Read Kok Borok SAMUNG 13 Bible Online

SAMUNG 13 - Kok Borok bible

SAMUNG 13

¹Antiok motha-o diyari bai phrwngnairok tongo: Barnaba, Simon (abono Kosom hwno), Luki (abo Kurinini borok), Manian (abo Herod gobornor bai baksa tor rwjaknai) tei Sol.

²Bórok ubas khe Subraino suriui tong phuru Phola Kwthar bórokno hai hwnwi sa kha, “Ang samung khlai rwna hwnwi Barnaba bai Solno ringmani. Ani a samungno khlaina bagwi bórokno khagwi rohor di.”

³Bórok ubas tongwi suri san kha, bórokni saka-o yak bera kha, hakhe bórokno rohor kha.

⁴Phola Kwthar bai rohorjagwi Barnaba bai Sol Selukia-o tokhlai tháng kha, hakhe aroni rungtoro kasaui twi kwcharni ha Saipraso tháng kha.

⁵Salamiso sógwi khe bórok Judai thumnokrogo Kaitorni kók sa lai kha. Samungo chubana hwnwi bórok Johon Markno logi tháng kha.

⁶Bórok a twi kwcharni ha tẃi thángwi Papho sógwi kha, aro bórok Bar-Jisu hwnwi Judai dandabaji khoroksano nugwi kha, bo sakno diyari hwno.

⁷Bo a twi kwcharni hani siyan kwrwng gobornor Sergi Polni bikiching. Gobornor Barnaba bai Solno bini bwskango ring kha, tamni hwn khe bo Kaitorni kók khnana nai-o.

⁸Phiya a dandabaji Eluma bórokno kebengwi tongo (Grik kók bai abono Eluma hwno); bo gobornorno Jisuno poito khlai rw ya khlaina nai-o.

⁹Hakhe Sol (bono Polbo hwno) Phola Kwthar bai koboljak kha, hakhe a danda-bajino naisigwi

¹⁰hai hwnwi sa kha, “Nwng Soitanni bwsa! Nwng joto kahamno kasu-o; hamya bai phemloknani máng nini bisingo kupulung, hakhe nwng Subraini kók kubuino tatal khlaina máng naiwi tongo!

¹¹Tabuk Subraini yak nini saka tisajak, nwng mokol nuk ya wngnai, hakhe salni pohor nuk ya wngwi tong granai.” Elumani mokolo achomsa siyari hai ap kolob phai kha, hakhe bono yak tolna hwnwi khoroksa swkno manna bagwi yang yang himgurung kha.

¹²Abono nugwi gobornor poito khlai kha; Subraini kók phrwngmano bo belai khe uanajak kha.

¹³Pol bai bini logisongrok Papho rungtoro kasaui Pamphuliani Perga-o phai kha; phiya Johon Mark bórokno aro klangwi Jerusalemo kiphil kha.

¹⁴Bórok Pergani thángwi Pisidiani Antioko sók phai kha, hakhe Sabat salo thumnogo habwi achuk kha.

¹⁵Musini Kerong bai diyarirok swimani aroni kók pori baiwi thumnokni hodarok bórokno hai hwnwi kók kwchárwi rohor kha, “Takhukrok, lukuno khápang srang rwnani kók tong khe norok abono sa phai ja di.”

¹⁶Hakhe Pol bachaui yak tail khe hai hwnwi sacha kha, “O Israilrok tei Kaitorno surinai buini bororok, ani kók khna bai di.

¹⁷O Israil dophani Kaitor chini chuchusongno chong kha, hakhe Israilrok buini ha Ijibo tongwima molo Kaitor bórokno dopha kotor snam kha. Kaitor bini phankrak bai bórokno Ijipni tikhlai tubu kha,

¹⁸hakhe nokha bisi brwichi jora bo bórokno hasing panthoro hama lok kha.

¹⁹Bo Kananni dopha kaisnino sokomorwi a hano bini bororokni yago rw kha,

²⁰abo nokha bisi brwira tei bachi swk jora wng anw. “Aboni ulo Samuel diyarini mol wng ya sak bo bórokni bagwi bokhorok rw kha.

²¹Bórok bugra khoroksa san khe Kaitor Benjamin bosongni Kisni bwsla Solno nokha bisi brwichi jora bugra chá rw kha.

²²Bono norwi Kaitor Daudno bugra chá rw kha. Kaitor bini kókno’-no hai hwnwi sa-o, ‘Jisaini bwsla Daudno ang nuk kha, bo ani kháni borok, ang khlai di hwnma hai’-no bo bebak’-no khlainai.’

²³Kaitor bo kók rwma hai’-no Daud bosongni Jisu Khristono Israilrokni Mwthangnaisa snam kha.

²⁴Jisu bini samung khlaima swkang Johon, ‘Sumsok yakarwi baptisma wng di.’ hwnwi bebak Israilrokni thani pír kha.

²⁵Bini samung pái tẃi pái tẃi-o Johon bororokno hai hwnwi sa kha, ‘Norok ano sabo hwn? Borok khoroksa phaina hwnmani ang a borok ya. Khna di, bo ani slái ulo se phainai, bini yakungni yaklap sokokna suda ang chúk ya.’

²⁶“Abraham bosongni ani takhukrok tei Kaitorno surinai buini bororok, o mwthangjaknani kók chini thani’-no rohorjago.

²⁷Tamni hwn khe Jerusalemo tongnairok tei bórokni bokhorokrok bono Mwthangnaisa hwnwi’-bo siniui man ya, Sabat sal brúm brúm porijakmani diyarirokni a kókroknobo saui man ya. Hai phano Jisuno majra berma tẃi bórok diyarirokni kókrokno nang rw phai kha.

²⁸Bo butharjakna nangnai abo tẃi samung bono khlaima nuk ya phano bórok bono butharna bagwi Pilatno sẃng kha,

²⁹Elembago bini bagwi joto kók sajakma hai bórok khlai baiwi bono krusni tikhlai kha, hakhe mangkhoro ton kha.

³⁰Hai phano Kaitor bono kwthwini mwthangwi tisa kha,

³¹hakhe Galilini simi Jerusalem jora bini logi phainairok bai bo kwbángma’-no nukjak kha. A nuknairok tabuk Israilrokni thani bini sakki.

³²Hakhe chwng norokni thani Kothoma Kaham tubunai: Kaitor chini chuchusongni thani khlaina hwnwi kók rwmani abo bo tabuk bórokni bosong chini thani khlai kha; Jisuno mwthangwi tisaui bo a samung khlai kha. Lobmung kwnwi-o hai hwnwi swijak tongma hai, “ ‘Nwng ani Sajla, ang tini nono achai rw kha.’

³³

³⁴Phiya bo komor phlaina nang ya tẃi Kaitor bono kwthwini mwthangwi tisamani kókno omo hai khe sa kha, ‘Ang Daudno kók rwma hai nono kwthar khe kaham khlai suknai.’

³⁵Tei kwrẃngsa-o bo hai hwnwi sa-o, ‘Nini borok kwtharno nwng komor rw glak.’

³⁶“Kaitor khá chapmarokno Daud bini molo khlaiwi thwi kha, bini chuchusongni gana phobjak kha, hakhe komor kha.

³⁷Phiya ba Kaitor mwthangwi tisamani a borok le komor li ya.

³⁸Takhukrok, norok o kókno saui man súk di, Jisuni bising tẃino sumsok nakarjaknani kók norokni thani pírjak kha; norok o kókno saui man di, bono poito khlainai borok bo sumsokni yakni phiyókjaknai, abo Musini Kerong phiyógwi man ya.

³⁹

⁴⁰Hakhe diyarirok hai hwnwi sa langmani abo norokni sago nang phai ya tẃi hus khe tong di,

⁴¹‘O kók nang ya sanairok, nahar di! Uana di, hakhe thwi di! Ang norokni molo omo tẃi samung khlainai abo norok poito khlai glak, khoroksa swk abono saui khna rw phano norok poito khlai glak.’ ”

⁴²Pol bai Barnaba thumnokni kutul phuru lukurok “Teini Sabat salo omo tẃi kókrokno teibo sa phai ja di,” hwnwi bórokno hwn kha.

⁴³Thumnokni kuthum laima pái kheno Judai bai Judai-o hap phainairok kwbángma Pol bai Barnabani logi tháng kha. Chonghorrok bórokno Kaitor bai khairokjakna tẃi khe tong di hwnwi saui khá srang rw kha.

⁴⁴Teini Sabat salo taunni khoroksa kwrwi tẃi Subraini kók khnana hwnwi phai kha.

⁴⁵Judairok aswk bororokno nugwi jai kheno músú kha, hakhe Pol samano hamya hwnwi bono lachi rw kha.

⁴⁶Tamo khe Pol bai Barnaba teibo kha torwi hai hwnwi sa kha, “Puilano Kaitorni kókno norokno sa thai klai-o. Tamo khe norok abono khna li ya ba, phiya mwthangjak phlaiwi mano hwnwi norok khá ka li ya ba, chwng norokno khibiui buini bororokni thani thángnai.

⁴⁷Tamni hwn khe Subrai chwngno hai hwnwi dagi kha, “ ‘Buini bororokni thani chati wngna hwnwi, swngcharni bebak bororokni thani thangnani lama wngna hwnwi, ang nono ton kha.’ ”

⁴⁸Buini bororok o kókno khnaui tongthokjagwi Subraini kókno kaham hwnwi lob lai kha, hakhe mwthangjakna bagwi chongjaknairok poito khlai kha.

⁴⁹A amchoi gwnangwi Subraini kók pírjak kha.

⁵⁰Tamo khe Judairok taunni bokhorokrokno tei buini bororokni bisingo Kaitorno surinai kolok-kotor bwrwirokno tunglok rw kha. Bórok Pol bai Barnabano sátok rwui bórokni a amchoini rwkhlaiwi rohor kha.

⁵¹Chonghorrok bórokno hus khlaina bagwi yakung hadlwi bupraui kabwi Ikoni-o tháng lai kha.

⁵²Antiokni sagrirok jai kheno tongthokjagwi Phola Kwthar bai koboljak kha.