Read Kok Borok JOHON 9 Bible Online

JOHON 9 - Kok Borok bible

JOHON 9

¹Jisu him twtwi achai phuruni simi phula khoroksano nuk kha.

²Bini sagrirok bono hai hwnwi sẃng kha, “Hodakra, saboni sumsok bai bo ba phula wngwi ma achai lang? Bini sumsok bai da buma buphani sumsok bai?”

³Jisu hai hwnwi sa kha, “Bo phula wngmani abo bini sumsok buya, buma buphani buya. Kaitorni phan bini bising tẃi nukjakna bagwi se bo phula wngwi achai-o.

⁴Ano rohornaini samungno sal tongsani’-no chwng tangwi ma tongnai. Hor wngwi phai rwrwgo, aphuru khe kebo samung tangwi mannai ya.

⁵Ang swngcharo tong sak Ang’-no swngcharni pohor.”

⁶O kók sa baiwi Jisu ha-o khuktwi musu-ui a khuktwi bai khe kisa harpek snam kha. Bo a harpekno a borokni mokolo phulwi

⁷hai hwnwi sa kha, “Tháng di, Siloamni pukhiri-o thángwi mwkhang sú-ui di.” (Siloam wng kha “Rohormani” hwnma se.) Aboni bagwino a borok thángwi mwkhang sú-ui kha, hakhe mokol nugwi kiphilwi phai kha.

⁸Aphuru khe bini nok-arirok bai bono bír bírwi tongma nuknairok hai hwnwi sa lai kha, “Omo achugwi tong tongwi bírnai a borok ya da?”

⁹“Omo a borokno,” hwnwi baksa sa kha. Baksa ba “I’nhi, omo a borok ya, omo bono solnai se,” hwnwi sa kha. A borok bo sakphang’-no hai hwnwi sa kha, “Ang’-no a borok.”

¹⁰Bórok bono hai hwnwi sẃng kha, “Nwng bahai khe mokol nuk kha ba?”

¹¹Bo hai hwnwi sa kha, “A Jisu hwnjaknai se harpek kisa snamwi abono ani mokolo phulwi ‘Tháng di, Siloamo mwkhang sú-ui di,’ hwnwi ano sa kha. Aboni bagwino ang tháng kha, thángwi mwkhangbo sú-ui kha, hakhe mokolbo nuk kha.”

¹²“A borok buro?” hwnwi bórok sẃng kha. “Ang saui man ya,” hwnwi bo sa kha.

¹³Hakhe agi phula wngwi tongnai a borokno bórok Pharisairokni aro tlang lai kha.

¹⁴Jisu harpek snamwi a borokno mokol nuk rwmani a sal wng kha Sabat sal.

¹⁵Aboni bagwino bo bahai khe mokol nuk kha hwnwi Pharisairokbo bono hai’-no hai sẃng kha. Bo bórokno hai hwnwi sa kha, “Bo ani mokolo harpek kisa phnang khe ang mwkhang sú kha, hakhe ang mokol nuk kha.”

¹⁶Pharisairokni bere baksa hai hwnwi sa lai kha, “O samung khlainai borok abo Kaitorni aroni wngwi man ya. Bo Sabat salno rákhok ya.” Baksa ba hai hwnwi sa lai kha, “Sumsok gwnang borok bahai khe omo hai soidomni samung khlaiwi man sla?” Hakhe bórok chapjagwi man lai li ya.

¹⁷Aboni bagwino Pharisairok hai’-no hai a borokno hai hwnwi sẃng kha, “Bo nono mokol nuk rwui rw kha ba, nwng bono tamo hwnnai sla?” “Bo diyari ta,” hwnwi bo sa kha.

¹⁸Hai phano se Judai hodarok buma-buphano ringwi sẃng ya sak bo agi nuk ya tabuk nuk kha hwnwi poito khlaina nai ya.

¹⁹Bórok buma buphano hai hwnwi sẃng kha, “Omo nwsla da? Bo achai phuruni simi nuk ya da? Hakhe tabuk bo bahai khe nuk kha sla?”

²⁰Buma-bupha hai hwnwi sa kha, “I’n, bo chini angsla’-no, bo achai phuruni simi’-no phula hwnwi chwng saui mano.

²¹Phiya bo bahai khe tabuk mokol nuk kha, sabo ba bono mokol nuk rw kha, abo khe le chwng saui man li ya. Bono sẃng di, bo chwrai wng li ya bla, bini kókno bo’-no saui man bla!”

²²Buma buphasong Judai hodarokno kirima bai se hai hwnwi sa si-o, tamni hwn khe khoroksa swk phano Jisuno Masia hwnwi gosi khe bo thumnogo basijaknai hwnwi Judai hodarok swkang baira chap laiwi tong kha.

²³Aboni bagwino buma bupha “Bo chwrai wng li ya bla, bono sẃng di,” hwnwi sa-o.

²⁴A achai phuruni simi phulano bórok tei uáisa ring phirwi hai hwnwi sa kha, “Kaitorni mungwi nwng swmai tangwi kók kubui sa la! A borok sumsok gwnang hwnwi chwng saui mano.”

²⁵“Bo sumsok gwnang da gwnang ya abo ang saui man ya.” hwnwi a borok sa kha. “Ang mungsa simi se saui mano. Ang agi nuk ya, tabuk nuk kha.”

²⁶Bórok bono hai hwnwi sẃng lai kha, “Bo nono tamo khlai kha? Bahai khe mokol nuk rw kha ba?”

²⁷Bo hai hwnwi sa phi kha, “Ang ba norokno sa kha bla, norok se khna ya. Tamo wngwi norok omono tei uáisa khnana nai ba? Hakhe norok suda da bini sagri wngna muchung bai?”

²⁸Hakhe bórok bono kului hai hwnwi sa kha, “Nwng le a borokni sagri se, chwng le hwn khe Musini se sagri.

²⁹Chwng saui mano Kaitor Musi bai kók sa kha; o borok le buroni phai kha abo suda chwng saui man ya.”

³⁰A borok hai hwnwi sa kha, “Omo bwswk uanamasingcha kók ba! Bo buroni phai kha norok saui man ya phano bo ano mokol nuk rw kha!

³¹Chwng saui mano Kaitor sumsok gwnangrokni kók khna ya, phiya bono suriui bo naima tẃi tongnairokni kók se bo khna-o.

³²Takchengjak phuruni simi khoroksa phano achai phuruni simi phulano mokol nuk rw kha hwnwi khna trwng ya kho.

³³Kaitorni aroni phai ya wngma tlai o borok mungsa phano khlaiwi man glak kha mun.”

³⁴Bórok hai hwnwi sa khua, “Nwng ba sumsok kupulung khe achaimani se bla; nwng da chwngno phrwngna nai?” Hakhe bórok bono thumnokni rwkhlaiwi rohor kha.

³⁵Bórok a borokno rwkhlaiwi rohor kha hwnwi Jisu khna kha. Hakhe bo bono naitugwi hai hwnwi sẃng kha, “Nwng Kaitorni Sajlano poito da khlai?”

³⁶A borok hai hwnwi sa kha, “Takhuk, a borok sabo? Ang bono poito khlai manna tẃi khe sa di.”

³⁷Jisu bono hai hwnwi sa kha, “Nwng ba bono nuk kha bla, nwng bai tabuk kók saui tongnai bo’-no a borok.”

³⁸“Subrai, ang poito khlai kha,” hwnwi a borok yáskú sungwi Jisuno khulum kha.

³⁹Hakhe Jisu hai hwnwi sa kha, “Nuk yarok ba nuk thung, nuknairok ba ta nuk thung hwnwi se ang o swngcharo buj khlainani phai-o.”

⁴⁰Bo bai aro tongnai Pharisai khoroknwi khoroktham o kók khnaui bono hai hwnwi sẃng kha, “Chwngno suda da nuk ya hwn?”

⁴¹Jisu hai hwnwi sa kha, “Norok nuk ya wngma tlai norokni majra tong glak kha mun; Chwng nugo hwnwi norok sama bai’-no norokni sago majra tong kho.”