Read Kok Borok SAMUNG 14 Bible Online

SAMUNG 14 - Kok Borok bible

SAMUNG 14

¹Ikoni-obo omo hai’-no wng phi khua; Pol bai Barnaba Judai thumnogo tháng kha, hakhe bórok ahai khe kók sama bai Judai bai buini bororok kwbángma poito khlai kha.

²Phiya poito khlai ya Judairok poito khlainairokni hamya khlaina bagwi buini bororokno tunglok rwui rw kha.

³Chonghorrok aro balogwi tong lai kha. Bórok Subraini kókno kirima kwrwi khe sa kha, hakhe Subrai bórokni yak tẃi ha-o nuk ya samung bai uanamasingcha samung khlaiwi bo khairokma kókno bórok samano kubui se hwnwi phunuk kha.

⁴A taunni bororok khek lai kha; baksa Judairokni bwkhak, baksa ba chonghorrokni bwkhak.

⁵Hakhe buini bororok bai Judairok bórokni bokhorokrok bai baksa chonghorrokni hamya khlaiwi holong khitarna hwnwi kók chap lai kha.

⁶Chonghorrok abo saui manẃi Lustra bai Derbeni gana-gini amchoi-o khár kha. Lustra ba Derbe wng kha Lukonia amchoini taun.

⁷Aro bórok Kothoma Kaham pír kha.

⁸Aro Lustra-o borok khoroksa yakung hoichajak tongo, bo achai phuruni simi khora, hakhe aswk wng kha bo himwi man ya kho.

⁹Bo achuk twtwi Pol kók samarokno khnaui tongo. Pol nai ba bo hamnai hwnwi poito khlai-o, hakhe bo bono naisigwi

¹⁰hai hwnwi sotonwi sa kha, “Yakung kepleng khe bacha di!” A borok phwngsa khe bacha kha, hakhe ayang uyang himwi tong kha.

¹¹Pol ahai khlaimano nugwi lukurok aroni Lukonia kók bai hai hwnwi chirikhók lai kha, “Mwtairok borok ahai wngwi chini thani ongkhorwi phai kha.”

¹²Bórok Barnabano Jus hwnwi phar kha, phiya Polno khe Hermi phar kha, tamni hwn khe bo le kók sanai bla.

¹³Jus mwtaini ochai taunni duglamo nusukrok bai khumtrangrok tubu kha, bini mwtai nok a taunni bwskango bachajak. Bo bai lukurok chonghorrokni thani ratharna naiwi tong lai kha.

¹⁴Bórok tamo khlaina naiwi tong kha abono saui manẃi Pol bai Barnaba sakni rí sichigwi lukurokni kwcharo khachik lai kha, hakhe hai hwnwi chirikhók kha,

¹⁵“O lukurok norok tamo wngwi omo hai khlaiwi tong lai kha? Chwng borok ja se, norok hai borokni mangtang gwnang! Chwng norokno Kothoma Kaham pírnai se; o samung nang ya manwirokno norokno khibi rwui Kaitor kwthangni bwkhak khá kiphil rwna bagwi chwng phai-o. O Kaitorno ha bai nokha bai twi bai tei aro tongnai bebak’-no snamnai.

¹⁶Kaitor agi bebak dopharokno janija muchung tẃi himna rw kha.

¹⁷Tamo khe samung kaham khlaima bising tẃi bo sabo tamo abo phunuk máng tongo; bo norokni bagwi nokhani uatwi ua rwui tongo, jora narwgwi mai khul rwui tongo; bo norokno chámung rwui tongo, phiya norokni bwkhano jai kheno tongthok rwui tongo.”

¹⁸O kókrok saui se chonghorrok bororokno bórokni thani ratharnani thak rwui man si-o.

¹⁹Aphuru Pisidiani Antiok bai Ikonini baksa Judairok aro phai kha, bórok lukuno bórokni bwkhak tubu gra kha, hakhe Polno holong khitar lai kha; bono thwi khna hwnwi bórok sopreui taunni phataro tunwi rwui kha.

²⁰Phiya poito khlainairok bono chorsa khe kuthum khe bo bacha kha, hakhe tauno kiphilwi tháng kha. Teini salo bo bai Barnaba Derbe-o tháng kha.

²¹Pol bai Barnaba Derbe-o Kothoma Kaham pír lai kha, hakhe sagri kwbángma man kha. Ulo khe bórok Lustra-o kiphilwi tháng kha, hakhe Ikoni-o, phiya Pisidiani Antioko kiphilwi tháng kha.

²²Bórok poito khlainairokno rak rwui poito kwrak khe tongna bagwi khápang srang rw kha. “Aswk tektoni bising tẃi chwng Kaitorni ha-o ma habwinai,” hwnwi bórok sa kha.

²³Motha brúm brúm bórok okrarok chong kha, ubas khe suri sanwi bórok poito khlaimani a Subraini yago bórokno yaphar kha.

²⁴Pisidia amchoi tẃi thángwi bórok Pamphulia-o sók phai kha.

²⁵Bórok Perga-o Kothoma Kaham pír kha, hakhe Atalia-o tokhlaiwi tháng kha.

²⁶Bórok aroni rungtor bai Antioko tháng kha. Tabuk khlai baimani a samungni bagwi bórok aro’-no Kaitor bai khairokjakna tẃi khe bini yapha-o yapharjago.

²⁷Bórok Antioko sógwi mothani bororokno thum kha, hakhe Kaitor bórokni yak tẃi aswk samung khlaimaroknobo saui khna rw kha, bo bahai khe buini bororok poito khlaina tẃi khe lama phiyógwi rw kha abonobo saui khna rw kha.

²⁸Bórok aro poito khlainairok bai akhini’-no balogwi tong kha.