Read Kok Borok SAMUNG 12 Bible Online

SAMUNG 12 - Kok Borok bible

SAMUNG 12

¹A molo bugra Herod mothani borok khoroknwi khorokthamno sátokna bagwi yak tisa kha.

²Bo Johonni takhuk Jakobno seng bai buthar kha.

³Omo tẃi khe Judairokno tongthokjakma nugwi bo teibo omo hai khlaina bagwi Pitornobo rom kha. (Auang bángla terni jora omo wngo.)

⁴Bo Pitorno romwi alongo chop kha, aro sengkrak khorokbrwi khe gut khajak abo tẃi gut kaibrwini yago bono mwrwkna bagwi yapharwi rw kha. Yókma Ter pái khe bono luku bwskango tubunai hwnwi Herod bwkha chabwi tong kha.

⁵Hakhe Pitor alongo tonjak kha, yang mothani bororok bini bagwi Kaitorni thani khá rwui suri sanwi tongo.

⁶Herod bono lukuni bwskango tubuna hwnmani swkangni horo Pitor sengkrak khoroknwini kwcharo thu-ui tongmani. Bo sorni dwkhwi twngnwi bai khajak, yang along duglam mwrwknairok bacha laijak.

⁷Achomsa Subraini suari khoroksa aro bacha phai kha, hakhe a khotolo pohor chẃngsa kha. A suari Pitorni bwsak tangwi bono socha kha, hakhe hai hwnwi sa kha, “Do di, bacha di!” Logi logi’-no Pitorni yaktwkni sorni dwkhwi phwrwisa khe klai kha.

⁸Hakhe suari hai hwnwi sa kha, “Chango rí kha di, yaklap ká di.” Pitor ahai’-no khlai kha, hakhe suari hai hwnwi sa kha, “Dulai chumui ani logi phai di.”

⁹Pitor bono rwktharwi alongni ongkhorwi tháng kha. A suari ahai khlaimano imang da mukthang da tamo bo saui man li ya, imang nugwi tongo hwnwi se bo khá kaui tongo.

¹⁰Bórok mwrwknairok tongmani kwrẃngsa lái gra kha, hakhe tei kaisa laiwi ulo tauno hapmani a sorni duglam bwskango phai kha. A duglam bórokni bagwi kiyok kha, hakhe bórok phataro ongkhorwi lama botok him lai kha; aphuru a suari Pitorno klangwi phatsa tháng kha.

¹¹Aphuru bono tẃi tamo wng kha abono saui manẃi Pitor hai hwnwi sa kha, “Tabuk ang saui man kha omo mukthang se! Subrai bini suarino rohorwi Herodni yaknibo ano phiyók kha, Judairok ano khlaina naimarokni yaknibo ano phiyók kha.”

¹²Bo abo tẃirokno saui manẃi Johon Markni buma Mariamni nogo tháng kha. Borok kwbángma aro kuthum laiwi suri san laijak.

¹³Pitor phatarni dugaro tok phai kha, hakhe Roda hwnwi selengjwk khoroksa naina phai kha.

¹⁴Bo Pitorni khorang romwi man kha, hakhe aswk tongthokjakma bai dugar phiyok yaui se kiphilwi khachik lang si-o. “Pitor phataro bachajak,” hwnwi bo saui rwui kha.

¹⁵“Nwng ba kobor se bla,” hwnwi bórok bono sa kha. “Kubui’-no tongo,” hwnwi bo sotonwi hwn kha. Bórok hai hwnwi sa kha, “Abo bini phola se.”

¹⁶Yang Pitor dugar tok máng tong kha. Ulo khe bórok dugar phiyogwi bono nuk kha, hakhe uanajak bai kha.

¹⁷Bórokno siring siring wngna bagwi bo yak tail khlai kha, hakhe Kaitor bahai khe bono alongni tikhlai tubu kha abo saui khna rw kha. Bo hai hwnwi sa kha, “Jakob bai tei takhukrokno o kókno sa di.” Hakhe bo kutulwi kwrẃngsa-o tháng kha.

¹⁸Phung aiwi sengkrakrok belai ubrum-jabrum nang laiwi Pitor biyang tháng kha sla hwnwi sẃng lai kha.

¹⁹Herod bono naitukna bagwi dagi kha, aile bono naitugwi man li ya. Aboni bagwino bo mwrwknairokno sẃng phenegwi bórokno butharna hwnwi dagi kha. Aboni ulo Herod Judiani tokhlai langwi Kaisaria-o kisa tong lang kha.

²⁰Herod Tur bai Sidonni bororokno belai jolijak kha. Aboni bagwino bórok gut khe Herodni aro phai kha. Puilano pelesni barja Blastono bórokni bwkhak tubu gra kha. Hakhe bórok Herodno khá kwchang rwna bagwi sa lai kha, tamni hwn khe bini hani se bórokni ha-o chámung sók phai-o.

²¹Salsa Herod bo khá chongmani salo rí jilik-jalak kanwi achukthayungo achugwi bororokni thani kók sa kha.

²²“Omo borok kók sama ya, mwtai se sa-o,” hwnwi bórok chirikhók lai kha.

²³Achomsa Subraini suari Herodno kosonwi khiklai kha, tamni hwn ba bo Kaitorno sak nang ya. Bo yóng klaiwi thwi kha.

²⁴Kaitorni kók píbo pírjak rwrwgo, tobo tor rwrwgo.

²⁵Barnaba bai Sol bórokni khlaijaknai samung páiwi Johon Markno logi tlangwi Jerusalemni kiphil kha.