Read Kok Borok SAMUNG 11 Bible Online

SAMUNG 11 - Kok Borok bible

SAMUNG 11

¹Buini bororok suda Kaitorni kókno yachak kha hwnwi chonghorrok bai Judia gwnangwi tongnai takhukrok khna kha.

²Pitor Jerusalemo phai phuru buini bororok sakur ma rajaknai hwnwi sanairok bono hai hwnwi hamya hwn lai kha,

³“Nwng sakur rajakyarokni nogo habwi kha, hakhe bórok bai chá lai nung lai suda khlai kha.”

⁴Hakhe Pitor tamo wng kha abono yaphangni simi mareui saui khna rw kha.

⁵“Ang Jopa tauno suri sanwi tongmani, aphuru ang Kaitor bai imang phunukjak kha. Ang twmabo ongkhorwi phaima nuk kha, abo rí kotor kangsa babai brwi romwi ha-o tikhlai rohorma hai.

⁶Ang bisingo naisigwi nai ba aro uak-tokrok, bolongni manwirok, chibuk-sindrairok tei toksa-toktẃirok máng se.

⁷Aphuru ani thani hai hwnwi sama khna kha, ‘O Pitor, bacha di, butharwi chá di.’

⁸Tamo khe ang hai hwnwi sa kha, ‘I’nhi, ang wng glak, Subrai! Omo tẃi chámaya manwi hamyarok ani búkhúgo klai trwng ya kho.’

⁹Hai’-no hai nokha sakani hai hwnwi sajak kha, ‘Kaitor cháui mano hwnmano nwng chámaya ta hwn di.’

¹⁰Omo hai uáitham wng kha, ulo khe abo bebak’-no nokha-o sotroui tlangjak phi kha.

¹¹Katswi aphuru’-no ang tongmani a nogo Kaisariani ani thani rohorjaknai khorokthamrok sók phai-o.

¹²‘Bwkha dudru mudru wng yaui bórok bai baksa tháng di,’ hwnwi Phola ano sa kha, Jopani o takhukdokrokbo ani logi Kaisaria-o tháng kha, hakhe chwng bebak’-no Kornilini nogo habwi kha.

¹³Bini nogo bo bahai khe suari khoroksano bachajak nuk kha abo chwngno saui khna rw kha. A suari bono hai hwnwi sa kha. ‘Simon hwnwi khoroksano na rw horna bagwi Jopa-o borok rohor di. A Simon hwnjaknaino Pitorbo hwno.

¹⁴Bo nono kók sa anw abo bai khe nwng bai nini nokni jotono mwthangjak anw.’

¹⁵Ang kók sa dorop si kho, aphuru puila-o Phola Kwthar katswi chwngno kobol phaima hai bóroknobo kobol phai kha.

¹⁶Hakhe Subrai hai hwnwi samano ang muitu man kha, ‘Johon le twi bai se baptisma rw dla, norok Phola Kwthar bai baptisma rwjak anw.’

¹⁷Chwng Subrai Jisu Khristono poito khlai phuru Kaitor chwngno rwma hai’-no a buini bororoknobo rw kha omo sói’-no, hakhe Kaitorno kebengna nainai ang sabo?”

¹⁸Bórok omono khna kheno hamya samano thagwi Kaitorno hai hwnwi lob kha, “Hakhe Kaitor buini bororokno suda sumsok yakarwi thangnani lama rw kha!”

¹⁹Stipan butharjak phuru poito khlainairok sátokjagwi piring-poroi wng bai kha. Baksa Phoinikia, Saipras tei Antioko suda tháng kha, bórok Judairokno simi Kothoma Kaham pír kha.

²⁰Tamo khe Saipras bai Kurinini baksa poito khlainairok Antioko thángwi Subrai Jisuni Kothoma Kaham saui buini bororokni thani suda pír kha.

²¹Subrai bórokno phan rwui tongo, hakhe borok kwbángma poito khlaiwi Subraini phaising khá kiphil kha.

²²O kók Jerusalemni motha-o sók phai kha, aboni bagwino bórok Barnabano Antioko rohor kha.

²³Bo aro sógwi Kaitor aswk kaham khlaimano nugwi tongthokjak kha, hakhe “Norok jotono khá rw súgwi Subraini thani kaham khe kwrak khe tong di,” hwnwi hwn kha.

²⁴Barnaba wng kha borok kaham, Phola Kwthar bai koboljak tei belai poito gwnang. Borok kwbángma Subraini aro sitokjak kha.

²⁵Aphuru Barnaba Solno rutukna hwnwi Tarso tháng kha.

²⁶Bo bono nuk khe Antioko tubu kha. Nokha bisa khrangsa khe o khoroknwirok motha bai thansa khe tongwi borok kwbángmano phrwng kha. O Antioko’-no poito khlainairok puila Khristan hwnjak gra-o.

²⁷A molo diyari khoroknwi khoroktham Jerusalemni Antioko phai lai kha.

²⁸Bórokni bere Agab hwnwi khoroksa, bo bachaui Phola Kwthar bai swngchar gwnangwi belai asari nangna naiwi tong kha hwnwi sa kha. (Klodi bugra kotor wng phuru abo wngo.)

²⁹Judia-o tongnai takhukrokno chubana bagwi jotono janija mansak rohorna hwnwi poito khlainairok khá chong lai kha.

³⁰Bórok ahai’-no khlai kha, hakhe mothani okrarokni thani Barnaba bai Solni yak tẃi a rangno rohor kha.