórok o kókno khnaui sak sakno uansugwi naiwi bwkha-o nangjak lai kha, hakhe okrani simi mareui khoroksa khoroksa khe tháng kha. Jisu saichung se tong rwk si-o tei a bwrwi khe aro thóng-thóng bachajak.

¹⁰Bo bokhorok tisaui a bwrwino hai hwnwi sa kha, “Bwrwima, a bororok la? Nono majra bernairok oro khoroksa phano kwrwi kha da?”

¹¹“I’nhi, Subrai, khoroksa phano kwrwi kha,” hwnwi bo sa kha. Jisu hai hwnwi sa kha, “Hakhe angbo nono majra ber ya. Tháng di, tabukni simi sumsok ta khlai si di.”

¹²Jisu bórokno tei uáisa hai hwnwi sa kha, “Ang’-no o swngcharni pohor. Ano rwktharnai borok bo mwnakma-o ma him glak, phiya thangnani pohor mannai.”

¹³Pharisairok bono hai hwnwi sa kha, “Omo ba nini bagwi nwng sakki rwma se bla, nini o sakki samung nang ya.”

¹⁴Jisu hai hwnwi sa kha, “I’nhi, ani bagwi ang sakki rw phano ani o sakki kubui se, tamni hwn khe ang buroni phai buro thángnai abo ang saui mano; phiya ang buroni phai buro thángnai abo norok saui man ya.

¹⁵Norok wng kha borokni uansukma tẃi majra bero; ang le khoroksano phano majra ber ya.

¹⁶Ang majra ber phano abo sói se, tamni hwn khe oro ang saichung ya, ano rohornai Apha ang bai tongo.

¹⁷Khoroknwi sakki rwmani thansa hwn khe a sakki kubui hwnwi norokni Kerongo swijak tongo.

¹⁸Ani bagwi ang sakki rw-o, ano rohornai Aphabo ani bagwi sakki rw-o.”

¹⁹“Nwpha buro?” hwnwi bórok sẃng kha. “Norok anobo sini ya, Aphanobo sini ya. Norok ano sinima te Aphanobo sini kha mun,” hwnwi Jisu sa kha.

²⁰Noktharo rang tonjaknai japarok tong thani Jisu phrwng twtwi-o kókrokno sa kha. Aphuru khoroksa phano bono romnai kwrwi, tamni hwn khe bini jora sók phai ya kho.

²¹Jisu bórokno tei uáisa hai hwnwi sa kha, “Ang thángna nai kha; norok ano naituk anw, phiya norokni sumsogo norok thwi anw. Ang tháng thani-o norok thángwi man ya.”

²²Hakhe Judai hodarok hai hwnwi sa kha, “Bo ba saichung saichung da thwina nai? Aboni bagwi da ‘Ang tháng thani o norok thángwi man ya,’ hwnwi bo ba sa?”

²³Jisu hai hwnwi sa kha, “Norok wng kha hacherni, ang wng kha kuchukni. Norok wng kha o swngcharni, ang wng kha o swngcharni ya

²⁴Aboni bagwino norokni sumsogo norok thwi anw hwnwi ang sa-o. ‘Ang’-no Bo,’ hwnwi poito khlai ya khe norokni sumsogo norok thwi anw.”

²⁵“Nwng sabo?” hwnwi bórok bono sẃng kha. Jisu hai hwnwi sa kha, “Yaphangni simi’-no ang ba sa kha bla.

²⁶Norokno sanani tei majra bernani khe ani kwbángma se tongo. Ano rohornai bo wng kha kubui, hakhe bini thani khnamano simi se ang swngcharno sa-o.”

²⁷Bo Buphani kókno samano bórok romwi man li ya.

²⁸Hakhe Jisu hai hwnwi sa kha, “Borokni Sajlano norok kuchugo tisa phuru ‘Ang’-no Bo.’ hwnwi norok saui man anw. Aphuru norok saui man anw ang ani bai mungsa phano khlai ya, Apha phrwngmano simi se ang sa-o.

²⁹Ano rohornai bo ang bai’-no tongo; bo ano saichung khe yakarwi klang ya, tamni hwn khe bo hamjakma samungno ang khlai máng tongo.”

³⁰Jisuni o kókrokno khnaui borok kwbángma bono poito khlai kha.

³¹Aboni bagwino bono poito khlainai Judairokno Jisu hai hwnwi sa kha, “Ang sama hai norok tong khe hai khe se norok sói’-no ani sagri.

³²Norok kubuino saui mannai, hakhe a kubui’-no norokno phiyóknai.”

³³Bórok hai hwnwi sa kha, “Chwng Abraham bosongni borok, keboni seleng chwng wngwi phai ya kho. Hakhe ‘Norok phiyókjaknai,’ hwnwi nwng abo tamni kók sa ba?”

³⁴Jisu bórokno hai hwnwi sa kha, “Ang norokno sóino kubui kók sa-o, sumsok khlainai borok bo sumsokni seleng se.

³⁵Seleng le nogo tong phlainai ya, sajla se tong phlainai.

³⁶Hakhe Sajla norokno phiyók khe se norok yók súk nai.

³⁷Norok Abraham bosongni borok hwnwi ang saui mano, ahai phano norok ano butharna nai-o, tamni hwn khe ang samani kókno norok khá hapjak ya.

³⁸Apha ano phunukmarokno se ang sa-o, phiya norok khe norokni nwpha sama hai khlai-o.”

³⁹Bórok hai hwnwi sa kha “Abraham se chini apha.” Jisu hai hwnwi sa kha, “Norok sói’-no Abrahamni bwsa wngma tlai bo khlai langma hai’-no norokbo khlai kha mun.

⁴⁰Kaitorni thani khnamani kubuino simi se ang norokno khna rw-o, hai phano se norok ano butharna nai lai-o; Abraham abo hai khlai lang ya.

⁴¹Norokni nwpha khlaima hai’-no norokbo khlai-o.” Bórok hai hwnwi sa kha, “Chwng mung nangjak bwsa ya. Chini apha khoroksa se, abo wng kha Kaitor se.”

⁴²Jisu bórokno hai hwnwi sa kha, “Kaitor sói’-no norokni nwpha wngma tlai norok ano hamjak kha mun; tamni hwn khe ang Kaitorni aroni phaimani se, hakhe ang tabuk oro tongo. Ang ani bai phaimani ya, bo rohorma bai se phai-o.

⁴³Ang samo’-no norok tamo wngwi romwi man ya wng? Kók khe ahai se, ang samano norok khnathokjak ya.

⁴⁴Norok wng kha norokni nwpha Soitanni bwsa gwja! Hakhe norokni nwphani muchungmano norok asi yók rwna nai-o. Yaphangni simi’-no bo borok butharnai. Bini thani kubui kwrwini bagwi bo’-bo kubuini bwkhak kwrwi. Bo kók tatal sa phuru khe bini tongmung tẃi’-no abono sa-o, tamni hwn khe bo’-no tatal ba, tatalni bothomabo bo’-no.

⁴⁵Ang kók kubuino sama bai se norok ano poito khlai ya.

⁴⁶Ani sumsok tongo hwnwi norokni bere sabo phunugui mannai tong? Ang kók kubuino sa khe norok tamo wngwi ano poito khlai ya wng?

⁴⁷Kaitorni aroni phainai borok bo Kaitorni kók khna-o. Norok hai phano Kaitorni aroni ya, aboni bagwi norok ani kók khna ya.”

⁴⁸Judairok Jisuno hai hwnwi sa kha, “Nwng Samariasa se, nwng mwtai hamya kolobjak, chwng o kók samani abo sói ya diba?”

⁴⁹“Ang mwtai hamya kolobjak ya,” hwnwi Jisu sa kha. “Ang Aphano bóri-o, phiya norok khe ano bóri ya.

⁵⁰Ang ani sakni mwkhang chẃng rwna nai ya, abono chẃng rwna nainai khoroksa tongo, bo ani bwkhak kók sa-o.

⁵¹Ang norokno sóino kubui kók sa-o, ani kók khnanai borok bo thwi phlai glak.”

⁵²Judairok bono hai hwnwi sa kha, “Chwng tabuk saui man súk kha nwng mwtai hamya kolobjak’-no! Abrahambo thwi kha, diyarirokbo thwi bai kha, hai phano se ‘Ani kók khnanai borok bo thwi phlai glak,’ hwnwi nwng saui tong kho.

⁵³Chini apha Abraham thwiwi tháng kha, Abrahamni slái phano nwng kotor diba? Diyarirokbo thwiwi tháng bai kha. Nwng nono sabo hwn?”

⁵⁴Jisu hai hwnwi sa kha, “Ang ani sakni mwkhang chẃng rw khe abo mungsa dalo klai ya. Ani mwkhang chẃng rwnai khoroksa tongo, abo ani Apha; norokbo abono’-no ‘Chini Kaitor,’ hwnwi sa laiwi tong lai-o.

⁵⁵Norok bono sini ya kho, ang le bono sinijak se. Ang bono sini ya hwnwi sa khe norok hai’-no angbo tatal wngnai. Tamo khe ang bono sini-o, bini kókbo khna-o.

⁵⁶Norokni nwpha Abraham ani sal naina hwnwi khatung-khaja wng lang kha, hakhe bo abono nugwi tobo tongthokjak lang kha.”

⁵⁷Judairok bono hai hwnwi sa kha, “Nwng tabukbo nokha bisi bachini borok wng ya kho; nwng Abrahamno nu nuk rwk kha ba?”

⁵⁸Jisu hai hwnwi sa kha, “Ang norokno sóino kubui kók sa-o, Abraham achai ya sini’-no ‘Ang tongo.’ ”

⁵⁹Hakhe bórok bono khitarna hwnwi holong khocha lai kha. Aphuru Jisu sak samlogwi noktharni ongkhorwi tháng kha.